កម្ពុជា​-ឡាវបង្កើនទំនាក់​ទំនងពា​ណិជ្ជកម្ម

 នាពេលថ្មីៗនេះបន្ទាប់ពីការដកខ្លួនចេញពីកតិកាសញ្ញាអភិវឌ្ឍន៍ដែលគេស្គាល់ថាជាតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA) រាជរដ្ឋាភិបាលកម្ពុជាបានបង្វែរជំហររបស់ខ្លួនក្នុងការជំរុញកិច្ចសហប្រតិបត្តិការទ្វេភាគីជាមួយសាធារណៈរដ្ឋប្រជាធិបតេយ្យប្រជាមានិតឡាវ រួមទាំង ការដកយកពន្ធត្រួតគ្នាវិស័យពាណិជ្ជកម្ម វិស័យទេសចរណ៍ និងវិស័យថាមពល។នៅខាងក្រៅកិច្ចប្រជុំកំពូលអាស៊ានលើកទី៤៤ និងទី៤៥ និងកិច្ចប្រជុំកំពូលពាក់ព័ន្ធក្រោមមូលបទ អាស៊ាន៖ ការបង្កើនការតភ្ជាប់និងភាពធន់ លោកនាយករដ្ឋមន្ត្រី ហ៊ុន ម៉ាណែត និងលោក សនសៃ ស៊ីផាន់ដន (Sonexay Siphandone) នាយករដ្ឋមន្ត្រីឡាវបានពិភាក្សាអំពីវិធីដើម្បីបង្កើនភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង នៅទីក្រុងវៀងចន្ទន៍ នៃសាធារណៈរដ្ឋប្រជាធិបតេយ្យប្រជាមានិតឡាវ កាលពីថ្ងៃទី៨ ខែតុលា។លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ (MAFIC) និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម ក៏មានវត្តមានក្នុងឱកាសនោះដែរ។ក្នុងឱកាសជំនួបនេះ គណៈប្រតិភូជាន់ខ្ពស់កម្ពុជា និងឡាវ បានពិនិត្យលទ្ធភាពនៃការពង្រឹង និងពង្រីកកិច្ចសហប្រតិបត្តិការទ្វេភាគីក្នុងវិស័យអាទិភាព រួមមាន ពាណិជ្ជកម្ម វិនិយោគ ទេសចរណ៍ ហិរញ្ញវត្ថុ ថាមពល ការអប់រំ ហេដ្ឋារចនាសម្ព័ន្ធ នយោបាយ ការពារជាតិ និងសន្តិសុខ។លោកនាយករដ្ឋមន្ត្រី ស៊ីផាន់ដន បានសាទរចំពោះសមិទ្ធផលរបស់រាជរដ្ឋាភិបាលកម្ពុជាក្នុងការលើកកម្ពស់ជីវភាពប្រជាពលរដ្ឋកម្ពុជានិងលើកកម្ពស់កិត្យានុភាពរបស់ខ្លួនលើឆាកតំបន់និងអន្តរជាតិ។សម្តេចហ៊ុនម៉ាណែតបានថ្លែងអំណរគុណចំពោះការស្វាគមន៍យ៉ាងកក់ក្តៅ និងបានគូសបញ្ជាក់ពីការគាំទ្រចំពោះយន្តការ និងយុទ្ធសាស្ត្ររបស់អាស៊ាន ក្រោមការដឹកនាំជាប្រធានរបស់ឡាវ។

មេដឹកនាំទាំងពីរបានសម្តែងការពេញចិត្តដោយបានវាយតម្លៃខ្ពស់ចំពោះវឌ្ឍនភាពក្នុងការជំរុញទំនាក់ទំនងនិងកិច្ចសហប្រតិបត្តិការរវាងប្រទេសជិតខាងទាំងពីរ។យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ បានឱ្យដឹងថាសម្តេចហ៊ុន ម៉ាណែត និងលោក សនសៃ ស៊ីផាន់ដនបានឯកភាពគ្នាបញ្ចប់កិច្ចព្រមព្រៀងសម្រាប់ ‘ការលុបបំបាត់ការយកពន្ធត្រួតគ្នា’ ទាក់ទងនឹង ‘ពន្ធលើប្រាក់ចំណូល និងការទប់ស្កាត់ការគេចវេសពន្ធនិងការចៀសវាងពន្ធ’ដែលនឹងត្រូវចុះហត្ថលេខា តាមពេលវេលាសមស្រប។សេចក្តីប្រកាសព័ត៌មានបានបន្ថែមថា ភាគីទាំងពីរបានបង្ហាញពីបំណងរួមក្នុងការរៀបចំកិច្ចប្រជុំលើកទី១៥ នៃ “គណៈកម្មការចម្រុះកម្ពុជា-ឡាវ”សម្រាប់កិច្ចសហប្រតិបត្តិការទ្វេភាគីនាពេលឆាប់ៗនេះ។ពាក់ព័ន្ធនឹងវិស័យពាណិជ្ជកម្ម និងទេសចរណ៍ ភាគីទាំងពីរបានពិភាក្សាអំពីវិធីបង្កើនពាណិជ្ជកម្មទ្វេភាគីឱ្យកាន់តែមានសក្ដានុពលពេញលេញដោយជំរុញឡើងវិញនូវកិច្ចប្រជុំគណៈកម្មាធិការពាណិជ្ជកម្មចម្រុះ។ ភាគីទាំងពីរ​បានឯកភាព​គ្នា​ក្នុង​ការ​ពង្រឹង​ការ​តភ្ជាប់​ហេដ្ឋារចនាសម្ព័ន្ធ​តាម​ព្រំដែន ដើម្បី​សម្រួល​ដល់​ពាណិជ្ជកម្ម និង​ភ្ញៀវ​ទេសចរ។សម្រាប់កិច្ចសហប្រតិបត្តិការវិស័យថាមពល ភាគីទាំងពីរបានសង្កត់ធ្ងន់លើសារៈសំខាន់នៃសន្តិសុខថាមពល និងហេដ្ឋារចនាសម្ព័ន្ធអគ្គិសនីក្នុងការពង្រីកការផ្គត់ផ្គង់ថាមពលបៃតង និងតំបន់ដើម្បីរួមចំណែកដល់ការសម្រេចបានបណ្តាញថាមពលអាស៊ាន(ASEAN Power Grid)៕