ព្រះមហាក្សត្រនរោត្តម សីហមុនី បានចេញព្រះរាជក្រឹត្យតែងតាំងលោក គុយ សុផល ជាឧបនាយករដ្ឋមន្ត្រីនិងជារដ្ឋមន្ត្រីក្រសួងព្រះបរមរាជវាំងជំនួសពីលោក គង់ សំអុល ដែលបានទទួលមរណភាពពីម្សិលមិញ។
 |
| សហការី |
តាមព្រះរាជក្រឹត្យពីម្សិលមិញបានបញ្ជាក់ថាការតែងតាំងនេះធ្វើឡើងតាមសេចក្ដីស្នើបង្គំថ្វាយរបស់សម្តេចហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ។ ជាមួយគ្នានោះព្រះមហាក្សត្រក៏បានប្រោសព្រះរាជទានគោរមងារ “សម្ដេចមហាមន្ត្រី” ដល់លោក គុយ សុផល ផងដែរ។ការតែងតាំងនិងប្រោសព្រះរាជទានគោរមងារនេះ បន្ទាប់ពីលោកឧបនាយករដ្ឋមន្ត្រីនិងរដ្ឋមន្ត្រីក្រសួងព្រះបរមរាជវាំង គង់ សំអុល បានទទួលមរណភាពក្នុងអាយុ៩៤ឆ្នាំដោយសារជរាពាធនៅថ្ងៃទី២ ខែកញ្ញា។ក្រសួងព្រះបរមរាជវាំងបានជូនដំណឹងពីម្សិលមិញថា សពរបស់លោកបានតម្កល់ធ្វើបុណ្យតាមប្រពៃណីសាសនានៅគេហដ្ឋានស្ថិតក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ។តាមក្រសួងព្រះបរមរាជវាំង លោក គង់ សំអុល មានគោរមងារជា “សម្តេចចៅហ្វាវាំង វររៀងជ័យ អធិបតីស្រឹង្គារ អធិបតីស្រឹង្គារ” និងមានតួនាទីជាសមាជិករដ្ឋសភា ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ប្រធានគណៈកម្មាធិការជាតិរៀបចំបុណ្យជាតិ-អន្តរជាតិ និងជាអនុប្រធានកាកបាទក្រហមកម្ពុជា។លោក ឡាច សុភាព រដ្ឋលេខាធិការក្រសួងព្រះបរមរាជវាំងបានបញ្ជាក់ថា ពិធីបូជាសពលោក គង់ សំអុល នឹងរៀបចំធ្វើនៅវត្តជម្ពូវ័នស្ថិតនៅសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ នៅថ្ងៃទី៦ ខែកញ្ញា។លោក គង់ សំអុល ជាអ្នកនយោបាយខ្មែរមួយរូបដែលបានកាន់តំណែងជារដ្ឋមន្ត្រីព្រះបរមរាជវាំងពីឆ្នាំ១៩៩៨ រហូតដល់ឆ្នាំ២០២៤ ។ លោកធ្លាប់ធ្វើជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទពីឆ្នាំ១៩៨៦ ដល់ឆ្នាំ១៩៨៩។ លោកជាសមាជិកគណបក្សប្រជាជនកម្ពុជា ហើយបានជាប់ឆ្នោតជាតំណាងរាស្ត្រខេត្តកំពង់ឆ្នាំងក្នុងឆ្នាំ២០០៣ ។ជាមួយនឹងគ្នានេះ សម្តេច ហ៊ុន សែន ប្រធានព្រឹទ្ធសភា លោកស្រី ឃួន សុដារី ប្រធានរដ្ឋសភា និងសម្តេចនាយករដ្ឋមន្ត្រី ហ៊ុន ម៉ាណែត