ស្ត្រីពពោះ​ជំនួសជនជាតិហ្វីលីពី​ន១៣នាក់ត្រូវបាន​ចាប់ខ្លួន​និងដាក់ពន្ធនាគារ៤ឆ្នាំ

បើយោងតាមសាលាដំបូងខេត្តកណ្តាលកាលពីថ្ងៃអង្គារបានឲ្យដឹងថាតុលាការកម្ពុជាបានកាត់ទោសស្ត្រីហ្វីលីពីនដែលមានផ្ទៃពោះ១៣នាក់ម្នាក់ៗឱ្យជាប់ពន្ធនាគាររយៈពេល៤ឆ្នាំពីបទពពោះជំនួស។ប្រភពដដែលបានអោយដឹងថា ពួកគេត្រូវបានចាប់ខ្លួននៅខេត្តកណ្តាលកាលពីខែកញ្ញា ហើយត្រូវបានចោទប្រកាន់ពីបទប៉ុនប៉ងជួញដូរមនុស្សឆ្លងដែន។ការកាត់ទោសត្រូវបានធ្វើឡើងនៅថ្ងៃទី២៨ខែវិច្ឆិកា និងថ្ងៃទី២៩ ខែវិច្ឆិកា ហើយសាលក្រមត្រូវបានចេញនៅថ្ងៃចន្ទ។តុលាការបានសម្រេចកាត់ទោសស្រី្តជនជាតិហ្វីលីពីន១៣នាក់ក្នុងម្នាក់ៗ៤ឆ្នាំតែអនុវត្តទោសក្នុងពន្ធនាគាររយៈពេល២ឆ្នាំទោសដែលនៅសល់ត្រូវព្យួរធម្មតា។សេចក្តីប្រកាសព័ត៌មានបានបន្តថា តុលាការមានភស្តុតាងជាក់ស្តែងដើម្បីបញ្ជាក់ថា អ្នកពរពោះជំនួសជនជាតិហ្វីលីពីនទាំង១៣ នាក់ មានចេតនាយកទារកឱ្យភ្ញៀវបរទេស ហើយនៅពេលដែលទារកកើតមក ពួកគេនឹងលក់ទារកទាំងនោះទៅឱ្យជនទីបីជាថ្នូរនឹងប្រាក់។

ការពពោះជំនួសគឺខុសច្បាប់នៅកម្ពុជា ប៉ុន្តែភ្នាក់ងារនានានៅតែបន្តផ្តល់សេវានេះ (រូបភាពឯកសារ)

ប្រភពដដែលបានបន្ថែមថានេះជាទង្វើនៃការជួញដូរមនុស្ស។យោងតាមសេចក្តីប្រកាសព័ត៌មានស្ត្រីខ្មែរម្នាក់ដែលបម្រើការជាអ្នកបោះសម្អាត និងធ្វើម្ហូបឲ្យស្រ្តីជនជាតិហ្វីលីពីនក៏ត្រូវបានកាត់ទោសឱ្យជាប់ពន្ធនាគាររយៈពេលពីរខែពីបទមិនរាយការណ៍ករណីព្រហ្មទណ្ឌនេះដល់នគរបាល។កម្ពុជាបានហាមឃាត់ការពពោះជំនួសកាលពីខែវិច្ឆិកា ឆ្នាំ២០១៦ ដោយអះអាងថាវាជាទម្រង់នៃការជួញដូរមនុស្ស។កាលពីខែសីហា ឆ្នាំ ២០១៧សាលាដំបូងរាជធានីភ្នំពេញបានកាត់ទោសគិលានុបដ្ឋាយិកាជនជាតិអូស្ត្រាលីម្នាក់ឱ្យជាប់ពន្ធនាគាររយៈពេល ១៨ ខែ ពីបទធ្វើអាជីវកម្មសេវាពពោះជំនួសនៅកម្ពុជា៕ Xinhua/KhmerTimes