សម្តេចធិបតី​៖នៅឆ្នាំ២០២៩ខាងមុខកំ​ពង់ផែខេត្តព្រះសីហនុនឹ​ងមានទុនវិនិយោគប្រមា​ណជិត១០០០លានដុល្លា​រអាមេរិក​បន្ថែមទៀត

ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សាអគារស្នាក់នៅរបស់គ្រូបង្រៀនទីចាត់ការនិងអគារកាត់ដេរនៅវិទ្យាល័យ ហ៊ុនសែន វាលរេញ ខេត្តព្រះសីហនុនាព្រឹកថ្ងៃទី២៦ខែមីនាឆ្នាំ២០២៥នេះសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានថ្លែងបញ្ជាក់ថា នៅឆ្នាំ២០២៩ខាងមុខកំពង់ផែខេត្តព្រះសីហនុនឹងមានទុនវិនិយោគប្រមាណជិត១០០០លានដុល្លារអាមេរិកបន្ថែមទៀតខណៈដែលកំពង់ផែមួយនេះត្រូវការនូវទុនវិនិយោគដ៏ធំដែលយើងមិនត្រឹមតែធ្វើឱ្យវាជាកំពង់ផែអន្តរជាតិប៉ុណ្ណោះទេតែយើងត្រូវរៀបចំឱ្យទៅជាតំបន់ភស្តុភាកម្មនៃប្រព័ន្ធឡូជីស្ទិកតំបន់តែម្តងដើម្បីបម្រើដល់សេចក្តីត្រូវការចំពោះមុខ។ 

សម្តេចធិបតីបានថ្លែងបញ្ជាក់ថាសក្តានុពលខេត្តព្រះសីហនុនៅតែមានធំតទៅទៀតតែសក្តានុពលមួយនេះវាទាមទារនូវធនធានមនុស្សនៅនឹងកន្លែងជាពិសេសដែលយើងត្រូវតែអភិវឌ្ឍន៍នូវការបណ្តុះបណ្តាលឱ្យមានមូលដ្ឋានរឹងមាំដើម្បីផលិតធនធានមនុស្សនៅនឹងកន្លែងត្បិតយើងនឹងមានបងប្អូនប្រជាពលរដ្ឋចំណាកស្រុកមកពីខេត្តផ្សេងៗក៏ពិតមែន ។ប៉ុន្តែអ្នកខេត្តព្រះសីហនុនេះផ្ទាល់គឺជាអ្នកដែលត្រូវមានសមត្ថភាព និងមានលទ្ធភាពនៅក្នុងការចាប់យកឱកាសការងារបម្រើឱ្យការអភិវឌ្ឍ។ 

