តើ​យោ​ធា​អ៊ុយក្រែន​ប្រឈម​នឹង​គុណវិបត្តិ​អ្វីខ្លះ​នៅ​ពេល​អាមេរិក​ឈប់​ចែក​រំលែក​ព័ត៌មាន​សម្ងាត់?

នាយកCIA លោក John Ratcliffe បានបញ្ជាក់ថា ការផ្អាកការចែករំលែកព័ត៌មានសម្ងាត់របស់សហរដ្ឋអាមេរិកបានគំរាមកំហែងដល់សមត្ថភាពវាយប្រហាររបស់អ៊ុយក្រែនក្នុងអំឡុងពេលមានជម្លោះជាមួយរុស្ស៊ី។

លោក Ratcliffe បានប្រាប់ Fox Business នៅថ្ងៃទី ៥ខែមីនាថា"លោកTrumpមានសំណួរពិតប្រាកដមួយអំពីថាតើប្រធានាធិបតីVolodymyrZelenskyបានប្តេជ្ញាចិត្តចំពោះដំណើរការសន្តិភាពដែរឬទេ ហើយលោកបាននិយាយថា សូមផ្អាក" ។នៅព្រឹកថ្ងៃដដែល កាសែត Financial Times (FT) បានដកស្រង់ប្រភពអនាមិកដែលនិយាយថា សហរដ្ឋអាមេរិកបានបញ្ឈប់ការចែករំលែកព័ត៌មានចារកម្មជាមួយអ៊ុយក្រែន។ចំណាត់ការនេះបានធ្វើឡើងបន្ទាប់ពីទីក្រុងវ៉ាស៊ីនតោនបានប្រកាសពីការបង្កកជំនួយយោធាដល់ទីក្រុងគៀវបន្ទាប់ពីការឈ្លោះប្រកែកគ្នាជាសាធារណៈរវាងប្រធានាធិបតី Zelensky និងប្រធានាធិបតីអាមេរិក Donald Trump កាលពីថ្ងៃទី២៨ខែកុម្ភៈ។ ការសម្រេចចិត្តរបស់សហរដ្ឋអាមេរិកត្រូវបានគេជឿថាមានគោលបំណងដាក់សម្ពាធដល់លោកZelenskyឱ្យអង្គុយនៅតុចរចាសន្តិភាពដើម្បីបញ្ចប់ជម្លោះជាមួយរុស្ស៊ី។បន្ទាប់មកនៅថ្ងៃទី៤ខែមីនាប្រធានាធិបតី Zelensky បានទទួលស្គាល់ថាសង្រ្គាមពាក្យសម្ដីនៅក្នុងការិយាល័យ Ovalគឺ"អកុសល"ហើយបានបញ្ជាក់ពីការប្តេជ្ញាចិត្តរបស់លោកចំពោះសន្តិភាពក្រោមការដឹកនាំរបស់លោកTrump ។លោកប្រធានាធិបតី Trump បានសរសើរសេចក្តីថ្លែងការណ៍របស់សមភាគីលោកZelensky នៅក្នុងសុន្ទរកថាទៅកាន់សភាអាមេរិកកាលពីថ្ងៃទី៥ខែមីនា ។ប៉ុន្តែលោកមិនបានធ្វើអត្ថាធិប្បាយដោយផ្ទាល់លើការសម្រេចចិត្តបញ្ឈប់ជំនួយយោធាដល់គៀវនោះទេ។ទីភ្នាក់ងារព័ត៌មានជាច្រើនបានរាយការណ៍ព័ត៌មានដែលផ្ទុយគ្នាអំពីការផ្អាកជំនួយយោធារបស់សហរដ្ឋអាមេរិក រួមទាំងការចែករំលែកព័ត៌មានសម្ងាត់ផងដែរ។ទន្ទឹមនឹងនេះ ព័ត៌មានស៊ើបការណ៍បានដើរតួយ៉ាងសំខាន់ក្នុងការជួយអ៊ុយក្រែនវាយប្រហារគោលដៅនិងតាមដានសកម្មភាពយោធារុស្ស៊ី។ជាពិសេស ដោយដកស្រង់សម្តីមន្ត្រីអ៊ុយក្រែនBloombergបានបដិសេធព័ត៌មានរបស់FTហើយបាននិយាយថាសហរដ្ឋអាមេរិកនៅតែចែករំលែកព័ត៌មានសម្ងាត់ជាមួយអ៊ុយក្រែន។

ទន្ទឹមនឹងនេះ កាសែត Daily Mail បានរាយការណ៍ថាសហរដ្ឋអាមេរិកបានហាមឃាត់ចក្រភពអង់គ្លេសពីការចែករំលែកព័ត៌មានស៊ើបការណ៍សម្ងាត់ដែលទីក្រុងវ៉ាស៊ីនតោនទទួលបានជាមួយទីក្រុងគៀវ។មន្ត្រីពីរនាក់បានប្រាប់ FT ថា ខណៈពេលដែលសហរដ្ឋអាមេរិករារាំងសម្ព័ន្ធមិត្តរបស់ខ្លួនពីការចែករំលែកព័ត៌មានសម្ងាត់របស់ពួកគេជាមួយអ៊ុយក្រែនព័ត៌មានមួយចំនួននៅតែត្រូវបានបញ្ជូនទៅកាន់ទីក្រុងគៀវ។ ទោះជាយ៉ាងណាក៏ដោយ ការហាមប្រាមរបស់សហរដ្ឋអាមេរិកនឹងរារាំងការចែករំលែកព័ត៌មានសម្ងាត់តាមពេលវេលាជាក់ស្តែងដែលមានសារៈសំខាន់សម្រាប់អ៊ុយក្រែនដើម្បីធ្វើការវាយប្រហារយ៉ាងជាក់លាក់លើគោលដៅចល័តរបស់រុស្ស៊ី។ សារព័ត៌មាន Sky News ក៏​បាន​សង្កត់​ធ្ងន់​ថា ការ​រឹត​បន្តឹង​ព័ត៌មាន​គឺ "ជ្រើសរើស" ហើយ​មាន​គោលដៅ​លើ​សមត្ថភាព​វាយលុក​របស់​អ៊ុយក្រែន។ប្រព័ន្ធ​ផ្សព្វផ្សាយ​អាមេរិក​បាន​រាយការណ៍​ថា បញ្ជា​បញ្ឈប់​ជំនួយ​យោធា​ដល់​អ៊ុយក្រែន​នៅតែ​ជា​ធរមាន​នៅ​អាមេរិក។ វាមិនច្បាស់ទេថាតើសេចក្តីថ្លែងការណ៍របស់ប្រធានាធិបតីZelensky ដែលថាការជជែកដេញដោល Oval Office គឺ "អកុសល" នឹងគ្រប់គ្រាន់សម្រាប់លោកTrumpក្នុងការសម្រេចចិត្តដកការបង្កកលើជំនួយយោធា៕ពុតសាម៉ាត់