អង់គ្លេស​បា​រាំងនិង​អាល្លឺម៉ង់​បាន​​ព្រមាន​អ៊ីរ៉ង់ហើយ​​ហេសបូឡា​បាន​ប្រកា​ស​បំផ្លាញ​ឧប​ក​រណ៍​ចារ​​កម្ម​អ៊ីស្រា​អែល

អង់គ្លេសបារាំង និងអាល្លឺម៉ង់ទើបតែបានចេញសេចក្តីថ្លែងការណ៍រួមមួយ ដោយព្រមានអ៊ីរ៉ង់ឱ្យទទួលខុសត្រូវទាំងស្រុងចំពោះការគំរាមកំហែងសន្តិភាពនៅមជ្ឈិមបូព៌ា។ប្រសិនបើខ្លួនវាយប្រហារអ៊ីស្រាអែល។នៅក្នុងសេចក្តីថ្លែងការណ៍របស់ពួកគេកាលពីថ្ងៃទី១១ខែសីហាមហាអំណាចទាំង៣បានសម្តែងការព្រួយបារម្ភយ៉ាងខ្លាំងអំពីការកើនឡើងនៃភាពតានតឹងនៅក្នុងតំបន់ ហើយបានសន្យាថានឹងគាំទ្រដល់ការបន្ថយការកើនឡើង និងស្ថិរភាពក្នុងតំបន់។កាសែត The Times of Israel បានដកស្រង់សេចក្តីថ្លែងការណ៍រួមរបស់អង់គ្លេសបារាំង និងអាល្លឺម៉ង់ ដោយសង្កត់ធ្ងន់ថា៖«ក្នុងបរិបទនេះ យើងសូមអំពាវនាវដល់អ៊ីរ៉ង់ និងសម្ព័ន្ធមិត្តរបស់ខ្លួនជៀសវាងការវាយប្រហារដែលអាចបង្កើនភាពតានតឹងក្នុងតំបន់និងបង្កគ្រោះថ្នាក់ដល់ឱកាសនៃការយល់ព្រមលើបទឈប់បាញ់ និងដោះលែងចំណាប់ខ្មាំង។ប្រសិន​បើ​ខ្លួន​ធ្វើ​សកម្មភាព អ៊ីរ៉ង់​នឹង​ទទួល​ខុស​ត្រូវ​ចំពោះ​សកម្មភាព​ដែល​បង្ក​គ្រោះថ្នាក់​ដល់​ឱកាស​សន្តិភាព និង​ស្ថិរភាព»។សេចក្តីថ្លែងការណ៍បានសន្និដ្ឋានថាគ្មានប្រទេស ឬប្រជាជនណាមួយអាចទទួលបានអត្ថប្រយោជន៍ពីការកើនឡើងបន្ថែមទៀតនៃភាពតានតឹងនៅមជ្ឈិមបូព៌ានោះទេ។

ហេសបូឡាបានប្រកាសពីការបំផ្លាញឧបករណ៍ចារកម្មរបស់អ៊ីស្រាអែល

យោងតាមទីភ្នាក់ងារសារព័ត៌មានAljazeeraនៅក្នុងសារថ្មីមួយដែលបានបង្ហោះនៅលើបណ្តាញTelegram ក្រុមប្រដាប់អាវុធដែលគាំទ្រដោយអ៊ីរ៉ង់ ហេសបូឡានៅក្នុងប្រទេសលីបង់បានប្រកាសថាខ្លួនបានកំណត់គោលដៅឧបករណ៍ឃ្លាំមើលនៅឯមូលដ្ឋានយោធាអ៊ីស្រាអែលនៅជិតទីក្រុង Metula ភាគខាងជើង។ក្រុមហេសបូឡា បាននិយាយថា ការវាយប្រហារបានកើតឡើងនៅម៉ោង៨និង៤០ នាទីព្រឹក ម៉ោងក្នុងស្រុក (ម៉ោង១២និង៥០នាទីយប់ ម៉ោងនៅប្រទេសកម្ពុជា) នៅថ្ងៃទី ១២ ខែសីហា ហើយក្រុមនេះបានបំផ្លាញគោលដៅដោយជោគជ័យ។មន្ត្រី​អ៊ីស្រាអែល​មិន​ទាន់​ធ្វើ​អត្ថាធិប្បាយ​ជុំវិញ​ព័ត៌មាន​ខាង​លើ​នេះ​នៅ​ឡើយ​ទេ។ទោះបីជាយ៉ាងណាក៏ដោយ កងកម្លាំងការពារអ៊ីស្រាអែល (IDF) ធ្លាប់បានរាយការណ៍ថាមីស៊ីលចំនួន៣០ត្រូវបានបាញ់ចេញពីប្រទេសលីបង់ ឆ្ពោះទៅភាគខាងជើងនៃប្រទេសពេញមួយយប់។ គ្រាប់មីស៊ីលជាច្រើន​គ្រាប់​នោះ​បាន​ធ្លាក់​ក្នុង​តំបន់​ហើយ​មិន​បណ្តាល​ឲ្យ​មាន​អ្នក​រង​របួស​ឡើយ។ ក្រុមហេសបូឡាបានអះអាងទទួលខុសត្រូវចំពោះការបាញ់មីស៊ីលជាបន្តបន្ទាប់ហើយបានបង្ហើបថាគោលដៅនៃការវាយឆ្មក់នោះគឺជាមូលដ្ឋានយោធារបស់អ៊ីស្រាអែល។ការអភិវឌ្ឍន៍នេះបានកើតឡើងចំពេលមានការព្រួយបារម្ភអំពីហានិភ័យដែលអ៊ីរ៉ង់និងក្រុមប្រដាប់អាវុធគាំទ្រក្រុងតេអេរ៉ង់អាចវាយប្រហារអ៊ីស្រាអែល ដែលនាំឱ្យមានជម្លោះដ៏ធំនៅក្នុងតំបន់។ ទីក្រុង Tel Aviv បាន​បង្ហើប​ថាខ្លួន​បាន​ត្រៀម​ខ្លួន​ជា​ស្រេច​សម្រាប់​ហានិភ័យ​នៃ​ការ​វាយប្រហារ​ដោយ​កងកម្លាំង​អ៊ីរ៉ង់។អាមេរិក​បាន​សន្យា​ការពារ​អ៊ីស្រាអែល ហើយ​បាន​បញ្ជូន​នាវាចម្បាំងនិង​នាវាមុជទឹក​បន្ថែមទៀត​ទៅកាន់​តំបន់​នោះ៕