រដ្ឋសភា​​នី​តិកា​ល​ទី​​​​៧​នឹង​ត្រូវ​​​​កោះ​ប្រជុំ​​នៅ​​​​ថ្ងៃ​ទី​២​១​

សម័យប្រជុំ​ដំបូង​នៃ​រដ្ឋសភា​នីតិកាល​ទី​៧​នឹង​ត្រូវ​កោះ​ប្រជុំ​នៅ​ថ្ងៃ​ទី​២​១​ ​ខែ​សីហា​ ​រយៈពេល​ជិត​១​ខែ​ ​បន្ទាប់ពី ការបោះឆ្នោត​ ​ដែល​បាន​ប្រព្រឹត្តទៅ​នៅ​ថ្ងៃ​ទី​២​៣​ ​ខែ​កក្កដា​។

វិមានសភា។AKP

យោង​តាម​សេចក្តីប្រកាស​របស់​រដ្ឋសភា​ ​ដែល​បាន​ចេញផ្សាយ​នៅ​ថ្ងៃ​ទី​១​១​ ​ខែ​សីហា​បាន​ឱ្យ​ដឹង​ថា​ព្រឹត្តិការណ៍​ដ៏​ឧឡារិក​ ​និង​ជា​ប្រវត្តិសាស្ត្រ​ ​នឹង​ត្រូវធ្វើ​ឡើង​ក្រោមអធិបតីភាព​ ​ព្រះមហាក្សត្រ​ ​នរោត្តម​ ​សី​ហ​មុនី​។​ឥស្សរជន​ជាន់ខ្ពស់​ ​អ្នកការទូត​បរទេស​នៅ​កម្ពុជា​ ​និង​តំណាង​អង្គការ​មិនមែន​រដ្ឋាភិបាល​ជាច្រើន​ ​នឹង​ត្រូវ​បាន​អញ្ជើញ​ចូលរួម​ក្នុង​ព្រឹត្តិការណ៍​នេះ​។​​បន្ទាប់ពី​ពិធី​បើក​ ​សម័យប្រជុំ​ដំបូង​នឹង​ចាប់ផ្តើម​ ​ក្រោមអធិបតីភាព​សម្តេច​ ​ហេង​ ​សំ​រិន​ ​ប្រធានរដ្ឋសភា​ ​ដើម្បី​អនុម័ត​អាណត្តិ​របស់​សមាជិករដ្ឋសភា​នីមួយៗ​ ​និង​បទបញ្ជាផ្ទៃក្នុង​របស់​រដ្ឋសភា​ ​សម្រាប់​នីតិកាល​ទី​៧​។​នៅ​ថ្ងៃ​ទី​២​២​ ​ខែ​សីហា​ ​រដ្ឋសភា​នឹង​បន្ត​សម័យប្រជុំ​ដំបូង​ដើម្បី​ជ្រើសរើស​ប្រធាន​ ​អនុប្រធាន​ ​និង​ប្រធានគណៈកម្មការ​នានា​របស់​រដ្ឋសភា​ ​ព្រមទាំង​ធ្វើ​ការបោះឆ្នោត​ផ្តល់​ទំនុក​ចិត្ត​លើ​រដ្ឋាភិបាល​ថ្មី​។​យោង​តាម​លទ្ធផល​ផ្លូវការ​ ​ដែល​ត្រូវ​បាន​ប្រកាស​ដោយ​គណៈកម្មាធិការ​ជាតិ​រៀបចំ​ការបោះឆ្នោត​កម្ពុជា​បាន​ឱ្យ​ដឹង​ថា​ ​ក្នុង​ការបោះឆ្នោត​ជ្រើសតាំង​តំណាង​រា​ស្រ្ត ​នីតិកាល​ទី​៧​ ​កាលពី​ថ្ងៃ​ទី​២​៣​ ​ខែ​កក្កដា​ ​បេក្ខជន​ចំនួន​ ​១​២​៥​រូប​ ​ត្រូវ​បាន​បោះឆ្នោត​ជ្រើសតាំង​ក្នុង​អង្គ​នីតិបញ្ញត្តិ​នេះ​។​ ​ក្នុង​នោះ​ ​១​២​០​រូប​ ​មកពី​គណបក្សប្រជាជន​កម្ពុជា​ ​និង​ ​៥​រូប​មកពី​គណបក្ស​រាជា​និយម​ហ៊្វុ​ន​ស៊ិន​ប៉ិច​៕V​N​A​/KhmerTimes