ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាសម្តេចហ៊ុន ម៉ាណែត នាយករដ្ឋមន្រ្តី សម្តេចហ៊ុន សែន ប្រធានព្រឹទ្ធសភា និង លោកស្រី ឃួន សុដារី ប្រធានរដ្ឋសភា បានចូលរួមរំលែកទុក្ខចំពោះមរណភាពរបស់ លោក ង្វៀន ហ្វូជុង (Nguyen Phu Trong) អគ្គលេខានៃគណៈកម្មាធិការមជ្ឈិមបក្សកុម្មុយនីស្តវៀតណាម។
 |
| លោក ង្វៀន ហ្វូជុង (Nguyen Phu Trong) អគ្គលេខានៃគណៈកម្មាធិការមជ្ឈិមបក្សកុម្មុយនីស្តវៀតណាម។ |
នៅក្នុងព្រះរាជសាររំលែកមរណទុក្ខរបស់ ព្រះករុណា ព្រះមហាក្សត្រ សីហមុនី មានខ្លឹមសារថា “ខ្ញុំសូមសម្តែងនូវការសោកស្តាយដ៏ជ្រាលជ្រៅជាទីបំផុតចំពោះមរណភាពនៃឯកឧត្តមរបស់លោក ង្វៀន ហ្វ៊ូជុងដែលជាការបាត់បង់ថ្នាក់ដឹកនាំដ៏ឆ្នើមនិងល្អប្រពៃមួយរូបនៃប្រជាជាតិ និងប្រជាជនវៀតណាម ដែលបានរួមចំណែកយ៉ាងសកម្មក្នុងការកសាង និងអភិវឌ្ឍន៍ប្រទេសវៀតណាម”។“សម្តេចព្រះមហាក្សត្រី ព្រះវររាជមាតា នរោត្តម មុនិនាថ សីហនុ និងខ្ញុំ ព្រមទាំងថ្នាក់ដឹកនាំគ្រប់លំដាប់ថ្នាក់ និងប្រជារាស្ត្រនៃព្រះរាជាណាចក្រកម្ពុជា សូមចូលរួមរំលែកទុក្ខជាមួយក្រុមគ្រួសារនៃសព និងប្រជាជនវៀតណាម”។សម្តេចនាយករដ្ឋមន្ត្រី ហ៊ុន ម៉ាណែត បានចូលរួមរំលែកទុក្ខដល់ក្រុមគ្រួសារលោក ង្វៀន ហ្វ៊ូជុង ក៏ដូចជាប្រជាជនវៀតណាម ក្នុងគ្រាមរណទុក្ខដ៏ក្រៀមក្រំនេះ។សាររំលែកទុក្ខ មានខ្លឹមសារថា “ក្នុងនាមរដ្ឋាភិបាល និងប្រជាជនកម្ពុជា ខ្ញុំសូមចូលរួមរំលែកទុក្ខយ៉ាងក្រៀមក្រំបំផុតចំពោះបក្សកុម្មុយនីស្តវៀតណាម និងរដ្ឋាភិបាល ព្រមទាំងប្រជាជនវៀតណាម ក្នុងគ្រាមរណទុក្ខដ៏ក្រៀមក្រំ និងការបាត់បង់ដ៏ធំធេងនេះ”។សម្តេចហ៊ុន ម៉ាណែត បានបញ្ជាក់បន្ថែមថា នេះជាការបាត់បង់ដ៏ធំធេងរបស់មេដឹកនាំឆ្នើមសម្រាប់វៀតណាម និងជាមិត្តដ៏ល្អរបស់កម្ពុជាដែលតែងតែខិតខំប្រឹងប្រែងក្នុងការរួមចំណែកដល់ទំនាក់ទំនងជាបងប្អូនកម្ពុជា-វៀតណាម។ប្រធានព្រឹទ្ធសភាសម្តេចហ៊ុន សែន បានសម្តែងនូវមរណទុក្ខយ៉ាងក្រៀមក្រំបំផុត ចំពោះមរណភាពរបស់លោក ង្វៀន ហ្វ៊ូជុង ដែលជាមេដឹកនាំឆ្នើម ដែលមានការដឹកនាំប្រកបដោយចក្ខុវិស័យ និងការប្តេជ្ញាចិត្តឥតងាករេ បានដើរតួនាទីយ៉ាងសំខាន់ក្នុងការជំរុញការអភិវឌ្ឍន៍សេដ្ឋកិច្ចសង្គម និងទំនើបកម្មស្ថាប័នរបស់ប្រទេសវៀតណាម។មរណភាពរបស់លោក ង្វៀន ហ្វ៊ូជុង គឺជាការបាត់បង់ដ៏ធំធេងសម្រាប់មិនត្រឹមតែបក្សកុម្មុយនីស្តវៀតណាម និងរដ្ឋាភិបាលប៉ុណ្ណោះទេ។ប៉ុន្តែសម្រាប់ប្រជាជាតិវៀតណាមទាំងមូលផងដែរ។សម្តេចបានមានប្រសាសន៍ថា កេរដំណែលរបស់គាត់ក្នុងនាមជាអ្នកដឹកនាំដ៏ឈ្លាសវៃ ដែលបានលះបង់ជីវិតរបស់គាត់ដើម្បីឯករាជ្យភាពរបស់វៀតណាម និងសុខុមាលភាពរបស់ប្រជាជននឹងត្រូវចងចាំជាច្រើនជំនាន់។សម្តេចបានមានប្រសាសន៍ថា “ការប្តេជ្ញាចិត្តយ៉ាងខ្ជាប់ខ្ជួនរបស់លោក ង្វៀន ហ្វ៊ូជុង ក្នុងការពង្រឹងទំនាក់ទំនងទ្វេភាគីកម្ពុជា-វៀតណាម បានធ្វើឱ្យប្រជាជាតិ និងប្រជាជននៃប្រទេសទាំងពីរកាន់តែរឹងមាំ និងកាន់តែប្រសើរឡើង” ។សម្តេច ហ៊ុន សែន បានបន្ថែមថា «ខ្ញុំសូមចូលរួមរំលែកទុក្ខដ៏ក្រៀមក្រំចំពោះឯកឧត្តម ក្រុមគ្រួសារ សហការី និងប្រជាជនវៀតណាម ក្នុងគ្រាដ៏លំបាកនេះ»។លោកស្រី ឃួន សុដារី ប្រធានរដ្ឋសភាបានចូលរួមរំលែកទុក្ខយ៉ាងក្រៀមក្រំបំផុតចំពោះមរណភាពរបស់លោក ង្វៀន ហ្វ៊ូជុង ដោយមានខ្លឹមសារថា យើងខ្ញុំមានក្តីសោកសង្វេគជាពន់ពេក និងសូមសម្ដែងនូវការចូលរួមរំលែកទុក្ខដ៏ក្រៀមក្រំ ចំពោះមរណភាព របស់ ឯកឧត្តម ង្វៀន ហ៊្វូជុង អគ្គលេខាធិការបក្ស នៃគណបក្សកុម្មុយនីស្តវៀតណាម។ មរណភាពរបស់ ឯកឧត្តមអគ្គលេខាធិការ ង្វៀន ហ៊្វូចុង មិនគ្រាន់តែជាការបាត់បង់ដ៏ធំធេងរបស់សាធារណរដ្ឋសង្គមនិយម វៀតណាមប៉ុណ្ណោះទេ។ប៉ុន្តែជាការបាត់បង់ដ៏ធំធេងសម្រាប់យើងគ្រប់គ្នា ដែលបានដឹងពីការតស៊ូប្រឹងប្រែង និងបានឃើញពីសមិទ្ធផលកេរដំណែលមិនអាច់កាត់ថ្លៃបានរបស់ ឯកឧត្តម សម្រាប់មនុស្សជាតិ»។លោកស្រី ឃួន សុដារី បានបន្ថែមថា “លោកអគ្គលេខាធិការ ង្វៀន ហ្វ៊ូជុង ជាថ្នាក់ដឹកនាំដ៏ឆ្នើម មានចក្ខុវិស័យវែងឆ្ងាយ និងការប្តេជ្ញាចិត្ត មោះមុត ក្នុងការជំរុញ និងសម្រេចឱ្យបានការអភិវឌ្ឍសេដ្ឋកិច្ចសង្គម និងការធ្វើទំនើបភាវូនីយកម្មស្ថាប័ន ក្នុង ប្រទេសវៀតណាម។ លោកអគ្គលេខាធិការ ជាឥស្សរជនជាន់ខ្ពស់មួយរូប ដែលដើរតួនាទីដ៏សំខាន់ក្នុងការ លើកកម្ពស់ទំនាក់ទំនងទ្វេភាគីរបស់ប្រទេសយើងទាំងពីរ ដោយផ្អែកលើការជឿទុកចិត្ត លទ្ធផលជាក់ស្តែង និង ប្រជាជនជាស្នូល”។លោកស្រី ឃួន សុដារី ក៏សូមសម្ដែងនូវការដឹងគុណយ៉ាងជ្រាលជ្រៅ ចំពោះការប្តេជ្ញាចិត្តមិនប្រែរបស់ លោកអគ្គលេខាធិការ ក្នុងការពូនជ្រំចំណងមិត្តភាពទ្វេភាគីរបស់យើងឱ្យបានរឹងមាំ និងជិតស្និទ្ធ ព្រមទាំងបានលើកឡើងថា យើងគ្រប់គ្នានឹងចងចាំនូវវីរភាព ភាពជាអ្នកដឹកនាំ គតិបណ្ឌិត និងមេត្តាធម៌របស់ លោកអគ្គលេខាធិការ។យោងតាមទីភ្នាក់ងារសារព័ត៌មានវៀតណាម (VNA) លោក ង្វៀន ហ្វ៊ូជុង គឺជាអ្នកនយោបាយវៀតណាម ដែលបានបម្រើការជាអគ្គលេខាបក្សកុម្មុយនិស្តវៀតណាមពីឆ្នាំ ២០១១ រហូតដល់ពេលដែលលោកបានទទួលមរណភាពនៅថ្ងៃទី ១៩ ខែកក្កដា។ក្នុងនាមជាប្រធានលេខាធិការដ្ឋាន ការិយាល័យនយោបាយ និងគណៈកម្មាធិការយោធាមជ្ឈិមបក្ស លោក ង្វៀន ហ្វ៊ូជុង គឺជាមេដឹកនាំដ៏សំខាន់របស់វៀតណាម។ចាប់ពីឆ្នាំ២០១៨ ដល់ឆ្នាំ២០២១ លោកក៏បានបម្រើការក្នុងពេលដំណាលគ្នាជាប្រធានាធិបតីនៃប្រទេសវៀតណាមផងដែរ៕Khmer Times
/unnamed.png
Post a Comment