តើនាយក​រដ្ឋមន្ត្រីប្រើយុទ្ធសាស្ត្រអ្វីខ្លះ​ដើ​ម្បីធ្វើឱ្យកម្ពុជាក្លាយ​ជាប្រទេសដែលមា​​នចំណូលខ្ពស់​នៅឆ្នាំ២០៥០?

សម្តេចនាយករដ្ឋមន្ត្រីហ៊ុនម៉ាណែតនៅថ្ងៃច័ន្ទនេះបានលើកឡើងនូវអនុសាសន៍ចំនួន៥ ដើម្បីជំរុញការអភិវឌ្ឍន៍សេដ្ឋកិច្ច និងពាណិជ្ជកម្ម ដើម្បីប្រែក្លាយកម្ពុជាទៅជាប្រទេសដែលមានចំណូលមធ្យមកម្រិតទាបនៅឆ្នាំ២០៣០និងជាប្រទេសមានចំណូលខ្ពស់នៅឆ្នាំ២០៥០។សម្តេចនាយករដ្ឋមន្ត្រីបានសង្កត់ធ្ងន់លើការធ្វើពិពិធកម្មនៃការនាំចេញកសិកម្ម ការពង្រីកលទ្ធភាពទទួលបានទីផ្សារក្រៅប្រទេសការអភិវឌ្ឍន៍ហេដ្ឋារចនាសម្ព័ន្ធតភ្ជាប់ការអនុវត្តបរិវត្តកម្មឌីជីថលនិងការត្រៀមខ្លួនដើម្បីចាកចេញពីស្ថានភាពអភិវឌ្ឍន៍តិចតួចបំផុត (LCD)។ថ្លែងក្នុងឱកាសខួប២០ឆ្នាំ នៃការចូលជាសមាជិកអង្គការពាណិជ្ជកម្មពិភពលោក (WTO) ដែលរៀបចំដោយក្រសួងពាណិជ្ជកម្មសម្តេចហ៊ុន ម៉ាណែត មានប្រសាសន៍ថាកម្ពុជាត្រៀមខ្លួនរួចជាស្រេចក្នុងការចាកចេញពីស្ថានភាពLCDនៅឆ្នាំ២០២៩។ក្នុងសុន្ទរកថាដែលមានរយៈពេលមួយម៉ោង សម្តេចហ៊ុនម៉ាណែតបានពន្យល់ពីចំណុចសំខាន់នៃយុទ្ធសាស្ត្រទាំង៥ក្នុងការកសាងប្រទេសកម្ពុជាឡើងវិញទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០និងជាប្រទេសដែលមានចំណូលខ្ពស់នៅឆ្នាំ២០៥០។ គោលបំណងទី១គឺជំរុញការអភិវឌ្ឍន៍វិស័យអាទិភាព ខណៈកំណត់ប្រភពថ្មីនៃកំណើនសេដ្ឋកិច្ចសំដៅធ្វើពិពិធកម្មការនាំចេញលើសពីផលិតផលកាត់ដេរនិងអង្ករ។សម្តេចនាយករដ្ឋមន្ត្រីបានមានប្រសាសន៍ថា “នេះរួមបញ្ចូលទាំងការលើកកម្ពស់ផលិតផលធ្វើដំណើរ គ្រឿងអេឡិចត្រូនិក បន្ទះស្រូបពន្លឺព្រះអាទិត្យ កង់ និងផលិតផលកសិកម្មផ្សេងៗ រួមទាំងកៅស៊ូ គ្រាប់ស្វាយចន្ទី ចេក និងស្វាយ”។រាជរដ្ឋាភិបាលកម្ពុជានឹងបន្តផ្តល់ការលើកទឹកចិត្តផ្នែកពន្ធជូនអ្នកផលិតក្នុងស្រុក និងអ្នកនាំចេញអង្ករ ពោត សណ្ដែក ម្រេច ដំឡូងមី គ្រាប់ស្វាយចន្ទី កៅស៊ូ ស្វាយ វារីវប្បកម្ម បសុសត្វ និងផលិតផលប្រេងដូង។សម្តេចហ៊ុន ម៉ាណែត បានគូសបញ្ជាក់ថា គំនិតផ្តួចផ្តើមនេះធ្វើឡើងក្នុងគោលបំណងជំរុញការប្រើប្រាស់ទំនិញក្នុងស្រុក