ព្រមទាំងក្រសួងស្ថាប័នជាតិបានផ្ញើសារចូលរួមរំលែកមរណទុក្ខជាមួយគ្រួសារសពដោយអាឡោះអាល័យ។សារចូលរួមរំលែកមរណទុក្ខរបស់សម្តេចហ៊ុន សែន បានសម្ដែងសេចក្ដីតក់ស្លុតនិងរន្ធចិត្តជាខ្លាំងពេលបានទទួលដំណឹងថា លោកឧបនាយករដ្ឋនិងរដ្ឋមន្ត្រីក្រសួងព្រះបរមរាជវាំង គង់ សំអុល បានទទួលមរណភាព។លោកបានសម្ដែងការសោកស្ដាយប្រកបដោយក្ដីសង្វេគចំពោះមរណភាពរបស់លោក គង់ សំអុល ដែលជាបុគ្គលមានព្រហ្មវិហារធម៌ចំពោះគ្រួសារ ដែលកន្លងមកលោកបានចិញ្ចឹមបីបាច់កូនចៅបានក្លាយជាបញ្ញវន្តនិងធនធានមនុស្សដ៏មានតម្លៃសម្រាប់សង្គមជាតិ។សម្តេចបន្ថែមថា៖ «មរណភាពរបស់ចៅហ្វាវាំងជាការបាត់បង់ឥស្សរជននិងថ្នាក់ដឹកនាំគំរូដ៏ឆ្នើមមួយរូបដែលប្រកបដោយបញ្ញាញាណ ឆន្ទៈ មនសិការជាតិ គតិបណ្ឌិត និងបទពិសោធខ្ពស់ ដែលក្នុងមួយជីវិតសម្ដេចបានពុះពារបានតស៊ូពុះពារគ្រប់ឧបសគ្គ ដើម្បីជាតិ និងប្រជាជន ពិសេសក្នុងការបម្រើជាតិ សាសនា ព្រះមហាក្សត្រ»។សម្តេចបន្ថែមថា លោកតែងតែដង្ហែតាមព្រះមហាក្សត្រនិងសម្ដេចម៉ែបានទទួលជោគជ័យជាច្រើនលើកិច្ចការជាតិនិងអន្តរជាតិ ដើម្បីជាប្រយោជន៍សម្រាប់ប្រទេសជាតិ ប្រជាជន និងបានចូលរួមចំណែកយ៉ាងធំធេងនិងយ៉ាងសកម្មក្នុងកិច្ចការមនុស្សធម៌តាមរយៈការបំពេញបេសកកម្មជាមួយកាកបាទក្រហមកម្ពុជា។សម្តេចនាយករដ្ឋមន្ត្រី ហ៊ុន ម៉ាណែត បានសម្ដែងសេចក្ដីក្ដុកក្ដួលនិងសោកស្ដាយឥតឧបមាពេលបានទទួលដំណឹងថា លោក គង់ សំអុល ឧបនាយករដ្ឋនិងរដ្ឋមន្ត្រីក្រសួងព្រះបរមរាជវាំងបានទទួលមរណភាព។សម្តេចបាននិយាយថា មរណភាពរបស់លោក គង់ សំអុល មិនត្រឹមតែជាការបាត់បង់ស្វាមីចំពោះភរិយានិងចំពោះកូនចៅប៉ុណ្ណោះទេ តែជាការបាត់បង់ឥស្សរជនកម្ពុជាដ៏ឆ្នើមមួយរូបដែលគួរគោរពស្ញប់ស្ញែងជាទីបំផុត។សម្តេចបន្ថែមថា តាំងពីដើមរៀងមក លោកតែងបានបូជាកម្លាំងកាយ កម្លាំងប្រាជ្ញាស្មារតី និងធ្វើពលីកម្មគ្រប់បែបយ៉ាង ដើម្បីបន្តធានាការពារឯករាជ្យជាតិ អធិបតេយ្យជាតិ និងបូរណភាពទឹកដី។សម្តេចបន្ថែមថា៖ «ការពារដាច់ខាតនូវរាជបល្ល័ង្កនិងរបបរាជានិយមអាស្រ័យរដ្ឋធម្មនុញ្ញនៅកម្ពុជាក្នុងបុព្វហេតុជាតិ សាសនា ព្រះមហាក្សត្រ និងលើកស្ទួយកិត្តិយសកិត្យានុភាពនៃព្រះរាជាណាចក្រកម្ពុជានៅលើឆាកអន្តរជាតិ»៕Khmer Times
/unnamed.png
Post a Comment