ព្រះមហាក្សត្រ នរោត្តម សីហមុនី និងសម្ដេចម៉ែបានប្រោសប្រទាន ៦០០០០ដុល្លារដល់មូលនិធិកសាងហេដ្ឋារចនាសម្ពន្ធតាមព្រំដែនដោយផ្ដោតលើការកសាងផ្លូវក្រវាត់ព្រំដែន។អ្នកជំនាញយល់ឃើញថា ព្រះរាជទាននេះមានតម្លៃធំធេងសម្រាប់ជានិមិត្តរូបជាតិនិងបញ្ជាក់ថា រដ្ឋាភិបាលសម្រេចចិត្តបង្កើតមូលនិធិនេះគឺត្រឹមត្រូវ។
 |
| សហការី |
រដ្ឋាភិបាលបានប្រកាសបង្កើតមូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែននៅថ្ងៃទី២២ ខែសីហាដើម្បីផ្ដល់ឱកាសសម្រាប់ពលរដ្ឋខ្មែរគ្រប់មជ្ឈដ្ឋានទាំងក្នុងនិងក្រៅប្រទេសចូលរួមគាំទ្រក្នុងគោលបំណងស្មារតីពង្រឹងនិងអភិវឌ្ឍតំបន់ព្រំដែនដែលផ្ដោតសំខាន់លើការកសាងផ្លូវក្រវាត់ព្រំដែនជាមួយរដ្ឋាភិបាល។ការបង្កើតមូលនិធិនេះ ក៏ជាការឆ្លើយតបនឹងកង្វល់របស់ប្រជាពលរដ្ឋពាក់ព័ន្ធនឹងកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA) ដែលពួកគេសម្ដែងការព្រួយបារម្ភខ្លាចបាត់បង់ទឹកដី៤ខេត្តនៅភាគឦសាន្តទៅប្រទេសវៀតណាម។ក្រោយពីរដ្ឋាភិបាលប្រកាសទទួលការបរិច្ចាគថវិកាចូលរួមក្នុងមូលនិធិកសាងហេដ្ឋារចនាសម្ព័ន្ធតាមព្រំដែនជាផ្លូវការកាលសប្ដាហ៍មុន គេកត់សង្កេតឃើញសម្ទុះពលរដ្ឋគ្រប់មជ្ឈដ្ឋាន អ្នកមានងារជាឧកញ៉ានិងមន្ត្រីជាន់ខ្ពស់រដ្ឋាភិបាលបានបរិច្ចាគចូលរួមក្នុងមូលនិធិជាបន្តបន្ទាប់។សម្តេចនាយករដ្ឋមន្ត្រី ហ៊ុន ម៉ាណែត កាលពីថ្ងៃសុក្របានក្រាបបង្គំទូលថ្វាយលិខិតថ្លែងអំណរព្រះរាជគុណដល់ព្រះមហាក្សត្រ នរោត្តម សីហមុនី ដែលសព្វព្រះរាជហទ័យប្រោសប្រទានថវិកាព្រះអង្គផ្ទាល់ចំនួន ៣០០០០ដុល្លារនិងសម្ដេចម៉ែចំនួន៣០០០០ដុល្លារដល់មូលនិធិកសាងហេដ្ឋារចនាសម្ពន្ធតាមបណ្តោយព្រំដែន ដោយផ្តោតលើការកសាងផ្លូវក្រវាត់ព្រំដែន។លោក យង់ ពៅ អគ្គលេខាធិការរាជបណ្ឌិត្យសភាកម្ពុជាបានប្រាប់ខ្មែរថាមស៍ពីម្សិលមិញថា ព្រះមហាក្សត្រព្រះប្រមុខរដ្ឋការពារដោយរដ្ឋធម្មនុញ្ញ។ ដូច្នេះការណ៍ដែលព្រះមហាក្សត្រនិងសម្ដេចម៉ែសព្វព្រះរាជហទ័យប្រោសប្រទានថវិកាចូលរួមក្នុងនិធិកសាងហេដ្ឋារចនាសម្ពន្ធតាមព្រំដែន គឺមិនមែនការលម្អៀងក្នុងផ្នែកនយោបាយណាមួយឡើយ។លោកបាននិយាយថា៖ «ព្រះអង្គតែងតែបំពេញព្រះរាជកិច្ចក្នុងឋានៈជាព្រះមហាក្សត្រសម្រាប់ប្រជានុរាស្ត្រគ្រប់គ្នា។ ដូច្នេះព្រះរាជទាននេះមានតម្លៃធំធេងសម្រាប់ជានិមិត្តរូបជាតិ ហើយបានបញ្ជាក់ថា រដ្ឋាភិបាលបង្កើតមូលនិធិនេះឡើងពិតជាត្រឹមត្រូវ ដើម្បីកសាង ការពារជាតិមាតុភូមិរបស់កម្ពុជា និងការអភិវឌ្ឍនៅតំបន់ព្រំដែន»។លោកថា ការកសាងហេដ្ឋារចនាសម្ពន្ធតាម បណ្ដោយព្រំដែនពិតជាសំខាន់ខ្លាំង។ជាពិសេសការកសាងផ្លូវក្រវាត់ព្រំដែន ព្រោះកាលដែលលោកចុះស្រាវជ្រាវតាមព្រំដែនកន្លងមក គឺមានការពិបាកជាខ្លាំងដោយសារតែទីនោះមិនទាន់មានផ្លូវត្រឹមត្រូវសម្រាប់ធ្វើដំណើរ សម្រាប់ចល័តកម្លាំងយុទ្ធសាស្ត្រ និងសម្រាប់ដឹកជញ្ជូនកសិផលរបស់ប្រជាជនជាដើម។ ដូច្នេះលោកគាំទ្ររដ្ឋាភិបាលកសាងផ្លូវក្រវាត់តាមព្រំដែន។រដ្ឋធម្មនុញ្ញដែលជាច្បាប់កំពូលរបស់ជាតិបានចែងថា ព្រះមហាក្សត្រកម្ពុជាទ្រង់គ្រងរាជសម្បត្តិ តែមិនកាន់អំណាចឡើយ។ ព្រះអង្គជាព្រះប្រមុខរដ្ឋពេញមួយជីវិត ហើយជានិមិត្តរូបនៃឯកភាពជាតិនិងនិរន្តរភាពជាតិ។រដ្ឋធម្មនុញ្ញបានចែងបន្ថែមថា ព្រះមហាក្សត្រជាអ្នកធានាឯករាជ្យជាតិ អធិបតេយ្យ និងបូរណភាពទឹកដីនៃព្រះរាជាណាចក្រកម្ពុជា។ ទ្រង់ជាអ្នកធានាការគោរពសិទ្ធិនិងសេរីភាពរបស់ប្រជាពលរដ្ឋនិងការគោរពសន្ធិសញ្ញាអន្តរជាតិ។លោក ប៉ែន បូណា អ្នកនាំពាក្យរដ្ឋាភិបាលបានបញ្ជាក់ថា លោកមិនទាន់អាចផ្ដល់ចំនួនថវិកាដែលពលរដ្ឋគ្រប់មជ្ឈដ្ឋានបានបរិច្ចាគចូលរួមក្នុងមូលនិធិនៅឡើយទេ ព្រោះពេលនេះពលរដ្ឋកំពុងបរិច្ចាគជាបន្ដបន្ទាប់។លោកនិយាយថា៖ «អាចមួយសប្ដាហ៍ឬមួយខែនឹងបូកសរុបចំនួនថវិកាទាំងនេះម្ដង»៕KhmerTimes
/unnamed.png
Post a Comment