សហ​​ភា​ពអឺរ៉ុបអនុម័ត​ក​ញ្ចប់ទណ្ឌកម្មរុស្ស៊ី"ប៉ះ​"ក្រុមហ៊ុន​ចិន

សហភាពអឺរ៉ុបបានអនុម័តកញ្ចប់ទណ្ឌកម្មលើកទី១៣លើប្រទេសរុស្ស៊ីហើយជាលើកដំបូង"ប៉ះ"ក្រុមហ៊ុនចិនសម្រាប់ការចោទប្រកាន់ថាបានជួយទីក្រុងម៉ូស្គូទទួលបានទំនិញហាមឃាត់។

ប្រធានាធិបតីរុស្ស៊ី លោក Vladimir Putin និងប្រធានាធិបតីចិន លោកXi JingPing។ រូបថត៖ Euro News

សារព័ត៌មាន Euro News បាននិយាយថា ការដាក់ទណ្ឌកម្មចុងក្រោយបំផុតត្រូវបានអនុម័តដោយសហភាពអឺរ៉ុប(EU) នៅថ្ងៃនេះ(ថ្ងៃទី២១ខែកុម្ភៈ)។ទណ្ឌកម្មនេះក៏មានគោលដៅទៅលើក្រុមហ៊ុននានាក្នុងផ្នែកជាច្រើននៃពិភពលោកសម្រាប់ការចោទប្រកាន់ថាបានផ្តល់ឱ្យរុស្ស៊ីនូវបច្ចេកវិទ្យាទំនើបៗនិងទំនិញយោធាដែលផលិតនៅក្នុងសហភាពអឺរ៉ុប ជាពិសេសគ្រឿងបន្លាស់យន្តហោះគ្មានមនុស្សបើក។ក្រុម​ហ៊ុន​ដែល​មិន​មែន​រុស្ស៊ី​ត្រូវ​បាន​ដាក់​ទណ្ឌកម្ម​ជា​ចម្បង​សម្រាប់​ការ​ជួយ​រុស្ស៊ី​គេច​ពី​ទណ្ឌកម្ម​របស់​សហភាព​អឺរ៉ុប។ព័ត៌មាននិយាយថា ក្រុមហ៊ុនមកពីតួកគីកូរ៉េខាងជើង ចិននិងប្រទេសផ្សេងទៀតក៏ស្ថិតនៅក្នុងបញ្ជីទណ្ឌកម្មផងដែរ។បុគ្គល និងអង្គការជិត២០០ដែលភាគច្រើនមកពីប្រទេសរុស្ស៊ីត្រូវបានដាក់ទណ្ឌកម្មដោយសហភាពអឺរ៉ុបនៅជុំចុងក្រោយនៃទណ្ឌកម្មការបង្កើន"បញ្ជីខ្មៅ" ដល់នីតិបុគ្គលជាង២,០០០។ព័ត៌មានលម្អិតអំពីទណ្ឌកម្មចុងក្រោយរបស់សហភាពអឺរ៉ុបនឹងត្រូវប្រកាសនៅថ្ងៃទី២៤ខែកុម្ភៈដែលជារយៈពេល២ឆ្នាំចាប់តាំងពីប្រទេសរុស្ស៊ីបានចាប់ផ្តើមយុទ្ធនាការយោធាពិសេសនៅក្នុងប្រទេសជិតខាងអ៊ុយក្រែន។លោកស្រី Ursula von der Leyen ប្រធានគណៈកម្មការអឺរ៉ុបបានសង្កត់ធ្ងន់ថា"យើងត្រូវតែបន្តធ្វើឱ្យធនធានគាំទ្រផ្នែកយោធារបស់រុស្ស៊ីចុះខ្សោយ"។សហភាពអឺរ៉ុបធ្លាប់បានព្យាយាមដាក់ទណ្ឌកម្មក្រុមហ៊ុនជាច្រើនដែលមានមូលដ្ឋាននៅក្នុងប្រទេសចិនដីគោក។ ទោះជាយ៉ាងណាក៏ដោយទីក្រុងប៉េកាំងបានឆ្លើយតបដោយធ្វើឱ្យរដ្ឋសមាជិកសហភាពអឺរ៉ុបមួយចំនួនមានការប្រុងប្រយ័ត្ន។ទំនាក់ទំនងកាន់តែជិតស្និទ្ធរវាងរុស្ស៊ីនិងចិនទីបំផុតបានជំរុញឱ្យមន្ត្រីការទូតនៅទីក្រុងប្រ៊ុចសែល ចាត់វិធានការកាន់តែម៉ឺងម៉ាត់។យោងតាមទិន្នន័យគយរបស់រដ្ឋាភិបាលចិន ពាណិជ្ជកម្មរុស្ស៊ី-ចិននឹងឈានដល់កម្រិតខ្ពស់បំផុតជាង២០៤ពាន់លានដុល្លារនៅឆ្នាំ២០២៣ដែលលើសពីគោលដៅដែលប្រទេសទាំងពីរបានកំណត់ចំនួន២០០ពាន់លានដុល្លារ។ហុងគ្រី​ពីមុន​ជា​ប្រទេស​តែ​មួយ​គត់​ដែល​មិន​អនុម័ត​កញ្ចប់​ទណ្ឌកម្ម​ទី​១៣​ប្រឆាំង​នឹង​រុស្ស៊ី។ដំណើរការនេះត្រូវបានយឺតយ៉ាវខណៈដែលប្រទេសហុងគ្រីព្យាយាមរារាំងរាល់ការដាក់ទណ្ឌកម្មដែលទាក់ទងនឹងRosatomដែលជាកម្មសិទ្ធិផ្តាច់មុខនុយក្លេអ៊ែររបស់រុស្ស៊ី។Rosatomគឺជាអ្នកម៉ៅការសំខាន់សម្រាប់ការពង្រីករោងចក្រថាមពលនុយក្លេអ៊ែរ Paks ដែលផ្គត់ផ្គង់អគ្គិសនីជាង៥០% របស់ប្រទេសហុងគ្រី៕ពុតសាម៉ាត់