ប៉ូឡូញ​​គំរាម​ចា​​ប់​នាយក​រដ្ឋមន្ត្រី​អ៊ីស្រា​អែលNetanyahu

 អនុរដ្ឋមន្ត្រីការបរទេសប៉ូឡូញបានប្រកាសថានាយករដ្ឋមន្ត្រីអ៊ីស្រាអែល BenjaminNetanyahuនឹងត្រូវចាប់ខ្លួនប្រសិនបើលោកចូលរួមខួបលើកទី ៨០នៃការរំដោះជំរុំប្រមូលផ្តុំAuschwitzនៅក្នុងប្រទេសអឺរ៉ុបខាងកើតនេះនៅខែក្រោយ។នៅក្នុងបទសម្ភាសន៍ជាមួយកាសែត Rzeczpospolita កាលពីចុងសប្តាហ៍មុនអនុរដ្ឋមន្ត្រីការបរទេសប៉ូឡូញ លោក Wladyslaw Bartoszewskiបាននិយាយថាប្រទេសប៉ូឡូញក្នុងនាមជាប្រទេសហត្ថលេខីនៃលក្ខន្តិកៈទីក្រុងរ៉ូមមានកាតព្វកិច្ចគោរពតាមការណែនាំរបស់តុលាការឧក្រិដ្ឋកម្មអន្តរជាតិ(ICC)។ ICCកាលពីខែវិច្ឆិកាបានចេញដីកាចាប់ខ្លួននាយករដ្ឋមន្ត្រីNetanyahu និងអតីតរដ្ឋមន្ត្រីការពារជាតិអ៊ីស្រាអែលYoav Gallant ពីបទឧក្រិដ្ឋកម្មសង្គ្រាមទាក់ទងនឹងជម្លោះដែលកំពុងបន្តនៅតំបន់ហ្គាហ្សា។កាសែត Jerusalem Postបានរាយការណ៍ថារដ្ឋមន្ត្រីអប់រំអ៊ីស្រាអែល YoavKischត្រូវបានគេរំពឹងថានឹងក្លាយជាតំណាងតែមួយគត់របស់រដ្ឋាភិបាលរបស់ប្រទេសក្នុងពិធីរំលឹកខួបលើកទី៨០នៃការរំដោះជំរុំប្រមូលផ្តុំ Auschwitz ក្នុងប្រទេសប៉ូឡូញក្នុងខែមករា ឆ្នាំ២០២៥។ កាសែត​នេះ​បាន​កត់​សម្គាល់​ថាបច្ចុប្បន្ន​នេះ​មិន​ទំនង​ជា​ទេ​ដែល​ប្រធានាធិបតី​អ៊ីស្រាអែល Isaac Herzog នឹង​ចូល​រួម​ក្នុង​ព្រឹត្តិការណ៍​នេះ។

នាយករដ្ឋមន្ត្រីអ៊ីស្រាអែលលោក Benjamin Netanyahu ។ 

យោងតាមRTទោះបីជារដ្ឋជាសមាជិកសហភាពអឺរ៉ុប(EU)ទាំង២៧សុទ្ធតែជាហត្ថលេខីនៃលក្ខន្តិកៈទីក្រុងរ៉ូម។ហើយដូច្នេះត្រូវមានកាតព្វកិច្ចអនុវត្តដីកាចាប់ខ្លួនរបស់ICC។ប៉ុន្តែប្រតិកម្មរបស់ពួកគេចំពោះការសម្រេចចិត្តរបស់តុលាការគឺខុសគ្នា។នាយករដ្ឋមន្ត្រីហុងគ្រី លោក Viktor Orban បានអញ្ជើញលោក Netanyahu ជាសាធារណៈ ហើយបានធានាថា អាជ្ញាធរទីក្រុង Budapest នឹងមិនអនុវត្តដីកាចាប់ខ្លួននោះទេ។ផ្ទុយទៅវិញ ប្រទេសមួយចំនួនដូចជា អេស្បាញ ហូឡង់ បែលហ្ស៊ិក អៀរឡង់លីទុយអានីនិងស្លូវេនីបានបង្ហាញចេតនាគោរពតាមសេចក្តីសម្រេចរបស់ ICC ដោយមិនគិតពីអភ័យឯកសិទ្ធិការទូត។ដំបូងឡើយ ប្រទេសបារាំងបានបង្ហាញពីចេតនារបស់ខ្លួនក្នុងការអនុវត្តតាមដីកាចាប់ខ្លួន។ប៉ុន្តែក្រោយមកបានអំពាវនាវឱ្យមានការការពារអភ័យឯកសិទ្ធិការទូតសម្រាប់នាយករដ្ឋមន្ត្រីអ៊ីស្រាអែល។សកម្មភាពរបស់ ICC ប្រឈមមុខនឹងការប្រឆាំងយ៉ាងខ្លាំងពីមន្ត្រីអ៊ីស្រាអែល។នាយក​រដ្ឋមន្ត្រី Netanyahuបាន​ថ្កោលទោស​ការ​សម្រេច​ចិត្ត​ចាប់​ខ្លួន​លោក​ថា​មាន​ហេតុផល​នយោបាយ៕ពុតសាម៉ាត់