និងជំរុញការនាំចេញកសិផល ដែលបន្ថែមតម្លៃបន្ថែមទៀត ដើម្បីជាប្រយោជន៍ដល់កសិករក្នុងស្រុកនិងអ្នកវិនិយោគក្នុងវិស័យឧស្សាហកម្ម។យោងតាមនាយករដ្ឋមន្ត្រីការផ្តោតសំខាន់ទីពីរនឹងផ្តោតលើការអនុវត្តវិធីសាស្រ្ត ‘ការពង្រឹងទីផ្សារបច្ចុប្បន្ន និងពង្រីកទីផ្សារថ្មី’ ខណៈដែលរាជរដ្ឋាភិបាលកម្ពុជា កំពុងជំរុញយ៉ាងសកម្មនូវការអនុវត្ត និងប្រើប្រាស់កិច្ចព្រមព្រៀងពាណិជ្ជកម្មសេរីទ្វេភាគី ពហុភាគី និងតំបន់ ដែលមានស្រាប់ រួមទាំង ជាមួយប្រទេសចិន កូរ៉េ អេមីរ៉ាតអារ៉ាប់រួម និងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)។

រូបសហការី

«លើសពីនេះ រាជរដ្ឋាភិបាលបានដាក់ចេញនូវគោលការណ៍ណែនាំ ដើម្បីសម្រួលដល់ការចូលទៅកាន់ទីផ្សារក្រៅប្រទេស និងដៃគូពាណិជ្ជកម្មដែលមានសក្តានុពលថ្មីៗ ដោយជំរុញការបង្កើត FTA ថ្មីដើម្បីពង្រីកទីផ្សារនាំចេញ»។គោលបំណងទី៣គឺទាក់ទាញការវិនិយោគផ្ទាល់ពីបរទេស (FDI) បន្ថែមទៀតទៅក្នុងវិស័យអាទិភាព និងឧស្សាហកម្មបៃតង ព្រមទាំងជំរុញការអភិវឌ្ឍន៍សហគ្រាសខ្នាតមីក្រូ តូច និងមធ្យម (MSMEs) តាមរយៈការពង្រឹងឧស្សាហកម្មកសិ-កែច្នៃ និងលទ្ធភាពទទួលបានបច្ចេកវិទ្យា ការស្រាវជ្រាវ និងការអភិវឌ្ឍន៍។សម្តេចនាយករដ្ឋមន្ត្រីបានមានប្រសាសន៍ថារដ្ឋាភិបាលកំពុងសាងសង់ហេដ្ឋារចនាសម្ព័ន្ធតភ្ជាប់គ្នា ដើម្បីសម្រួលដល់ពាណិជ្ជកម្ម និងសេដ្ឋកិច្ចទាំងមូល។“តាមពិតទៅយើងបានដាក់ឱ្យដំណើរការជាផ្លូវការនូវកំពង់ផែពហុបំណងកំពតនិងចាប់ផ្តើមសាងសង់ព្រែកជីកហ្វូណនតេជោ ដែលនឹងកាត់បន្ថយពេលវេលាដឹកជញ្ជូន ចម្ងាយ និងថ្លៃដើម។ រដ្ឋាភិបាលមានគោលបំណងបង្កើតតំបន់ពាណិជ្ជកម្ម និងមជ្ឈមណ្ឌលភស្តុភារ ទន្ទឹមនឹងការអភិវឌ្ឍកំពង់ផែរណបថ្មីៗជាច្រើន”។“ទី៤៖ ដើម្បីអនុវត្តឱ្យបានសកម្មនូវបរិវត្តកម្មឌីជីថល អាជីវកម្ម និងគោលនយោបាយពាណិជ្ជកម្មតាមប្រព័ន្ធអេឡិចត្រូនិក ដោយលើកទឹកចិត្តដល់វិស័យឯកជននិងក្រុមហ៊ុននានាក្នុងការបង្កើតមជ្ឈមណ្ឌលបច្ចេកវិជ្ជាសម្រាប់លក់ផលិតផលក្នុងស្រុក