លោកTrumpអំពា​វនាវឱ្យមានការរំសាយ​អាវុធនុយក្លេអ៊ែរ,​រុស្ស៊ីនិយាយ​ចេញមក

អ្នកនាំពាក្យវិមានក្រឹមឡាំងលោក Dmitry Peskov បាននិយាយថា ប្រទេសរុស្ស៊ីបានត្រៀមខ្លួនរួចជាស្រេចដើម្បីពិភាក្សាអំពីការគ្រប់គ្រងអាវុធជាមួយសហរដ្ឋអាមេរិកបន្ទាប់ពីប្រធានាធិបតី Donald Trump បានអំពាវនាវដល់មហាអំណាចធំៗឱ្យលុបបំបាត់អាវុធនុយក្លេអ៊ែរ។

យោងតាមទីភ្នាក់ងារសារព័ត៌មានRTកាលពីថ្ងៃទី៧ខែមីនា លោក Peskovបាននិយាយថាស្ថិរភាពជាយុទ្ធសាស្ត្រនិងការរំសាយអាវុធនុយក្លេអ៊ែរគឺជាប្រធានបទនៅក្នុងរបៀបវារៈរបស់ទីក្រុងម៉ូស្គូ។លោក​បាន​សង្កត់​ធ្ងន់​ថាការ​សន្ទនា​រវាង​រុស្ស៊ីនិង​អាមេរិក​លើ​ការ​គ្រប់​គ្រង​សព្វាវុធ«គឺ​ជា​ការ​ចាំបាច់»។លោកបានបន្ថែមថាការពិភាក្សាទាំងនេះនឹងផ្តល់ផលប្រយោជន៍មិនត្រឹមតែប្រទេសទាំងពីរប៉ុណ្ណោះទេថែមទាំងសន្តិសុខអន្តរជាតិជាទូទៅផងដែរ។មុននេះ កាលពីថ្ងៃទី៦ ខែមីនា នៅក្នុងការិយាល័យរាងពងក្រពើ លោក Trump បាននិយាយថា"វាពិតជាអស្ចារ្យណាស់ ប្រសិនបើយើងទាំងអស់គ្នាអាចលុបបំបាត់នុយក្លេអ៊ែរបាន"។ លោក​បាន​លើក​ឡើង​ថាបច្ចុប្បន្ន​អាមេរិកនិង​រុស្ស៊ី​មាន​ឃ្លាំង​អាវុធ​នុយក្លេអ៊ែរ​ធំ​ជាង​គេ ហើយ​ចិន​អាច​ឈាន​ដល់​កម្រិត​ដូចគ្នា​ក្នុង​រយៈពេល៤-៥ ឆ្នាំ។យោងតាមអ្នកនាំពាក្យវិមានក្រឹមឡាំងទីក្រុងម៉ូស្គូជឿជាក់ថាកិច្ចចរចាគួរមានការចូលរួមមិនត្រឹមតែសហរដ្ឋអាមេរិក រុស្ស៊ី និងចិនប៉ុណ្ណោះទេ ។ប៉ុន្តែក៏មានមហាអំណាចនុយក្លេអ៊ែរអឺរ៉ុបរួមទាំងបារាំងនិងអង់គ្លេសផងដែរ។លោកPeskovបាននិយាយដោយសំដៅទៅលើការអត្ថាធិប្បាយថ្មីៗរបស់ប្រធានាធិបតីបារាំងEmmanuel Macronថា "ឃ្លាំងអាវុធនុយក្លេអ៊ែររបស់អឺរ៉ុបមិនអាចត្រូវបានគេព្រងើយកន្តើយនៅក្នុងកិច្ចសន្ទនានេះទេ" ។នៅក្នុងសុន្ទរកថាកាលពីថ្ងៃទី៥ខែមីនា លោក Macron បានហៅប្រទេសរុស្ស៊ីថាជាការគំរាមកំហែងដល់ប្រទេសបារាំង និងអឺរ៉ុប។លោក​ក៏​បាន​និយាយ​ថា​លោក​កំពុង​ពិចារណា​ពង្រីក​ឆ័ត្រ​នុយក្លេអ៊ែរ​របស់​បារាំង​ដើម្បី​ការពារ​ប្រទេស​សមាជិក​សហភាព​អឺរ៉ុប។ ជាការឆ្លើយតបទីក្រុងម៉ូស្គូបានចោទប្រកាន់ប្រធានាធិបតី Macron ថាមានចេតនាបង្ករឿងរុស្ស៊ី។ទាក់ទិននឹងគោលជំហររបស់ចិនលើការរំសាយអាវុធនុយក្លេអ៊ែរលោក Peskov បាននិយាយថា វានៅតែមិនទាន់ច្បាស់នៅឡើយដោយសារទីក្រុងម៉ូស្គូ និងទីក្រុងប៉េកាំង មិនបានពិភាក្សាគ្នាអំពីបញ្ហានេះ។យោងតាមលោក Mikhail Ulyanov តំណាងអចិន្ត្រៃយ៍របស់រុស្ស៊ីប្រចាំអង្គការអន្តរជាតិនៅទីក្រុងវីយែន ការបំផ្លាញឃ្លាំងអាវុធនុយក្លេអ៊ែរទាំងមូល"មិនអាចទៅរួចទេនៅពេលនេះ" ។ប៉ុន្តែ "វិធានការកាត់បន្ថយខ្លះ វិធានការត្រួតពិនិត្យខ្លះអាចយល់បាន" ។

អ្នកនាំពាក្យវិមានក្រឹមឡាំងលោក Dmitry Peskov។TASS

កាលពីខែមករាសហរដ្ឋអាមេរិកបានប្រកាសពីការដាក់ពង្រាយគ្រាប់បែកនុយក្លេអ៊ែរដែលបានធ្វើឱ្យប្រសើរឡើងនៅមូលដ្ឋាននៅអឺរ៉ុប។យោងតាមរបាយការណ៍របស់ប្រព័ន្ធផ្សព្វផ្សាយមន្ទីរបញ្ចកោណក៏មានគម្រោងដាក់អាវុធនុយក្លេអ៊ែរនៅក្នុងចក្រភពអង់គ្លេសផងដែរ។សម្រាប់ផ្នែករបស់ខ្លួន រុស្ស៊ីបានអំពាវនាវម្តងហើយម្តងទៀតឱ្យប្រទេសទាំងអស់ធ្វើសកម្មភាពប្រកបដោយការទទួលខុសត្រូវ នៅពេលនិយាយអំពីអាវុធនុយក្លេអ៊ែរ ព្រោះថាគ្មានភាគីណាមួយអាចឈ្នះក្នុងសង្គ្រាមនុយក្លេអ៊ែរបានឡើយ៕ពុតសាម៉ាត់