សេដ្ឋកិច្ច​ក្តៅ​ខ្លាំង​​ដោ​យសារ​សង្គ្រាមរុស្ស៊ី​ត្រូវ​ដំ​ឡើង​​អត្រា​ការប្រា​ក់​ឲ្យ​ខ្ពស់​បំផុត​

 ធនាគារកណ្តាលរបស់រុស្ស៊ីបានដំឡើងអត្រាការប្រាក់ដល់កម្រិត២១% ដោយសារអតិផរណាលើសពីការព្យាករណ៍ហើយសង្រ្គាមដែលអូសបន្លាយរវាងរុស្ស៊ីនិងអ៊ុយក្រែន គំរាមកំហែងធ្វើឱ្យសេដ្ឋកិច្ចចុះខ្សោយ។ថ្មីៗនេះធនាគារកណ្តាលនៃប្រទេសរុស្ស៊ីបានប្រកាសពីការដំឡើងអត្រាការប្រាក់យោង២%ដល់២១% ។ ការកើនឡើងនេះគឺទ្វេដងនៃការព្យាករណ៍របស់អ្នកវិភាគដែលនាំឱ្យអត្រាការប្រាក់ឡើងដល់កម្រិតខ្ពស់បំផុតចាប់តាំងពីខែកុម្ភៈឆ្នាំ២០០៣។

នៅក្នុងខែកញ្ញាទីភ្នាក់ងារនេះបានបង្កើនអត្រាការប្រាក់១០០ពិន្ទុមូលដ្ឋានដល់១៩% ។ អ្នកវិភាគបានព្យាករណ៍ថាអត្រាការប្រាក់រុស្ស៊ីនឹងកើនឡើង ១%ទៀត ខណៈដែលអតិផរណានៅតែបន្តថ្លឹងថ្លែងលើសេដ្ឋកិច្ច ចំពេលមានការកើនឡើងនៃការចំណាយយោធាលើសង្គ្រាមរុស្ស៊ី និងអ៊ុយក្រែន។ទោះជាយ៉ាងណាក៏ដោយការកើនឡើង២%ដោយធនាគារកណ្តាលនៃប្រទេសរុស្ស៊ីបន្ទាប់ពីការកើនឡើងអត្រាការប្រាក់ជាច្រើននៅក្នុងឆ្នាំមុននេះបង្ហាញពីកិច្ចខិតខំប្រឹងប្រែងកាន់តែខ្លាំងឡើងរបស់ទីក្រុងម៉ូស្គូក្នុងការទប់ស្កាត់អតិផរណា។ពេលវេលាចុងក្រោយនៃអត្រាការប្រាក់នៅក្នុងប្រទេសរុស្ស៊ីគឺជិតដល់កម្រិតបច្ចុប្បន្នគឺខែកុម្ភៈ ឆ្នាំ២០២២។ នៅពេលនោះមន្ត្រីរបស់ប្រទេសនេះបានដំឡើងអត្រាការប្រាក់យោងដល់ ២០% ដើម្បីរក្សាស្ថិរភាពទីផ្សារ ប៉ុន្មានថ្ងៃបន្ទាប់ពីសង្គ្រាមរវាងរុស្ស៊ី និងអ៊ុយក្រែនបានផ្ទុះឡើង។ទេសាភិបាលធនាគារកណ្តាលនៃប្រទេសរុស្ស៊ី Elvira Nabiullina បាននិយាយថា ពួកគេថែមទាំងកំពុងពិចារណាដំឡើងអត្រាការប្រាក់លើសពី២១% ហើយនៅតែបើកចំហលទ្ធភាពនៃការកែតម្រូវបន្ថែមទៀតនៅក្នុងកិច្ចប្រជុំខែធ្នូការផ្លាស់ប្តូរនេះត្រូវបានធ្វើឡើងដើម្បីទប់ស្កាត់ការប្រើប្រាស់ទំនិញដែលកំពុងកើនឡើងលើសពីការព្យាករណ៍។ធនាគារកណ្តាលនៃប្រទេសរុស្ស៊ីបាននិយាយថាអតិផរណាបច្ចុប្បន្នគឺ៨.៤% ។ ពួកគេព្យាករណ៍ពីអតិផរណានៅចុងឆ្នាំនេះប្រហែល៨-៨.៥% - ខ្ពស់ជាងការព្យាករណ៍ខែកក្កដា៦.៥-៧% ។ទីភ្នាក់ងារនេះបាននិយាយថា "ក្នុងរយៈពេលមធ្យមហានិភ័យអតិផរណានៅតែមានកម្រិតខ្ពស់" ។ នៅឆ្នាំ២០២៥ អតិផរណាអាចត្រជាក់ចុះមកត្រឹម៤.៥-៥% និងធ្លាក់ចុះដល់៤% នៅឆ្នាំ២០២៦។អ្នកបង្កើតគោលនយោបាយរុស្ស៊ីបាននិយាយនៅក្នុងសេចក្តីថ្លែងការណ៍មួយថា"ការព្យាករណ៍អតិផរណានៅតែបន្តកើនឡើង។កំណើនតម្រូវការក្នុងស្រុកគឺលើសពីការពង្រីកការផ្គត់ផ្គង់ទំនិញនិងសេវាកម្ម" ។ធនាគារកណ្តាលនៃប្រទេសរុស្ស៊ីបានសង្កត់ធ្ងន់បន្ថែមទៀតថាការរឹតបន្តឹងបន្ថែមទៀតនៃគោលនយោបាយរូបិយវត្ថុគឺចាំបាច់ដើម្បីធានាឱ្យអតិផរណាវិលត្រឡប់ទៅគោលដៅវិញ។ ធនាគារ​បាន​កត់​សម្គាល់​ថាខ្លួន​អាច​នឹង​បន្ត​ដំឡើង​អត្រា​ការ​ប្រាក់​នៅ​ក្នុង​កិច្ច​ប្រជុំ​បន្ទាប់​របស់​ខ្លួន​នៅ​ថ្ងៃ​ទី៦ ខែ​វិច្ឆិកា។រុស្ស៊ី​បាន​ដំឡើង​អត្រាការប្រាក់​ក្នុង​បរិបទ​នៃ​សេដ្ឋកិច្ច​ជាច្រើន​ជុំវិញ​ពិភពលោក ពី​អាមេរិក​ដល់​អឺរ៉ុប ដោយ​បន្ធូរបន្ថយ​គោលនយោបាយ​រូបិយវត្ថុ។នេះធ្វើឱ្យមានការព្រួយបារម្ភអំពីសក្តានុពលកំណើននៅទីនេះ។នៅក្នុងរបាយការណ៍ទស្សនវិស័យសេដ្ឋកិច្ចពិភពលោកដែលបានចេញផ្សាយនៅសប្តាហ៍នេះ មូលនិធិរូបិយវត្ថុអន្តរជាតិ (IMF) បានព្យាករណ៍ថា អតិផរណារុស្ស៊ីនៅឆ្នាំនេះនឹងជាមធ្យម៧.៩% ។ កំណើន GDP អាចមាន ៣.៦%និងធ្លាក់ចុះមក១.៣%នៅឆ្នាំក្រោយដោយសារការធ្លាក់ចុះនៃការវិនិយោគ និងការប្រើប្រាស់ ចំពេលទីផ្សារការងារមានការរឹតបន្តឹង និងកំណើនប្រាក់ឈ្នួលទាប៕ពុតសាម៉ាត់ប្រភពReuters, CNBC, AP