ឧបទ្ទវ​ហេតុផ្ទុះគ្រាប់នៅយោ​ធភូមិភាគទី៣ប​ណ្តាលឲ្យយោ​ធិនចំនួន២០​នាក់បានព​លីជីវិ​តនិងមួយចំនួន​​ទៀតរបួស

ឧបទ្ទវហេតុផ្ទុះគ្រាប់នៅយោធភូមិភាគទី៣ក្នុងខេត្តកំពង់ស្ពឺបាន​កើតឡើង នារសៀល​ថ្ងៃទី​២៧ខែមេសាឆ្នាំ២០២៤ដោយបានបណ្តាលឱ្យ​យោធិនចំនួន២០នាក់បានពលីជីវិតនិងយោ​ធិនមួយចំនួនទៀតបានរបួស។នេះបើតាមការចុះផ្សាយKhmer Times។

រូបភាព៖CNC/Khmer Times

សម្តេចនាយករដ្ឋមន្រ្តីហ៊ុនម៉ាណែតបានសរសេលើហ្វេសប៊ុករបស់សម្តេចនាយប់ថ្ងៃទី​២៧ ខែមេសាដោយបានបង្ហាញ​ក្តីរន្ធត់ក្តុកក្តួលឥតឧបមា ដែលបានទទួលដំណឹងអំពីឧបទ្ទវហេតុផ្ទុះគ្រាប់នៅយោធភូមិភាគទី៣ ក្នុងខេត្តកំពង់ស្ពឺនេះ​ ដែលបានបង្កឱ្យយោធិនចំនួន២០នាក់បានពលីជីវិត និងយោធិនមួយចំនួនទៀតបានរបួស។សម្តេចបាន​​លើកឡើងថា ក្នុងនាមរាជរដ្ឋាភិបាលនិងក្នុងនាមខ្លួនសម្តេចផ្ទាល់ សម្តេចសូមចូលរួមរំលែកមរណទុក្ខយ៉ាងក្រៀមក្រំបំផុតចំពោះក្រុមគ្រួសារយោធិនពលីនិងសម្តែងនូវសមានទុក្ខសោ​កស្តាយចំពោះអ្នករងរបួស ក្នុងឧបទ្ទវហេតុដ៏សោកសង្រេងនេះ។សម្តេចហ៊ុន ម៉ាណែត បញ្ជាក់ថា ៖ «ខ្ញុំបានផ្តល់ការណែនាំដល់ ឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិនិងឯកឧត្តមនាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ ដើម្បីចាត់ចែងជាបន្ទាន់រៀបចំពិធីបុណ្យសពជូនយោធិនដែលបានពលីក្នុងឧបទ្ទវហេតុនេះ ឱ្យបានសមរម្យស័ក្តិសមនឹងពលិកម្មរបស់ពួកគាត់ចំពោះជាតិ និងមាតុភូមិ»​។ឯកឧត្តម នាយឧត្តមសេនីយ៍ ទៀ សីហា នឹងធ្វើជាតំណាងរបស់សម្តេចហ៊ុនម៉ាណែតដើម្បីចូលរួមគោរពវិញ្ញាណក្ខន្ធ។ រាជរដ្ឋាភិបាលនឹងទទួលរ៉ាប់រងទាំងស្រុងលើការចំណាយរៀបចំពិធីបុណ្យសពនេះ។ជាមួយគ្នានេះដែរសម្តេចហ៊ុន ម៉ាណែត ក៏បាន​ប្រកាស​ផ្តល់ការឧបត្ថម្ភជាថវិកាជូនគ្រួសារយោធិនពលីចំនួន២ម៉ឺនដុល្លារអាមេរិក ក្នុងមួយគ្រួសារសព ហើយចំពោះយោធិនដែលរងរបួសក្នុងឧបទ្ទវហេតុនេះ ក្នុងម្នាក់ៗចំនួន២០លានរៀល។យោងតាម​របាយការណ៍​របស់កងទ័ពជើងគោកយោធភូមិភាគទី​៣បាន​ឱ្យដឹងថាករណីផ្ទុះឃ្លាំ​ងស្តុកគ្រាប់បានកើតឡើង​នៅវេលាម៉ោង១៤.២៥នាទី​នៅទីតាំងឃ្លាំងគ្រាប់បច្ចេកទេសយោធភូមិភាគទី៣។របាយការណ៍បានបន្តថា ការផ្ទុះនេះបានបណ្តា​លឱ្យមានការខូចខាតបឋមរួមមាន៖​មនុស្សចំនួន ២០នាក់(អាចស្លាប់ទាំងអស់) ក្នុងនោះមាននាយទាហានខេត្តកោះកុងចំនួន ១៥នាក់ និងនាយទាហានទីបញ្ជាការយោធភូមិភាគចំនួន៥នាក់។ចំពោះអាវុធ-គ្រាប់មកពីខេត្តកោះកុងមាន រថយន្ត៥គ្រឿង (ផ្ទុះខ្ទេចរថយន្ត ១គ្រឿងរួមទាំងអាវុធគ្រាប់នៅលើរថយន្ត,រថយន្តមួយគ្រឿងទៀតខូចធ្ងន់ធ្ងរផ្នែកខាងក្រៅតែអាវុធគ្រាប់នៅលើ​នឹង៣គ្រឿងទៀតមិនទាន់បានដាក់អាវុធគ្រាប់ចុះ)។​​ចំណែកអគារខូចខាតធ្ងន់ធ្ងរ ចំនួន៤ខ្នង (អាវុធគ្រាប់ក្នុងឃ្លាំង៣ខ្នង ខូចខាតទាំងស្រុង, អគារស្នាក់នៅ១ ខ្នង និងអគារការិយាល័យក្នុងទីបញ្ជាការយោធភូមិភាគខូចខាតផ្នែកខាងក្រៅរួមមានទ្វាបង្អួចនិងដំបូល)។ខូចខាតផ្ទះប្រជាពលរដ្ឋជុំវិញទីបញ្ជាការយោធភូមិភាគចំនួន ២៥ខ្នងៗផងដែរ៕