ក៏ដូចជាឆ្លងកាត់ព្រំដែន”។សម្តេចនាយរដ្ឋមន្ត្រីបានបន្តថា រាជរដ្ឋាភិបាលកំពុងជំរុញការប្រើប្រាស់ប្រព័ន្ធស្វ័យប្រវត្តិកម្ម និងថ្នាលបច្ចេកវិទ្យា ដើម្បីសម្រួលនីតិវិធី កាត់បន្ថយពេលវេលា និងការចំណាយលើការដឹកជញ្ជូនទាប ដែលធ្វើឲ្យបរិយាកាសធុរកិច្ច និងសកម្មភាពពាណិជ្ជកម្មនៅទូទាំងប្រទេសប្រសើរឡើង ដើម្បីបង្កើនគុណភាព តម្លាភាព និងប្រសិទ្ធភាពនៃសេវាសាធារណៈ។ជាចុងក្រោយ រដ្ឋាភិបាលកំពុងបង្កើតយុទ្ធសាស្ត្រ ដើម្បីជួយសម្រួលដល់ការចាកចេញដោយរលូនពីស្ថានភាពប្រទេសអភិវឌ្ឍន៍តិចតួច(LDC)ដើម្បីកាត់បន្ថយផលប៉ះពាល់អវិជ្ជមាននៃការបាត់បង់ការអនុគ្រោះពាណិជ្ជកម្ម និងវិធានអន្តរជាតិ ខណៈធានាបាននូវការអភិវឌ្ឍន៍ប្រកបដោយចីរភាពបន្ទាប់ពីចាកចេញនៅឆ្នាំ២០២៩។ថ្លែងប្រាប់កាសែតខ្មែរថាមស៍ លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន (CCCA) បានលើកឡើងថា ព្រះរាជាណាចក្រកម្ពុជាបានពឹងផ្អែកយ៉ាងខ្លាំងលើការនាំចេញសម្លៀកបំពាក់អស់រយៈពេល ៣០ ឆ្នាំកន្លងមកនេះ ក្នុងការជំរុញសេដ្ឋកិច្ចជាតិ។“គំនិតផ្តួចផ្តើមពីលោកនាយករដ្ឋមន្ត្រីដើម្បីធ្វើពិពិធកម្មផលិតផលនាំចេញគឺជាយុទ្ធសាស្ត្រទាន់ពេលវេលាខណៈដែលកម្ពុជាកំពុងរៀបចំចាកចេញពីស្ថានភាពLDCក្នុងគោលបំណងធ្វើឱ្យប្រសើរឡើងនូវភាពធន់ផ្នែកសេដ្ឋកិច្ចនិងការសម្របខ្លួន” ។លោក វិចិត្រ បានបន្ថែមថា “ការផ្តល់ការលើកទឹកចិត្តផ្នែកពន្ធដ៏គួរឱ្យទាក់ទាញនឹងធ្វើឱ្យកម្ពុជាក្លាយជាគោលដៅវិនិយោគដ៏អំណោយផលចំពេលមានភាពតានតឹងផ្នែកភូមិសាស្ត្រនយោបាយ និងភាពមិនច្បាស់លាស់ក្នុងចំណោមមហាអំណាចធំៗ”។អនុប្រធានសមាគមពាណិជ្ជកម្មកម្ពុជា-ចិន ក៏បានបន្ថែមថា “ការវិនិយោគប្រកបដោយភាពឈ្លៀសវៃក្នុងវិស័យហេដ្ឋារចនាសម្ព័ន្ធជាអាទិភាពនឹងធ្វើឱ្យវិស័យភស្តុភារកម្មមានការប្រកួតប្រជែងតម្លៃកាន់តែច្រើន ខណៈពេលដែលការចាប់ផ្តើមបរិវត្តកម្មឌីជីថលនឹងធ្វើឱ្យកម្ពុជាតាមទាន់នឹងទិដ្ឋភាពពាណិជ្ជកម្មដែលមានការប្រែប្រួល និងស្មុគស្មាញ ដែលជំរុញឱ្យមានកំណើននាពេលអនាគតនៅក្នុងសេដ្ឋកិច្ចពិភពលោក”៕Khmer Times