ជំនន់​ទឹក​​ជ​ន់​​​លិច​ផ្លូវ​រូង​ក្រោម​​ដី​​ម​នុស្ស​៩​នា​ក់​​លង់​ទឹក

 កូរ៉េ៖ផ្លូវរូងក្រោមដីប្រវែងជិត៧០០ម៉ែត្រក្នុងទីក្រុង Osong ខេត្ត Chungcheong ខាងជើងបានជន់លិចដោយជំនន់ទឹកភ្លៀង បណ្តាលឲ្យមនុស្សយ៉ាងតិច៩នាក់លង់ទឹកស្លាប់ដោយសាររថយន្តជាប់គាំង។

អ្នកជួយសង្គ្រោះនៅផ្លូវរូងក្រោមដីលិចទឹក។ រូបថត៖ Korea Herald

មន្ត្រីកូរ៉េខាងត្បូងបាននិយាយនៅរសៀលថ្ងៃទី ១៦ ខែកក្កដាថា សាកសពជនរងគ្រោះ៨នាក់ត្រូវបានរកឃើញនៅក្នុងផ្លូវរូងក្រោមដីលិចទឹកក្នុងទីក្រុង Osong ខេត្ត Chungcheong ខាងជើង ដែលនាំឱ្យចំនួនអ្នកស្លាប់សរុបនៅក្នុងផ្លូវរូងក្រោមដីនេះកើនឡើងដល់យ៉ាងហោចណាស់៩នាក់។ចំនួនអ្នកស្លាប់អាចកើនឡើងបន្ថែមទៀត ខណៈដែលអាជ្ញាធរកំពុងព្យាយាមទៅដល់រថយន្តចំនួន១៥គ្រឿងដែលបានលិចក្នុងទឹកជន់លិចដោយមានជនរងគ្រោះ១១នាក់ត្រូវបានគេជឿថានៅតែជាប់នៅខាងក្នុង។ផ្លូវរូងក្រោមដីដែលមានប្រវែង៦៨៥ម៉ែត្រ ស្រាប់តែជន់លិចកាលពីថ្ងៃទី១៥ខែកក្កដានៅពេលដែលទឹកទន្លេនៅក្បែរនោះបានហក់ច្រាំងទន្លេដោយសារកម្ពស់ទឹកខ្ពស់ដែលបណ្តាលមកពីភ្លៀងធ្លាក់ខ្លាំង។ក្រុមអ្នកជួយសង្គ្រោះកាលពីម្សិលមិញបានជួយសង្គ្រោះមនុស្ស ៩នាក់នៅក្នុងផ្លូវរូងក្រោមដី។រហូតមកដល់ថ្ងៃនេះ ទឹកជំនន់ និងការបាក់ដីដែលបង្កឡើងដោយភ្លៀងធ្លាក់ខ្លាំងនៅក្នុងប្រទេសកូរ៉េខាងត្បូងបានសម្លាប់មនុស្សយ៉ាងហោចណាស់៣៥នាក់ មនុស្សជាង១០ នាក់កំពុងបាត់ខ្លួននិងរាប់ពាន់នាក់ត្រូវជម្លៀសចេញ។ភាគច្រើននៃអ្នកស្លាប់ និងរបួសត្រូវបានកត់ត្រានៅក្នុងខេត្ត Gyeongsang ខាងជើងដែលមនុស្ស ១៧នាក់បានស្លាប់និង៩នាក់កំពុងបាត់ខ្លួន។ទឹកជំនន់​បាន​បំផ្លាញ​ផ្ទះ​រាប់រយ​ខ្នងខូចខាត​ផ្លូវ​៣២​ខ្សែនិង​បាក់​ច្រាំង​ទន្លេ​៤៩​ខ្នង​។អាជ្ញាធរកូរ៉េខាងត្បូងត្រូវបិទផ្លូវចំនួន២១៦ដើម្បីធានាសុវត្ថិភាព។ទីភ្នាក់ងារឧតុនិយមកូរ៉េបាននិយាយថាខេត្តភាគកណ្តាល Chungcheong ភាគខាងត្បូង Jeolla និង Gyeongsang អាចរំពឹងថានឹងមានភ្លៀងធ្លាក់បន្ថែមរហូតដល់៣០០mm រហូតដល់ថ្ងៃទី១៨ខែកក្កដា។ប្រទេសកូរ៉េខាងត្បូងបានបង្កើនការព្រមានអំពីការរអិលបាក់ដីទូទាំងប្រទេសដល់កម្រិតខ្ពស់បំផុតលើកលែងតែកោះ Jeju ។នាយករដ្ឋមន្ត្រី Han Duck-soo បានសន្យាថា រដ្ឋាភិបាលនឹងស្វែងរកអ្នកបាត់ខ្លួនយ៉ាងឆាប់រហ័ស ហើយបានណែនាំមន្ត្រីឱ្យខិតខំប្រឹងប្រែងជាអតិបរមា ដើម្បីធានាសុវត្ថិភាពរបស់ប្រជាជន។ក្រសួងការពារជាតិកូរ៉េខាងត្បូងបាននិយាយថាខ្លួនបានបញ្ជូនបុគ្គលិកចំនួន៤៧២នាក់ និងឧបករណ៍ពិសេសចំនួន ៦៩ដើម្បីគាំទ្រប្រតិបត្តិការឆ្លើយតបគ្រោះមហន្តរាយ៕ប្រភពYonhap