កម្ពុជា​ស្នើ​អាមេរិ​ក​កុំ​ដាក់បញ្ចូល​​ក្នុ​ង​យុទ្ធសាស្ត្រ​ភូមិ​សាស្ត្រនយោ​​បាយ​របស់​ខ្លួន​

 សម្តេចហ៊ុន​ ​សែន​ប្រធាន​ព្រឹទ្ធសភា​ ​បាន​ស្នើ​ឱ្យ​សហរដ្ឋអាមេរិក​កុំ​ដាក់បញ្ចូល​ប្រទេស​កម្ពុជា​ទៅ​ក្នុង​យុទ្ធសាស្ត្រ​ភូមិសាស្ត្រនយោបាយ​របស់​ខ្លួន​ឬ​ប្រើប្រាស់​វា​ជា​កន្លែង​សម្រាប់​ការប្រកួតប្រជែង​ភូមិសាស្ត្រនយោបាយ​ ​ដោយសារ​ព្រះរាជាណាចក្រកម្ពុជា​បាន​និង​កំពុង​អនុវត្ត​គោល​នយោបាយ​ការបរទេស​ផ្អែកលើ​ច្បាប់​របស់​ខ្លួន​។​

សំណើ​នេះ​ត្រូវ​បាន​ធ្វើឡើង​ក្នុង​អំឡុង​ដែល​សម្តេចកំពុង​ទទួល​ជួប​រដ្ឋមន្ត្រីការពារជាតិ​សហរដ្ឋអាមេរិក​ឧត្តមសេនីយ៍​ ​ឡ​យ​ ​អូ​ស្ទី​ន​ (​L​l​o​y​d​ ​A​us​tin​)​នៅ​វិមាន​ព្រឹទ្ធសភា​កាល​ពីម្សិលមិញ​។​សម្តេចហ៊ុន​ ​សែន​ ​បាន​បញ្ជាក់​បន្ថែម​ថា​សម្តេច​គាំទ្រ​ចំពោះ​ចេតនា​របស់​លោក​ ​L​l​o​y​d​ ​A​us​tin​ ​ក្នុង​ការ​កែ​លម្អ​ទំនាក់ទំនង​ទ្វេភាគី​រវាង​កម្ពុជា​ ​និង​អាមេរិក​ ​ដោយ​សម្តេចបាន​បន្ថែម​ថា​ ​រហូត​មកដល់ពេលនេះ​ ​ភាគី​ទាំងសងខាង​ខ្វះ​ការ​ជឿ​ទុកចិត្ត​គ្នា​ទៅវិញទៅមក​ ​ព័ត៌មាន​ ​និង​ការ​វាយ​តម្លៃ​ខុស​ ​ដែល​នាំ​ឱ្យ​មានការ​យល់​ច្រឡំ​។​ប្រធាន​ព្រឹទ្ធសភា​ក៏បាន​ចាត់​ទុក​កិច្ច​សន្ទនា​ក្នុង​វិ​ស័យការពារ​ជាតិ​នៃ​ប្រទេស​ទាំងពីរ​ជា​អាទិភាព​មួយ​សម្រាប់​ការ​កសាង​ទំនុក​ចិត្ត​គ្នា​ទៅវិញទៅមក​បន្ថែម​ទៀត​ ​និង​ជៀសវាង​ការ​ខ្វះ​នូវ​ព័ត៌មាន​។​ឆ្លៀត​ក្នុង​ឱកាស​នេះ​ សម្តេចហ៊ុន​ ​សែន​ ​បាន​ថ្លែង​អំណរគុណ​ចំពោះ​ជំនួយ​របស់​សហរដ្ឋអាមេរិក​ ​លើ​វិ​ស័យ​ផ្សេងៗ​ក្នុង​ប្រទេស​កម្ពុជា​ ​និង​ជំរុញ​កិច្ច​សហប្រតិបត្តិការ​ឱ្យ​កាន់តែ​មាន​ប្រសិទ្ធ​ភាព​ ​និង​ប្រសិទ្ធ​ផល​។​ ​សម្តេចក៏បាន​គូស​បញ្ជាក់​ផង​ដែរ​អំពី​អត្ថប្រយោជន៍​សក្តានុពល​នៃ​កំណើន​វិនិយោគ​របស់​អាមេរិក​នៅ​ក្នុង​ប្រទេស​កម្ពុជា​ ​មិន​ត្រឹមតែ​សម្រាប់​កំណើន​សេដ្ឋកិច្ច​របស់​ប្រទេស​ប៉ុណ្ណោះ​ទេ។​ ​ប៉ុន្តែ​ថែមទាំង​សម្រាប់​ការ​ពង្រឹង​ទំនាក់ទំនង​ទ្វេភាគី​ផង​ដែរ​។​ចំណែក​ ​លោក​ ​L​l​o​y​d​ ​A​us​tin​ ​បាន​អះអាង​សារ​ជាថ្មី​នូវ​ការ​ប្ដេជ្ញា​ចិត្ត​របស់​សហរដ្ឋអាមេរិក​ក្នុង​ការ​ធ្វើការ​ជាមួយ​កម្ពុជា​ ​ដើម្បី​ជម្នះ​បញ្ហា​ប្រឈម​ដែល​មាននៅ​ក្នុង​ទំនាក់ទំនង​ទ្វេភាគី​។​ ​លោក​បាន​បង្ហាញ​ពី​ទំនុក​ចិត្ត​ប្រកបដោយ​សក្ដានុពល​សម្រាប់​កំណើន​និង​កិច្ច​សហប្រតិបត្តិការ​ទោះបីជា​មាន​ការលំបាក​នា​ពេល​បច្ចុប្បន្ន​ក៏ដោយ​។​​លោក​រដ្ឋមន្ត្រីការពារជាតិ​អាមេរិក​បាន​កោតសរសើរ​ចំពោះ​ជំហរ​ដ៏​រឹង​មាំ​របស់​រាជរដ្ឋាភិបាល​ក្នុង​វិ​ស័​យ​ការពារ​ជាតិ​ក្នុង​ការ​រក្សា​ទំនាក់ទំនង​ទ្វេភាគី​រវាងប្រទេស​ទាំងពីរ​។​យោង​តាម​លោក​ ​L​l​o​y​d​ ​A​us​tin​ ​សហរដ្ឋអាមេរិក​នឹង​អនុញ្ញាត​ឱ្យ​និស្សិត​កម្ពុជា​ដាក់ពាក្យ​សុំ​ចូលរៀន​នៅ​សាលា​West Point​ ​Academy​ ​ជំរុញ​ការផ្លាស់ប្តូរ​កិច្ច​សន្ទនា​ផ្នែក​យោធា​ ​និង​រៀបចំ​សម​យុទ្ធ​យោធា​រួមគ្នា​ស្តីពី​ការ​ឆ្លើយតបនឹង​គ្រោះ​មហន្តរាយ​ ​ដើម្បី​កសាង​ទំនុក​ចិត្ត​កាន់តែ​ច្រើនឡើង​សម្រាប់​ផលប្រយោជន៍​នា​ពេល​អនាគត​នៃ​ប្រទេស​ទាំងពីរ​។​ភាគី​ទាំង​ពី​​​រ​ក៏បាន​ផ្លាស់ប្តូរ​ទ​ស្សនៈ ​និង​ដំណោះស្រាយ​អំពី​សង្គ្រាម​រុស្ស៊ី-​អ៊ុយ​ក្រែ​ន​ ​ជម្លោះ​អ៊ីស្រាអែល​-​ហា​ម៉ា​ស​នៅ​តំបន់​ហ្គាហ្សាស្ទ្រី​ប​ ​និង​បញ្ហា​សមុទ្រ​ចិន​ខាងត្បូង​៕​A​K​P​