សារប្រមុខ​​រា​ជរដ្ឋាភិបាលកម្ពុជាថា​​បំ​ណងរបស់ពួកប្រឆាំ​ងត្រូវរលាយដូ​ចអំ​បិលត្រូវទឹ​ក

 ប្រមុខរាជរដ្ឋាភិបាលកម្ពុជាសម្ដេចហ៊ុន សែនបានមាន​ប្រ​សាសន៍​បញ្ជាក់ជាថ្មីថាសម្ដេចគោរពការសម្រេចរបស់ប្រជាជនថៃនិងមិនជ្រៀត​ជ្រែក​កិច្ច​ការផ្ទៃក្នុងប្រទេសថៃនិងត្រៀមខ្លួនធ្វើការជាមួយថ្នាក់ដឹកនាំរដ្ឋាភិបាលថៃ ទោះអ្នកណាឬបក្សណាដឹកនាំក៏ដោយ។

រូបភាពនៅលើធ្វីតទ័រសម្តេចហ៊ុនសែន។

នៅលើបណ្ដាញតេឡេក្រាម នាព្រឹកថ្ងៃទី ១៤ ខែកក្កដា ឆ្នាំ២០២៣ សម្ដេចហ៊ុន សែន បានសរសេរថា ល្ងាចម្សិលម៉ិញខ្ញុំបានបង្ហោះសារមួយដែលមានន័យថាការ​ដែលលោក Pita មិនបានជាប់ឆ្នោតជានាយករដ្ឋមន្ត្រីថៃវាជាបរាជ័យរបស់ក្រុមប្រឆាំង​ជ្រុល​និយមនៅកម្ពុជាដោយហេតុថាក្រុមនេះបានប្រើប្រាស់ឈ្មោះលោក Pita និងគណ​បក្ស​​របស់លោកធ្វើការឃោសនាថាក្រោយលោក Pita កាន់ដំណែងជានាយករដ្ឋមន្ត្រី ហើយពួកគេនិងធ្វើសកម្មភាពចេញពីទឹកដីថៃ រហូតអ្នកវិភាគតាមវិទ្យុបរទេស​និយាយ​ភាសា​ខ្មែរលើកឡើងថា មេដឹកនាំក្រុមជ្រលនិយមនឹងមកកម្ពុជាតាមទឹកដីថៃ។ក្រុមនេះ​បាន​ប្រើប្រាស់ឈ្មោះលោក Pita ជិត២ខែមកហើយ តាំងពីលោកឈ្នះឆ្នោតមកម្ល៉េះ!។ សម្ដេចបានថ្លែងថា៖ «ខ្ញុំមិនបានប្រឆាំងលោកPita នោះទេ ហើយក៏មិន​ជ្រៀត​​​ជ្រែកកិច្ចការផ្ទៃក្នុងប្រទេសថៃនោះដែរ។ការដែលខ្ញុំចេញសារនេះមាន​បំណងប្រាប់​ទៅ​ក្រុម​​ជ្រុលនិយមនៅកម្ពុជាថាបំណងរបស់ពួកអ្នកត្រូវរលាយដូចអំបិលត្រូវទឹក។ ក្រោយ​​ខ្ញុំបង្ហោះមានបងប្អូនថៃចូលមកComment ជាភាសារថៃយ៉ាងច្រើន ដែលខ្ញុំមិនយល់ដោយ​មិនចេះអានភាសារថៃ»។ នៅទីនេះសម្ដេចនាយករដ្ឋមន្ត្រីបញ្ជាក់ថា១. ខ្ញុំមិន​ប្រឆាំង​លោក Pita នោះទេ ហើយក៏បានត្រៀមខ្លួនធ្វើការជាមួយលោក Pita ក្នុងករណី​លោក Pita ដឹកនាំរដ្ឋាភិបាលថៃ។ ២.ខ្ញុំគោរពការសម្រេចរបស់ប្រជាជនថៃ និង មិន​ជ្រៀតជ្រែក​កិច្ចការ​ផ្ទៃក្នុង​ប្រទេសថៃនោះឡើយ។ ៣. ខ្ញុំត្រៀមខ្លួនធ្វើការជាមួយថ្នាក់ដឹកនាំ​រដ្ឋាភិ​បាល​ថៃ ទោះអ្នកណា ឬបក្សណាដឹកនាំក៏ដោយ។ ៤. ពួកជ្រុលនិយមខ្មែរដែល​យក​ទឹកដីថៃ សម្រាប់​ធ្វើសកម្មភាពប្រឆាំងកម្ពុជារាប់ទាំងការប្រើប្រាស់ឈ្មោះលោក Pita គប្បី​បញ្ឈប់​សកម្មភាពធ្វើនយោបាយ ដែលពឹងលើដង្ហើមអ្នកដទៃ ដើម្បីបំផ្លាញជាតិខ្លួនឯង​ទៀត​ទៅ។ជាពិសេសឈប់ប្រើឈ្មោះលោក Pita ដែលគាត់មិនទាំងដឹងខ្លួនផងឱ្យមក​ប្រឆាំងជា​មួយ​កម្ពុជាទៀតទៅ។សូមរម្លឹកផងដែរថា នៅលើបណ្ដាញតេឡេក្រាមកាលពីព្រលប់ថ្ងៃទី១៣ ខែកក្កដា ឆ្នាំ២០២៣ សម្ដេចបានសរសេរថា៖ «ខ្ញុំសូមប្រកាសថ្ងៃនេះថា ការមិនទទួលបាន​សំឡេង​គ្រប់គ្រាន់ដើម្បីធ្វើជានាយករដ្ឋមន្រ្តីថៃរបស់លោក Pitaគឺជាការបរាជ័យដ៏ធំរបស់​ក្រុមពួកតិរច្ឆាននៅកម្ពុជា ហើយនេះមិនមែនបង្ហាញថាខ្ញុំជ្រៀតជ្រែកកិច្ចការផ្ទៃក្នុងរបស់ថៃ​នោះទេ។ ខ្ញុំគ្រាន់តែចង់បង្ហាញថាព្រោះកន្លងមកពួកក្បត់ជាតិទាំងនេះ តែងតែរំពឹងទុកថា​នៅពេលលោកPita ក្លាយជានាយករដ្ឋមន្រ្តីរបស់ថៃ ពួកគេនឹងប្រើប្រាស់ទឹកដីរបស់ថៃដើម្បីធ្វើចលនាប្រឆាំងបះបោរនឹងរាជរដ្ឋាភិបាលកម្ពុជា។ឥឡូវនេះក្តីរំពឹងរបស់ពួក​អាតិរច្ឆានទាំងនោះបានរលាយដូចអំបិលត្រូវទឹកហើយ»។ សម្ដេចនាយករដ្ឋមន្ត្រីក៏បានសរសេរបន្ថែមថា៖«សូមកុំធ្វើនយោបាយ​ផ្អែក​លើ​ដង្ហើមអ្នកដទៃដែលនេះជាការដាស់តឿននិងជាបំណងល្អរបស់ខ្ញុំសម្រាប់ក្រុមជ្រុល​និយម»៕AKP