កម្ពុជាបានរកឃើញបង្គោលព្រំដែនគោកកម្ពុជា-ថៃសរុបជាង៧០ទីតាំង ស្មើជាង ៧០បង្គោល ដែលត្រូវបន្តយកចិត្តទុកដាក់លើទិដ្ឋភាពច្បាប់ បច្ចេកទេស និងនយោបាយ ដើម្បីធានារក្សាការពារមិនឱ្យមានការរំលោភបំពាននូវអធិបតេយ្យជាតិនិងបូរណភាពទឹកដីរបស់កម្ពុជា។
 |
| សកម្មភាពមន្ត្រីគណៈកម្មាធិការកិច្ចការព្រំដែនកម្ពុជា-ថៃ ចុះ បោះបង្គោលក្នុង ភូមិសាស្ត្រ ខេត្តបន្ទាយមានជ័យ និងខេត្តស្រះកែវ កាលពីឆ្នាំ២០២០។ រូបភាព៖ រដ្ឋបាលខេត្តបន្ទាយមានជ័យ/KhmerTimes |
ក្នុងកិច្ចប្រជុំរវាងគណៈកម្មការរដ្ឋសភា និងតំណាងរដ្ឋាភិបាលកម្ពុជា ស្តីពីការបង្កើតរដ្ឋលេខាធិការដ្ឋានកិច្ចការព្រំដែន នៅវិមានរដ្ឋសភា កាលពីថ្ងៃសុក្រ លោក ឡាំ ជា រដ្ឋមន្ត្រីរដ្ឋលេខាធិការដ្ឋានកិច្ចការព្រំដែន បានឱ្យដឹងថា កិច្ចការព្រំដែន ជាកិច្ចការអាទិភាពមួយដ៏មានសារៈសំខាន់បំផុត និងជាអាយុជីវិតរបស់ជាតិ ដែលទាមទារឱ្យយកចិត្តទុកដាក់ជាអាទិភាពខ្ពស់បំផុត។លោកបន្ថែមថា ការងារអាទិភាពដែលត្រូវយកចិត្តទុកដាក់បំផុតមានដូចជា ទិដ្ឋភាពច្បាប់ បច្ចេកទេស និងនយោបាយ ដើម្បីធានារក្សាការពារមិនឱ្យមានការរំលោភបានជាដាច់ខាតរាល់អធិបតេយ្យ និងបូរណភាពទឹកដីនៃកម្ពុជា។លោកបន្តថា ក្រោមការដឹកនាំរបស់លោក ហ៊ុន សែន ប្រធានគណបក្សប្រជាជនកម្ពុជា បានដោះស្រាយបញ្ហាព្រំដែនជាមួយប្រទេសជិតខាងដោយប្រកាន់ខ្ជាប់ឥតងាករេនូវឧត្តមគតិស្នេហាជាតិដ៏ស្មោះត្រង់បំផុត ដើម្បីការពារថែរក្សាឱ្យបានជាដាច់ខាតនូវអធិបតេយ្យជាតិ និងបូរណភាពទឹកដី។លោកបញ្ជាក់ថា បច្ចុប្បន្ន កម្ពុជាសម្រេចបាននូវសមិទ្ធផលជាតិជាប្រវត្តិសាស្ត្រទាក់ទងនឹងព្រំដែនគោកនៃកម្ពុជា ជាមួយប្រទេសជិតខាង។ ក្នុងនោះ កម្ពុជាបានធ្វើការខណ្ឌសីមា និងបោះបង្គោលព្រំដែនគោកកម្ពុជា-វៀតណាម បានចំនួន ៨៤ភាគរយ។បានធ្វើការត្រួតពិនិត្យខ្សែបន្ទាត់ព្រំដែនគោកកម្ពុជា-ឡាវ បានចំនួន ៨៦ភាគរយ និងបានរកឃើញបង្គោលព្រំដែនគោកកម្ពុជា-ថៃ ចំនួន ៧៣ទីតាំង ស្មើនឹង ៧៤បង្គោល ដែលក្នុងនោះ បានឯកភាពគ្នាចំនួន ៤២ទីតាំង ស្មើនឹង ៤២បង្គោល និងពុំទាន់បានឯកភាពគ្នាចំនួន ៣១ទីតាំង ស្មើនឹង ៣២បង្គោល។អតីតទេសរដ្ឋមន្ត្រីទទួលបន្ទុកបេសកកម្មកិច្ចការព្រំដែនពិសេស លោក វ៉ា គឹមហុង ប្រាប់កាសែតខ្មែរថាមស៍ ដូច្នេះថា បច្ចុប្បន្ន រដ្ឋាភិបាលបង្កើត រដ្ឋលេខាធិការដ្ឋានកិច្ចការព្រំដែន មិនមែនជារឿងចម្លែកនោះទេ ព្រោះកម្ពុជាក៏ធ្លាប់បង្កើតឱ្យមាន លេខាធិការដ្ឋានអាកាសចរស៊ីវិល ដែលដាក់ឱ្យដំណើរការយូរឆ្នាំរួចហើយដែរ។លោកបន្តថា កាលពីអាណត្តិមុនៗ កិច្ចការព្រំដែន ស្ថិតនៅទីស្ដីការគណៈរដ្ឋមន្ត្រី ហើយបច្ចុប្បន្ននេះ គឺមានការបំបែកឱ្យមានរដ្ឋលេខាធិការដ្ឋាន។លោកថា៖ «ការបង្កើតឱ្យមានរដ្ឋលេខាធិការដ្ឋានខាងលើកនេះ កាន់តែបង្កើនប្រសិទ្ធភាពក្នុងការបោះបង្គោលព្រំដែន ជាពិសេសធានាបាននូវទិដ្ឋភាពច្បាប់ បច្ចេកទេស និងនយោបាយ ដើម្បីការពារអធិបតេយ្យជាតិ និងបូរណភាពទឹកដីរបស់យើង»។កាលពីថ្ងៃសុក្រ រដ្ឋសភាកម្ពុជា បានឱ្យដឹងថា ចាប់តាំងពីឆ្នាំ១៩៩៦ រហូតដល់បច្ចុប្បន្ន កិច្ចការព្រំដែនកម្ពុជាជាមួយប្រទេសជិតខាង ត្រូវបានដឹកនាំគ្រប់គ្រងដោយអាជ្ញាធរជាតិទទួលបន្ទុកកិច្ចការព្រំដែន និងមានលេខាធិការដ្ឋានអចិន្ត្រៃយ៍មួយជាសេនាធិការ។រដ្ឋាភិបាលកម្ពុជា សម្រាប់នីតិកាលទី៧ នៃរដ្ឋសភា នៅតែបន្តចាត់ទុកកិច្ចការព្រំដែន ជាកិច្ចការដ៏មានសារៈសំខាន់បំផុតជាអាយុជីវិតរបស់ជាតិ គឺជាអាទិភាពខ្ពស់បំផុតរបស់ខ្លួន ដែលត្រូវបន្តយកចិត្តទុកដាក់ខ្ពស់ដោយប្រកាន់ខ្ជាប់ឥតងាករេនូវឧត្តមគតិស្នេហាជាតិដ៏ស្មោះត្រង់បំផុត ក្នុងការការពារនិងថែរក្សាឱ្យបានដាច់ខាតនូវអធិបតេយ្យជាតិ និងបូរណភាពទឹកដីនៃកម្ពុជា។រដ្ឋសភាបញ្ជាក់ថា ការបង្កើតរដ្ឋលេខាធិការដ្ឋានកិច្ចការព្រំដែន ជំនួសឱ្យអាជ្ញាធរជាតិទទួលបន្ទុកកិច្ចការព្រំដែន ធ្វើឡើងក្នុងគោលបំណងបង្កើតឱ្យមានស្ថាប័នថ្មីមួយ ដែលមានលក្ខណៈអចិន្ត្រៃយ៍ មានរចនាសម្ពន្ធគ្រប់គ្រង និងសមត្ថកិច្ចពេញលេញ ព្រមទាំងអាចស្រូបទាញបន្ថែមនូវធនធានមនុស្សដែលមានសមត្ថភាព ជំនាញពិតប្រាកដ ទាំងផ្នែកបច្ចេកទេស ច្បាប់ជាតិ ច្បាប់អន្តរជាតិ និងជំនាញពាក់ព័ន្ធផ្សេងទៀត ដើម្បីលើកកម្ពស់ប្រសិទ្ធភាពនៃការបន្តបេសកកម្មដ៏ពិសិដ្ឋ ក្នុងការដោះស្រាយបញ្ហាព្រំដែនជាមួយប្រទេសជិតខាង។រដ្ឋសភាបន្ថែមថា ការបង្កើតរដ្ឋលេខាធិការដ្ឋានកិច្ចការព្រំដែន ដើម្បីឈានទៅកសាងខ្សែបន្ទាត់ព្រំដែនជាមួយប្រទេសជិតខាងទាំងព្រំដែនគោក និងព្រំដែនសមុទ្រ ប្រកបដោយភាពពេញលេញ និងច្បាស់លាស់ សម្រាប់ជាព្រំដែនមិត្តភាព សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍ ដោយអនុលោមតាមរដ្ឋធម្មនុញ្ញ ច្បាប់ជាតិនិងច្បាប់អន្តរជាតិ និងគោលការណ៍ព្រំដែនមិនកែប្រែ នៅពេលកម្ពុជាទទួលបានឯករាជ្យ៕KhmerTimes
/unnamed.png
Post a Comment