នៅថ្ងៃទី២៩ ខែតុលាឆ្នាំនេះ ជាខួប២០ឆ្នាំព្រះមហាក្សត្រ នរោត្តម សីហមុនីឡើងគ្រងរាជសម្បត្តិ។រដ្ឋាភិបាលបានប្រកាសប្រារព្ធរាជពិធីបុណ្យអបអរសាទរក្នុងទ្រង់ទ្រាយធំជាងរាល់ឆ្នាំនៅទូទាំងប្រទេសរយៈពេល៣ថ្ងៃ គឺចាប់ពីថ្ងៃទី២៨ ដល់ថ្ងៃទី៣០ ខែតុលា។
 |
|
ព្រះមហាក្សត្រ នរោត្ដម សីហមុនី ត្រូវក្រុមប្រឹក្សារាជសម្បតិ្តបោះឆ្នោតជ្រើសរើសជាឯកច្ឆន្ទ ជាព្រះមហាក្សត្រនៅថ្ងៃទី១៤ ខែតុលា ឆ្នាំ២០០៤ ហើយសម្រេចយកថ្ងៃទី២៩ ខែតុលា ជាទិវាប្រវត្តិសាស្ត្រនៃការគ្រងរាជសម្បត្តិរបស់ព្រះអង្គ។តាមប្រទិតិនប្រចាំឆ្នាំ២០២៤ រដ្ឋាភិបាលអនុញ្ញាតមន្ត្រីរាជការ បុគ្គលិក កម្មករ និយោជិត សិស្សានុសិស្សទូទាំងប្រទេសឈប់សម្រាកមួយថ្ងៃដើម្បីចូលរួមអបអរព្រះរាជពិធីបុណ្យខួប២០ឆ្នាំព្រះមហាក្សត្រឡើងគ្រងរាជសម្បត្តិនៅថ្ងៃទី២៩ ខែតុលា។គណៈកម្មាធិការជាតិរៀបចំបុណ្យជាតិ-អន្តរជាតិបានប្រកាសពីថ្ងៃសៅរ៍ថា ឆ្នាំនេះរដ្ឋាភិបាលនឹងរៀបចំព្រះរាជពិធីបណ្យខួប២០ឆ្នាំនៃការគ្រងរាជសម្បត្តិថ្វាយព្រះអង្គក្នុងទ្រង់ទ្រាយធំជាងរាល់ឆ្នាំតាមប្រពៃណីទំនៀមទម្លាប់ជាតិនិងប្រពៃណីសាសនា។ព្រះរាជពិធីបុណ្យខួប២០ឆ្នាំនៃការគ្រងរាជសម្បត្តិ ជាថ្ងៃដែលប្រជារាស្ត្រខ្មែរគ្រប់រូបបានសម្ដែងឆន្ទៈនិងមនោសញ្ចេតនាយ៉ាងរូករាយរបស់ខ្លួនចំពោះព្រះមហាក្សត្រដែលសព្វព្រះទ័យគ្រងរាជសម្បត្តិ ដើម្បីមាតុភូមិនិងប្រជារាស្ត្រ។លោក ឈិន កេតនា អនុប្រធានអចិន្ត្រៃយ៍គណៈកម្មាធិការជាតិរៀបចំបុណ្យជាតិ-អន្តរជាតិ បានថ្លែងថា ព្រះរាជពិធីបុណ្យខួប២០ឆ្នាំនៃការគ្រងរាជសម្បត្តិរយៈពេលបីថ្ងៃ គឺមានប្រារព្ធព្រះរាជពិធីសាសនាតាមព្រះរាជប្បវេណីនិងព្រះរាជពីធីថ្វាយព្រះពរនៅព្រះបរមរាជវាំង និងថ្ងៃចុងក្រោយមានពិធីមិទ្ទីញពេលព្រឹកនៅមុខព្រះបរមរាជវាំងក្រោមព្រះរាជាធិបតីរបស់ព្រះមហាក្សត្រ នរោត្តម សីហមុនី។លោកបាននិយាយថា ព្រះរាជពិធីបុណ្យខួបគ្រងរាជសម្បត្តិថ្វាយព្រះមហាក្សត្រឆ្នាំនេះមានការចាត់តាំងអុជកាំជ្រួចរយៈពេល៣យប់នៅម៉ោង៩យប់ ដើម្បីអបអរសាទរព្រះរាជពិធីបុណ្យឱ្យប្រព្រឹត្តទៅក្នុងទម្រង់ជាមហោឡារិកជាងរាល់ឆ្នាំ។ជាមួយគ្នានោះ គណៈកម្មាធិការជាតិរៀបចំបុណ្យជាតិ-អន្តរជាតិណែនាំដល់ក្រសួង ស្ថាប័ន ក្រុមហ៊ុន សហគ្រាស និងគ្រឹះស្ថាននានានៅទូទាំងប្រទេសរៀបចំតាំងព្រះឆាយាល័ក្ខណ៍ព្រះមហាក្សត្រដោយតុបតែងលម្អបំភ្លឺភ្លើងពណ៌ ពាក្យស្លោកថ្វាយព្រះពរ លិខិតថ្វាយព្រះពរ ព្រមទាំងលើកទងជាតិ ទង់សាសនា ទង់ព្រះមហាក្សត្រនៅតាមក្រសួងស្ថាប័នទាំងអស់។លោក វង់ សុធារ៉ា អ្នកជំនាញប្រវត្តិសាស្ត្រខ្មែរ បានមានប្រសាសន៍ថា ព្រះមហាក្សត្រ គឺជាព្រះប្រមុខរដ្ឋដែលមានតួនាទីទទួលខុសត្រូវច្រើនណាស់ចំពោះប្រទេសជាតិ។ ក្នុងនាមជាព្រះមហាក្សត្រ ព្រះអង្គធានារាប់ចាប់ពីបញ្ហាសង្គ្រាម សន្តិភាព លទ្ធិប្រជាធិបតេយ្យ សិទ្ធិមនុស្ស យុត្តិធម៌សង្គម និងអធិបតេយ្យភាពដែនដីជាដើម។លោកបានមានប្រសាសន៍ថា៖ «រឿងធំជាងគេរបស់ព្រះអង្គ គឺធានាការឯកភាពជាតិ ព្រោះព្រះមហាក្សត្រជាឥស្សរជនកំពូលរបស់ជាតិ»។ព្រះរាជសកម្មភាពផ្សេងទៀតរបស់ព្រះមហាក្សត្រដែលលោកកត់សម្គាល់ឃើញក្នុងកិច្ចការមនុស្សធម៌ ការចុះសួរសុខទុក្ខប្រជារាស្ត្រ និងការបរិច្ចាគថវិកាផ្ទាល់របស់ព្រះអង្គក្នុងវិស័យលុបបំបាត់មីនពីកម្ពុជា។លោកបញ្ជាក់ថា៖ «ចំពោះកិច្ចការងារខាងមនុស្សធម៌របស់ព្រះមហាក្សត្របច្ចុប្បន្ន គឺដូចគ្នានឹងតួនាទីរបស់ព្រះមហាក្សត្រពីបុរាណ ដែលយើងតែងតែនិយាយថាព្រះមហាក្សត្រប្រកាន់ខ្ជាប់ទសពិធរាជធម៌ ហើយនៅក្នុងមានទាំងការបរិច្ចាគធនធានផ្ទាល់របស់ព្រះអង្គ»។លោកថា ការប្រទានព្រះរាជអំណោយដែលជាព្រះរាជទ្រព្យបន្តិចបន្តួចរបស់ព្រះមហាក្សត្រ គឺជាព្រះរាជកាយវិកាយដ៏ខ្ពង់ខ្ពស់របស់ព្រះអង្គណាស់ទៅហើយ។ ដ្បិតថាព្រះមហាក្សត្របច្ចុប្បន្នមិនមានព្រះរាជទ្រព្យស្ដុកស្ដម្ភដូចព្រះមហាក្សត្រដទៃនៅលើពិភពលោកទេ ព្រោះមុនការជ្រើសតាំងជាព្រះមហាក្សត្របន្តពីព្រះបិតា ព្រះអង្គក៏ដូចនឹងប្រជារាស្ត្រសាមញ្ញដែលធ្វើការធម្មតាដើម្បីចិញ្ចឹមជីវភាពរបស់ព្រះអង្គដែរ៕Khmer Times
/unnamed.png
Post a Comment