អាមេរិកគំ​រាម​ដាក់ទណ្ឌកម្មទ្វេរដងលើរុស្ស៊ី​ដើម្បីបញ្ចប់​ជម្លោះនៅ​អ៊ុយក្រែន

 ប្រធានាធិបតីអាមេរិកលោកDonaldTrumpគ្រោងនឹងបង្កើនការដាក់ទណ្ឌកម្មលើប្រទេសរុស្ស៊ី ដើម្បីជំរុញឱ្យមានការបញ្ចប់ជម្លោះរវាងទីក្រុងគៀវ និងទីក្រុងម៉ូស្គូ។នេះជាសេចក្តីថ្លែងការណ៍របស់លោក Keith Kellogg បេសកជនពិសេសរបស់ប្រធានាធិបតីអាមេរិកDonald Trump ទទួលបន្ទុកបញ្ហារុស្ស៊ី និងអ៊ុយក្រែនក្នុងបទសម្ភាសន៍ជាមួយកាសែត New York Post នៅសប្តាហ៍នេះ។លោក Kellogg បាននិយាយថា ទណ្ឌកម្មបច្ចុប្បន្នប្រឆាំងនឹងរុស្ស៊ីគឺត្រឹមតែ៣ចំណុចប៉ុណ្ណោះលើមាត្រដ្ឋានសម្ពាធសេដ្ឋកិច្ច១០ចំណុច។

លោកKelloggបាននិយាយដោយសំដៅទៅលើការដាក់ទណ្ឌកម្មលើកទី១៥របស់សហភាពអឺរ៉ុបដែលផ្តោតលើការផលិតនិងការនាំចេញប្រេងរបស់រុស្ស៊ីថា"មានលទ្ធភាពពិតប្រាកដនៃការបង្កើនទណ្ឌកម្ម។ជាពិសេសចុងក្រោយបំផុត" ។លើសពីនេះ លោក Kellogg ក៏បានរិះគន់យុទ្ធសាស្ត្ររបស់អតីតប្រធានាធិបតីអាមេរិក Joe Biden នៅពេលដែលលោកបានសន្យាថានឹងផ្តល់ជំនួយដល់អ៊ុយក្រែន “ដរាបណាត្រូវការ”។លោក Kellogg បានសង្កត់ធ្ងន់ថា "សម្ពាធមិនមែនគ្រាន់តែជាយោធាទេ អ្នកត្រូវតែដាក់សម្ពាធសេដ្ឋកិច្ច អ្នកត្រូវតែដាក់សម្ពាធការទូតលើរុស្ស៊ី"។យោងតាមលោក Kellogg ផងដែរក្រុមរបស់លោកTrumpកំពុងធ្វើការយ៉ាងសកម្មដើម្បីបញ្ចប់ជម្លោះរុស្ស៊ី និងអ៊ុយក្រែន។ ប៉ុន្តែលោកបានច្រានចោលរបាយការណ៍របស់ Bloombergថ្មីៗនេះដែលថាលោកនឹងបង្ហាញផែនការសន្តិភាពនៅឯសន្និសីទសន្តិសុខទីក្រុងMunich នៅសប្តាហ៍ក្រោយ។សម្រាប់លោក Trump បាននិយាយម្តងហើយម្តងទៀតអំពីការត្រៀមខ្លួនរបស់លោកក្នុងការពិភាក្សាជាមួយប្រធានាធិបតីរុស្ស៊ីលោក Vladimir Putin ឱ្យបានឆាប់តាមដែលអាចធ្វើទៅបានដើម្បីចរចាបញ្ចប់ជម្លោះនៅអ៊ុយក្រែន។វិមានក្រឹមឡាំងក៏បាននិយាយថាខ្លួនកំពុងរង់ចាំសញ្ញាច្បាស់លាស់ពីសេតវិមាន។ទោះបីជាយ៉ាងណាក៏ដោយលោកប្រធានាធិបតីPutin បាននិយាយថា ការចរចាណាមួយនៅក្រោមលក្ខខណ្ឌបច្ចុប្បន្ននឹង "ខុសច្បាប់" ដោយស្របច្បាប់ ដោយសារតែក្រឹត្យរបស់ប្រធានាធិបតី Zelenskyឆ្នាំ២០២២ដែលហាមប្រាមការចរចាជាមួយរុស្ស៊ី។កាលពីថ្ងៃទី៦ខែកុម្ភៈលោកZelenskyបានប្រកាសថាតាមពិតទៅលោកប្រធានាធិបតី Trumpនៅតែមិនទាន់មានផែនការផ្លូវការអំពីរបៀបបញ្ចប់ជម្លោះរវាងរុស្ស៊ី និងអ៊ុយក្រែននៅឡើយ៕ពុតសាម៉ាត់