អ៊ីរ៉ង់ឆ្លើយត​​បទៅ​នឹងការគំរាមកំហែ​ងរប​ស់លោក​Trump

មេដឹកនាំកំពូលរបស់អ៊ីរ៉ង់Ayatollah Ali Khamenei បានព្រមានថាទីក្រុងតេអេរ៉ង់នឹងសងសឹក។ប្រសិនបើមានការវាយប្រហារបន្ទាប់ពីការគម្រាមរបស់ប្រធានាធិបតីអាមេរិកDonald Trump ក្នុងការទម្លាក់គ្រាប់បែកលើអ៊ីរ៉ង់។

យោងតាមទីភ្នាក់ងារសារព័ត៌មានRT កាលពីថ្ងៃទី៣១ខែមីនាលោក Khamenei បានសង្កត់ធ្ងន់ថា រាល់ការវាយប្រហារលើអ៊ីរ៉ង់នឹងប្រឈមមុខនឹងការសងសឹកយ៉ាងខ្លាំងក្លា។មេដឹកនាំកំពូលរបស់អ៊ីរ៉ង់បាននិយាយថា"សហរដ្ឋអាមេរិក និងអ៊ីស្រាអែលគំរាមអនុវត្តសកម្មភាពដ៏សាហាវឃោរឃៅ។ប្រាកដណាស់ប្រសិនបើទង្វើបែបនេះត្រូវបានអនុវត្តពួកគេប្រាកដជាទទួលបានការឆ្លើយតបយ៉ាងខ្លាំង" ។លោក​បាន​បន្ថែម​ថា​៖«​ប្រសិនបើ​អាមេរិកនិង​អ៊ីស្រាអែល​គិត​ពី​ការ​ញុះញង់​ឲ្យ​មាន​ការ​បះបោរ​នៅ​ក្នុង​ប្រទេស​អ៊ីរ៉ង់​ដូច​ដែល​ពួកគេ​បាន​ធ្វើ​កាលពី​ឆ្នាំ​មុន​នោះអ៊ីរ៉ង់​នឹង​ឆ្លើយតប​ចំពោះ​ពួកគេ»។មុននេះ នៅក្នុងបទសម្ភាសន៍ជាមួយ NBC News នៅថ្ងៃទី៣០ខែមីនា លោកប្រធានាធិបតីTrumpបាននិយាយថាប្រសិនបើទីក្រុងតេអេរ៉ង់មិនទទួលយកកិច្ចព្រមព្រៀងរបស់លោកនិងកាត់បន្ថយកម្មវិធីនុយក្លេអ៊ែររបស់ខ្លួន អ៊ីរ៉ង់នឹងត្រូវទម្លាក់គ្រាប់បែក។ លោក Trump បាននិយាយថា "ប្រសិនបើពួកគេមិនធ្វើកិច្ចព្រមព្រៀងទេ វានឹងមានការទម្លាក់គ្រាប់បែក។ វានឹងមានការទម្លាក់គ្រាប់បែកដូចដែលពួកគេមិនដែលឃើញពីមុនមក" ។

មេដឹកនាំកំពូលអ៊ីរ៉ង់ Ayatollah Ali Khamenei ។ រូបថត៖ RT

ភាព​តានតឹង​រវាង​អាមេរិក និង​អ៊ីរ៉ង់​បាន​និង​កំពុង​កើនឡើង​ជុំវិញ​កម្មវិធី​នុយក្លេអ៊ែរ​របស់​ក្រុង​តេអេរ៉ង់​អស់​ជាច្រើន​ឆ្នាំ។ក្នុងអំឡុងពេលអាណត្តិដំបូងរបស់លោកជាប្រធានាធិបតី លោក Trump បានដកសហរដ្ឋអាមេរិកជាឯកតោភាគីចេញពីកិច្ចព្រមព្រៀងនុយក្លេអ៊ែរជាមួយអ៊ីរ៉ង់ដែលត្រូវបានគេស្គាល់ថាជាផែនការសកម្មភាពទូលំទូលាយរួម(JCPOA)។កិច្ចព្រមព្រៀងនេះមានគោលបំណងកាត់បន្ថយកម្មវិធីនុយក្លេអ៊ែររបស់អ៊ីរ៉ង់ជាថ្នូរនឹងការបន្ធូរបន្ថយទណ្ឌកម្មអន្តរជាតិលើទីក្រុងតេអេរ៉ង់។នៅចុងឆ្នាំ២០២៤ អគ្គនាយកទីភ្នាក់ងារថាមពលអាតូមិកអន្តរជាតិ (IAEA) លោក Rafael Grossi បានសម្តែងការព្រួយបារម្ភអំពីការបង្កើនការចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់។ទោះបីជាយ៉ាងណាក៏ដោយអ៊ីរ៉ង់បានបដិសេធការចោទប្រកាន់នេះ ហើយបានអះអាងថាកម្មវិធីនុយក្លេអ៊ែររបស់ខ្លួនមានសន្តិភាព និងស្របច្បាប់ក្រោម"ក្របខណ្ឌអន្តរជាតិ"។កាលពីដើមខែមីនា លោក Trump បាននិយាយថាលោកបានផ្ញើលិខិតមួយទៅកាន់មេដឹកនាំកំពូល លោក Khamenei ដែលស្នើឱ្យបន្តការចរចាលើកិច្ចព្រមព្រៀងនុយក្លេអ៊ែរ ហើយបានកំណត់រយៈពេល២ខែសម្រាប់ប្រទេសអ៊ីរ៉ង់ដើម្បីធ្វើការសម្រេចចិត្ត។ជាការឆ្លើយតប ប្រធានាធិបតីអ៊ីរ៉ង់ Masoud Pezeshkian បានអំពាវនាវឱ្យទីក្រុងវ៉ាស៊ីនតោនកសាងទំនុកចិត្តឡើងវិញជាមួយក្រុងតេអេរ៉ង់ជាមុនសិន។ នៅក្នុងកិច្ចប្រជុំគណៈរដ្ឋមន្ត្រីកាលពីថ្ងៃទី៣០ខែមីនា លោកPezeshkianបានបដិសេធមិនចរចាដោយផ្ទាល់ជាមួយសហរដ្ឋអាមេរិក។ប៉ុន្តែបាននិយាយថា"ផ្លូវទៅកាន់ការចរចាដោយប្រយោលនៅតែបើកចំហ"៕ពុតសាម៉ាត់