ប្រធា​នាធិបតីកូរ៉េខាងត្បូងបានប្រកា​សបញ្ចប់ច្បាប់អាជ្ញាសឹក​បន្ទាប់ពីភាពច​លាចលរយៈពេល​៦ម៉ោង

ប្រធានាធិបតីកូរ៉េខាងត្បូងលោក Yoon Suk Yeol បានប្រកាសថា លោកនឹងលុបចោលច្បាប់អាជ្ញាសឹកបន្ទាប់ពីរដ្ឋសភាបានបោះឆ្នោតរារាំងវិធានការនេះ។យោងតាមសារព័ត៌មាន Korea Herald នៅព្រឹកថ្ងៃទី៤ ខែធ្នូ ប្រធានាធិបតីកូរ៉េខាងត្បូង លោក Yoon Suk Yeol បានប្រកាសថា លោកនឹងលុបចោលច្បាប់អាជ្ញាសឹកតាមសំណើរបស់រដ្ឋសភាដោយបញ្ចប់ភាពចលាចលរយៈពេល៦ម៉ោងនៅក្នុងប្រទេសកូរ៉េ។«ខ្ញុំបានប្រកាសច្បាប់អាជ្ញាសឹកជាបន្ទាន់មួយយប់ដើម្បីឆ្លើយតបនឹងកងកម្លាំងប្រឆាំងរដ្ឋ។ យ៉ាងណាក៏ដោយ រដ្ឋសភាបានស្នើសុំឱ្យមានការដកច្បាប់អាជ្ញាសឹក ហើយខ្ញុំបានបញ្ជាឱ្យដកទ័ពចេញ។ខ្ញុំទទួលយកសំណើរបស់រដ្ឋសភា ហើយនឹងបន្តដំណើរការនេះ តាមរយៈកិច្ចប្រជុំគណៈរដ្ឋមន្ត្រី។ខ្ញុំ​ក៏​ស្នើ​ឱ្យ​រដ្ឋសភា​បញ្ឈប់​ជា​បន្ទាន់​នូវ​កិច្ច​ខិតខំ​ប្រឹងប្រែង​ចោទ​ប្រកាន់ ការ​រៀបចំ​នីតិប្បញ្ញត្តិនិង​ការ​បំពាន​ថវិកា»។យោងតាមប្រព័ន្ធផ្សព្វផ្សាយក្នុងស្រុក កងទ័ពកូរ៉េបានទទួលបញ្ជាឱ្យដកទ័ពនៅម៉ោងប្រហែល៤និង២២នាទីព្រឹកថ្ងៃទី៤ខែធ្នូ(ម៉ោងក្នុងតំបន់)ហើយកំពុងធ្វើដំណើរត្រឡប់ទៅមូលដ្ឋានវិញ។ មន្ត្រីយោធាម្នាក់បានបង្ហើបថាពួកគេនៅតែរក្សាការប្រុងប្រយ័ត្នខ្ពស់ ហើយមិនឃើញមានសញ្ញាចម្លែកណាមួយពីកូរ៉េខាងជើង។

ប្រធានាធិបតីកូរ៉េខាងត្បូង Yoon Suk-yeol ។ រូបថត៖Yonhap

នៅយប់ថ្ងៃទី៣ខែធ្នូ ប្រធានាធិបតីកូរ៉េខាងត្បូង Yoon Suk Yeol ស្រាប់តែបានប្រកាសច្បាប់អាជ្ញាសឹកជាបន្ទាន់ដើម្បីដោះស្រាយសកម្មភាព "ប្រឆាំងរដ្ឋ"ដោយក្រុមប្រឆាំង។យ៉ាង​ណា​មិញ ចំណាត់ការ​នេះ​បាន​ប្រឈម​មុខ​នឹង​ប្រតិកម្ម​យ៉ាង​ឆាប់​រហ័ស​ពី​គណបក្ស​ប្រជាធិបតេយ្យ​ប្រឆាំង​ដែល​បច្ចុប្បន្ន​កាន់​សំឡេង​ភាគច្រើន​ក្នុង​រដ្ឋសភា។បន្ទាប់មកសមាជិកសភាកូរ៉េខាងត្បូងបានបោះឆ្នោតនៅព្រឹកព្រលឹមថ្ងៃទី៤ខែធ្នូដើម្បីលុបចោលច្បាប់អាជ្ញាសឹក។នេះជាលើកទីមួយហើយដែលប្រធានាធិបតីកូរ៉េបានប្រកាសច្បាប់អាជ្ញាសឹកក្នុងរយៈពេល៤៤ឆ្នាំកន្លងមកនេះ។ សកម្មភាពរបស់លោក Yoon បានធ្វើឱ្យតម្លៃប្រាក់វ៉ុនធ្លាក់ចុះហើយថែមទាំងធ្វើឱ្យមនុស្សជាច្រើនតវ៉ានៅខាងក្រៅអគាររដ្ឋសភា៕ផាត់យុទ្ធ