A​D​B​បញ្ជាក់​​ជាថ្មី​អំពី​ភាពជា​​ដៃគូ​រឹង​មាំ​ជាមួ​យ​កម្ពុជា​

ធនាគារ​អភិវឌ្ឍន៍​អាស៊ី​(​A​D​B)បាន​បញ្ជាក់​ជាថ្មី​ពី​ការ​ប្តេជ្ញា​ចិត្ត​របស់​ខ្លួន​ចំពោះ​ភាពជា​ដៃគូ​ដ៏​រឹង​មាំ​ជាមួយ​ប្រទេស​កម្ពុជា​ដើម្បី​លើក​ក​ម្ពស់​ក​ម្រិ​ត​ជីវភាព​របស់​ប្រជាជន​កម្ពុជា​។​ក្នុង​ជំនួប​សម្តែង​ការគួរសម​ ​នៅ​វិមាន​សន្តិភាព​ ​នា​រសៀល​ថ្ងៃ​ទី​១​២​ ​ខែ​មិថុនា​ ​ឆ្នាំ​២​០​២​៤​ ​ប្រធាន​ធនាគារ​អភិវឌ្ឍន៍​អាស៊ី​ ​លោក​ ​ម៉ា​សា​ស៊ូ​ហ្គូ ​អាសា​កា​វ៉ា​ (​Ma​sat​su​g​u ​As​a​k​a​w​a​) ​បាន​ជម្រាប​ជូន​សម្តេច​នាយករដ្ឋមន្ត្រី​ ​ហ៊ុន​ ​ម៉ា​ណែ​ត​ ​អំពី​ពិធីសម្ពោធ​ស្ថាន​តំណាង​ថ្មី​របស់​ខ្លួន​នៅ​កម្ពុជា​ ​ដោយ​លោក​បាន​សង្កត់ធ្ងន់​ថា​ ​នេះ​ជា​ការ​បង្ហាញ​ពី​ការ​ប្តេជ្ញា​ចិត្ត​កាន់តែ​ខ្លាំង​ចំពោះ​ភាពជា​ដៃគូ​រឹង​មាំ​រវាង​ធនាគារ​អភិវឌ្ឍន៍​អាស៊ី​​និង​រាជរដ្ឋាភិបាល​កម្ពុជា​ដើម្បី​លើក​ក​ម្ពស់​ជីវភាពរស់នៅ​របស់​ប្រជាពលរដ្ឋ​កម្ពុជា​។​

លោក​ ​Ma​sat​su​g​u ​As​a​k​a​w​a​ ​ក៏បាន​លើកឡើង​ពី​ការ​ប្តេជ្ញា​ចិត្ត​របស់​ធនាគារ​អភិវឌ្ឍន៍​អា​ស៊ីក្នុង​ការ​បន្ត​គាំទ្រ​ដល់​រាជរដ្ឋាភិបាល​កម្ពុជា​ ​តាមរយៈ​យុទ្ធ​សា​ស្រ្ត​ភាពជា​ដៃគូ​ប្រចាំ​ប្រទេស​ (​Country​ ​Partnership​ ​Strategy​-C​P​S) ​ដែល​ជា​ផែនការ​ដ៏​ទូលំទូលាយ​ដែល​ផ្តោត​លើ​ចំណុច​សំខាន់​ៗ​ចំនួន​បី​ ​រួម​មាន​៖​ ​១​) ​វិបុលភាព​តាមរយៈ​ការ​ធ្វើ​ពិពិធ​កម្ម​សេដ្ឋកិច្ច​ ​២​) ​ការ​វិនិយោគ​លើ​ប្រជាជន​ ​ដោយ​ផ្តោត​លើ​ការអប់រំ​ ​និង​ការ​បណ្តុះបណ្តាល​វិជ្ជាជីវៈ​ ​និង​ ​៣​) ​ការ​គាំទ្រ​សម្រាប់​ភព​​​ផែនដី​ដោយ​ផ្តោត​សំខាន់​លើ​បរិស្ថាន​ ​និង​អាកាសធាតុ​។​ ​គំនិត​ផ្តួចផ្តើម​ទាំងនេះ​ត្រូវ​បាន​រៀបចំ​ឡើង​ដើម្បី​នាំមក​នូវ​ការផ្លាស់ប្តូរ​ជាក់ស្តែង​ ​និង​ប្រកបដោយ​ចីរភាព​នៅ​កម្ពុជា​។​ចំណែក​ឯ​សម្តេច​នាយករដ្ឋមន្ត្រី​ ​ហ៊ុន​ ​ម៉ា​ណែ​ត​ ​បាន​អប​អរសាទរ​ចំពោះ​កា​របើក​ដំណើរការ​ស្ថាន​តំណាង​ថ្មី​របស់​ ​A​D​B ​ប្រចាំ​នៅ​កម្ពុជា​។​ ​សម្តេច​ក៏បាន​ថ្លែង​អំណរគុណ​ដល់​ ​A​D​B ​ចំពោះ​ការ​ប្តេជ្ញា​ចិត្ត​របស់​ខ្លួន​ក្នុង​ការ​បន្ត​គាំទ្រ​ដល់​រាជរដ្ឋាភិបាល​កម្ពុជា​ ​ដែល​បាន​ដាក់​ចេញ​នូវ​គំនិត​ផ្តួចផ្តើម​ ​និង​កម្មវិធី​កំណែ​ទម្រង់​ថ្មីៗ​ ​ដើម្បី​ធានា​បាន​នូវ​កំណើន​សេដ្ឋកិច្ច​ប្រកបដោយ​ចីរភាព​ ​និង​ធន់​ ​ក្នុង​គោលបំណង​លើក​ក​ម្ពស់​ក​ម្រិ​ត​ជីវភាពរស់នៅ​របស់​ប្រជាពលរដ្ឋ​ ​និង​សម្រេច​បាន​នូវ​ចក្ខុវិស័យ​ប្រទេស​កម្ពុជា​ក្នុង​ការ​ក្លាយ​ជា​ប្រទេស​ដែល​មាន​ចំណូល​ខ្ពស់​នៅ​ឆ្នាំ​២​០​៥​០​។​សម្តេច​នាយករដ្ឋមន្ត្រី​ក៏បាន​លើកឡើង​ពី​ការ​ជំរុញ​វិ​ស័យឯកជន​ ​ដែល​ជា​ដៃគូ​សំខាន់​របស់​រាជរដ្ឋាភិបាល​ ​និង​កា​រដាក់​ឱ្យ​ដំណើរការ​កម្មវិធី​អភិវឌ្ឍន៍​មូលធន​មនុស្ស​ ​ដើម្បី​កសាង​កម្លាំង​ពលកម្ម​ប្រកបដោយ​គុណភាព​ ​និង​សមត្ថភាព​តាមរយៈ​ការ​បណ្តុះបណ្តាល​ ​និង​បច្ចេកវិទ្យា​ទំនើប​។​​លើស​ពី​នេះ​ ​សម្តេច ​ហ៊ុន​ ​ម៉ា​ណែ​ត​ ​បាន​សង្កត់ធ្ងន់​លើ​ការ​រួមចំណែក​របស់​រាជរដ្ឋាភិបាល​ក្នុង​ការ​ឆ្លើយតប​ទៅ​នឹង​ការ​ប្រែប្រួល​អាកាសធាតុ​ ​ដោយ​សង្កត់ធ្ងន់​លើ​កា​រដាក់​ចេញ​នូវ​គោល​នយោបាយ​អភិវឌ្ឍន៍​ថាមពល​ស្អាត​។​សម្តេចបាន​ចង្អុលបង្ហាញ​ថា​ ​កម្ពុជា​សម្រេច​បាន​នូវ​ការប្រើប្រាស់​ថាមពល​ស្អាត​ចំនួន​ ​៦​២​% ​នៃ​ការប្រើប្រាស់​ថាមពល​សរុប​ ​និង​បាន​ដាក់​ចេញ​នូវ​ទិសដៅ​ ​ជំរុញ​ការប្រើប្រាស់​ថាមពល​ស្អាត​ឱ្យ​បាន​ដល់​ ​៧​០​% ​ត្រឹម​ឆ្នាំ​២​០​៣​០​ ​ព្រមទាំង​បាន​បញ្ឈប់​ទាំងស្រុង​នូវ​ការ​បង្កើត​រោងចក្រ​ដំណើរការ​ដោយ​ថាមពល​ធ្យូងថ្ម​ ​ដោយ​ជំនួស​មកវិញ​នូវ​គម្រោង​អភិវឌ្ឍ​ថាមពល​ក​កើតឡើងវិញ​៕