សម្តេចនាយករដ្ឋមន្រ្ដីបានបញ្ជាក់ថា សមិទ្ធផលនៅវិទ្យាល័យ ហ៊ុនសែន វាលរេញខេត្តព្រះសីហនុដែលសម្ពោធដាក់ឱ្យប្រើប្រាស់ជាផ្លូវការនាពេលនេះនឹងចូលរួមចំណែកក្នុងការកសាងធនធានមនុស្សនៅក្នុងខេត្តព្រះសីហនុរាប់សិបឆ្នាំតទៅមុខជំរុញខេត្តសក្តានុពលខាងសេដ្ឋកិច្ចមួយនេះពង្រីកតួនាទីធំទៅៗក្នុងការជួយដល់សេដ្ឋកិច្ចជាតិរបស់យើងទាំងមូល។សម្តេចធិបតីបានមានប្រសាសន៍ថាបើតាមរបាយការណ៍របស់អភិបាលខេត្តបានបង្ហាញថា ខេត្តព្រះសីហនុសម្រេចបាននូវវឌ្ឍនភាពការងារអប់រំ និងការបណ្តុះបណ្តាលធនធានមនុស្សគួរជាទីមោទនភាពទាំងលើទិដ្ឋភាព នៃគុណភាពអប់រំ និងវត្តមាននៃហេដ្ឋារចនាសម្ព័ន្ធអប់រំនៅក្នុងមូលដ្ឋាន ដែលក្នុងន័យនេះ សម្តេចធិបតីនាយករដ្ឋមន្ត្រីសូមកោតសរសើរ និងវាយតម្លៃខ្ពស់ដល់ក្រុមការងារនៃរាជរដ្ឋាភិបាលចុះមូលដ្ឋានខេត្តព្រះសីហនុថ្នាក់ដឹកនាំខេត្តមន្ទីរនិងអង្គភាពពាក់ព័ន្ធទាំងអស់ដែលបានខិតខំបំពេញការងារយ៉ាងសកម្មនៅក្នុងការងារអប់រំនៅខេត្តព្រះសីហនុប្រកបដោយស្មារតីទទួលខុសត្រូវខ្ពស់សំដៅធានាចាត់ចែងអនុវត្តន៍ប្រកបដោយស្មារតីបុរេសកម្មក្នុងការពិនិត្យឡើងវិញលើស្តង់ដារសាលាគំរូ រៀបចំយន្តការចុះជួយគាំទ្រសាលា រៀន យន្តការចុះវាយតម្លៃសាលារៀន និងយន្តការពិនិត្យតាមដាន ជាពិសេសការប្រមូលផ្តុំធនធាន សម្រាប់ការគាំទ្រដល់ការអនុវត្តស្តង់ដារសាលាគំរូធ្វើឱ្យសាលារៀននៅខេត្តព្រះសីហនុមានការកើនឡើងជាពិសេសជាប់លំដាប់ជាស្តង់ដារសាលាគំរូនិងទទួលបានជ័យលាភីក្នុងការវាយតម្លៃក្នុងការទទួលស្គាល់ថាជាអង្គភាពផ្តល់សេវាសាធារណៈគំរូក្នុងវិស័យអប់រំឆ្នាំ២០២៤ថែមទៀតផង។សូមជម្រាបជូនថារាជរដ្ឋាភិបាលបានដាក់ចេញនូវគោលនយោបាយ​ យុទ្ធសាស្ត្រ​ ផែនការ​ សកម្មភាព​ វិធានការចាំបាច់នានា​ និងកំណត់នូវក្របខណ្ឌសមិទ្ធកម្ម​ ដែលរួមមានសូចនាករគន្លឹះ​ គោលដៅ​ និងវិធីសាស្ត្រវាស់វែងវឌ្ឍនភាព​ ដើម្បីពង្រឹងគុណភាពអប់រំសាលារដ្ឋចាប់ពីថ្នាក់មត្តេយ្យរហូតដល់មធ្យមសិក្សា​ ប្រកបដោយស័ក្តសិទ្ធភាព​ ប្រសិទ្ធភាព​ និងសមិទ្ធកម្មតាមរយ:​ ១/​ ការពង្រឹងអភិបាលកិច្ចសាលារៀន,​ ២/​ ការពិនិត្យកែលម្អកម្មវិធីសិក្សា​ និងរៀបចំកម្មវិធីសិក្សា​និងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង​ វិន័យ​ សីលធម៌​ និងឥរិយាបទសិស្ស,​ ៣/​ ការយកចិត្តទុកដាក់លើសុខភាពសិស្សតាមរយៈ​កម្មវិធីអាហារូបត្ថម្ភដល់កុមារ​ និងការត្រួតពិនិត្យគុណភាពចំណីអាហារនៅតាមសាលា​ និង៤/​ ការជំរុញ​ និងលេីកទឹកចិត្តការចូលរួមរបស់មាតាបិតា​ អាណាព្យាល​ និងសហគមន៍ក្នុងការអប់រំ​ ស្របតាមពាក្យស្លោក​ “ភាពជាដៃគូរដ្ឋ​ និងសហគមន៍ដើម្បីការអប់រំ”៕ប្រភពSTPM