VIDEO៖អ្នក​ជួយ​សង្គ្រោះ​​បាន​ទាញ​ស្ត្រី​ម្នាក់​ឱ្យ​រួច​ជីវិត​​ពី​គំនរ​បាក់បែក​ដែល​​បណ្តាល​មក​ពី​ការ​រញ្ជួយ​ដី​​នៅ​មីយ៉ាន់​ម៉ា

ការ​រញ្ជួយ​ដី​ដ៏​គួរ​ឲ្យ​រន្ធត់​ក្នុង​ប្រទេស​មីយ៉ាន់ម៉ាក្រុម​អ្នក​ជួយ​សង្គ្រោះ​បាន​ទាញ​ស្ត្រី​ម្នាក់​ឱ្យ​រួច​រស់​ជីវិត​ពី​គំនរ​បាក់បែក​នៃ​អគារ​អាផាតមិន​មួយ​ក្នុង​ទីក្រុងMandalay ប្រទេស​មីយ៉ាន់ម៉ា ជាង​មួយ​ថ្ងៃ​បន្ទាប់​ពី​នាង​ត្រូវ​បាន​​កប់​ដោយ​ការ​រញ្ជួយ​ដី។

យោងតាម ​​BBC កាលពីថ្ងៃទី២៩ខែមីនា បន្ទាប់ពីការខិតខំប្រឹងប្រែងអស់ជាច្រើនម៉ោង អ្នកស្រី Phyu Lay Khaing អាយុ៣០ឆ្នាំត្រូវបានទាញចេញពីគំនរបាក់បែក ហើយយកទៅទុកលើរទេះរុញ។ នាង​បាន​ឱប​ប្តី​មុន​ពេល​បញ្ជូន​ទៅ​មន្ទីរពេទ្យ​ដើម្បី​ពិនិត្យ​សុខភាព ។

អាជ្ញាធរ Mandalay បាននិយាយថា មនុស្ស២៩នាក់ត្រូវបានជួយសង្គ្រោះពីកន្លែងកើតហេតុនៃអគារខ្ពស់មួយដែលបានដួលរលំដោយសារតែការរញ្ជួយ។បន្ថែមពីលើនេះ កងកម្លាំងជួយសង្គ្រោះមីយ៉ាន់ម៉ាក៏បានទាញស្ត្រីចំណាស់ម្នាក់ចេញពីគំនរបាក់បែក បន្ទាប់ពីបានកប់អស់រយៈពេលជាង៣០ម៉ោងនៅក្នុងរដ្ឋធានី Naypyitaw។ វីដេអូមួយដែលត្រូវបានបង្ហោះដោយBBC បង្ហាញពីស្ត្រីចំណាស់ម្នាក់នេះដេកនៅលើរទេះរុញខណៈដែលបុគ្គលិកពេទ្យបានឡោមព័ទ្ធនាងហើយបាននាំនាងទៅកាន់រថយន្តសង្គ្រោះដែលកំពុងរង់ចាំ។មកទល់នឹងពេលនេះ មនុស្សយ៉ាងតិច១៧០០ នាក់បានស្លាប់ និងជាង៣.៤០០នាក់ផ្សេងទៀតបានរងរបួសបន្ទាប់ពីគ្រោះរញ្ជួយដីកម្រិត ៧.៧ រិចទ័រ បានវាយប្រហារប្រទេសមីយ៉ាន់ម៉ាកាលពីថ្ងៃទី ២៨ ខែមីនា និងបណ្តាលឱ្យមានការរញ្ជួយយ៉ាងខ្លាំងនៅក្នុងប្រទេសជាច្រើនទៀត។ យោងតាមសហព័ន្ធអន្តរជាតិនៃសមាគមកាកបាទក្រហមនិងអឌ្ឍចន្ទក្រហមការរញ្ជួយដីគឺជាការបំផ្លិចបំផ្លាញបំផុតក្នុងរយៈពេលជាងមួយសតវត្សរ៍នៅក្នុងប្រទេសមីយ៉ាន់ម៉ា។បច្ចុប្បន្ននេះប្រទេសជាច្រើនបានបញ្ជូនក្រុមស្វែងរកនិងជួយសង្គ្រោះទៅជួយមីយ៉ាន់ម៉ា។ប្រទេស​ចិន​បាន​បញ្ជូន​ក្រុម​សង្គ្រោះ​ដែល​មាន​សមាជិក​ចំនួន៨២នាក់​ទៅ​ប្រទេស​អាស៊ីអាគ្នេយ៍​កាលពី​ម្សិលមិញ (២៩ មីនា)។ លើសពីនេះ ប្រទេសឥណ្ឌា ម៉ាឡេស៊ី ហ្វីលីពីន វៀតណាម ឥណ្ឌូនេស៊ី អៀរឡង់ កូរ៉េខាងត្បូង និងនូវែលសេឡង់ក៏បានបញ្ជូនក្រុមជួយសង្គ្រោះដើម្បីជួយមីយ៉ាន់ម៉ា យកឈ្នះលើផលវិបាកនៃគ្រោះធម្មជាតិផងដែរ៕ពុតសាម៉ាត់




Powered by Blogger.