កម្ពុ​ជា​តម្រូវឱ្យ​បិទ​ខ្ទប់​កា​រចូល​គេ​ហទំព័រ​និ​ង​​ប្រព័ន្ធទំ​នាក់​ទំ​​​នងសង្គមរបស់​​សារព័​ត៌​មា​នប្រឆាំង

និយ័តករទូរគមនាគមន៍កម្ពុជាបានបញ្ជា​​ឱ្យបិទខ្ទប់ការចូលទៅកាន់ប្រព័ន្ធផ្សព្វផ្សាយ​សង្គមនិង​​គេហទំព័ររបស់​ស្ថាប័នសារព័ត៌មានវិទ្យុ​អាស៊ីសេរី, The Cambodia Daily Khmer ​និងមូលដ្ឋាន​ទិន្នន័យសារធារណៈ​ឈ្មោះថា «កំណត់ត្រា» ដែលទើប​បើក​ដោយ​មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ CCIM ដោយ​ហេតុផលថាជាអង្គភាពសារព័ត៌មានខុសច្បាប់និងផ្សព្វផ្សាយព័ត៌មានប៉ះពាល់ដល់រដ្ឋាភិបាល។

បើតាមលិខិតដែល​ផ្ញើទៅកាន់​ក្រុមហ៊ុន​ផ្តល់សេវាអ៊ីនធឺណិតមួយចុះថ្ងៃទី​១២កក្កដា ក្រុមហ៊ុន​ផ្តល់សេវាអ៊ីនធឺណិតទាំងអស់មានពេល​១សប្តាហ៍ក្នុងការ​អនុវត្តតាមបញ្ជានេះ​។ក្រុមហ៊ុនផ្តល់សេវាអ៊ីនធឺណិតនៅកម្ពុជាទាំងអស់ តម្រូវឱ្យបិទខ្ទប់ការចូលទៅកាន់គេហទំព័រនិងបណ្តាញ ប្រព័ន្ធ​ទំនាក់ទំនងសង្គមរបស់សារព័ត៌មានចំនួន​២ គឺ ​​វិទ្យុអាស៊ីសេរី និងកាសែត​ The Cambodia Daily Khmer។ តាមលិខិតមួយច្បាប់​របស់​និយ័តករទូរគមនាគមន៍​កម្ពុជា​ចុះថ្ងៃទី​១២កក្កដា គណនី Instagram, Youtube និង Twitter រួម​នឹងគេហទំព័រ​សារព័ត៌មាន The Cambodia Daily Khmer ត្រូវតែបិទខ្ទប់មិនអាចចូលបើក​បាន​។ មិនខុសគ្នាដែរ គណនី​Twitter និងគេហទំព័រទាំង​២ភាសា(ខ្មែរនិងអង់គ្លេស) របស់​​វិទ្យុអាស៊ីសេរី។ ជាការសម្គាល់ ស្ថាប័នកាសែតទាំង២នេះ តែងផ្សព្វផ្សាយព័ត៌មានរស៊ើបៗពាក់ព័ន្ធនឹងរដ្ឋាភិបាលកម្ពុជា។ ជាមួយគ្នានេះ និយ័តករទូរគមនាគមន៍កម្ពុជា ក៏បាន​បញ្ជាឱ្យបិទខ្ទប់ការចូលទៅកាន់ Twitter និង​គេហទំព័រ ឈ្មោះថា «កំណត់ត្រា»ដែលទើបបើកដោយមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ CCIM។ «កំណត់ត្រា» បាន​​ចងក្រងព័ត៌មានសាធារណៈដែលមានស្រាប់ដូចជា ឯកសារដែលចេញផ្សាយដូចជាការផ្តល់ដី ការ​ផ្តល់​គោរម​ងារ​ និងការវិភាគលើ​ទិន្នន័យ​ការបោះឆ្នោតជាដើម។​ បន្ទាប់ពីសារព័ត៌មានវីអូឌីត្រូវបាន​លុប​អា​ជ្ញា​បណ្ណកាលពីខែកុម្ភៈ​CCIM បានដាក់​ឲ្យ​ដំណើរការមូលដ្ឋាន​និទ្ធន័យ​កំណត់​ត្រានេះ​​ ​កាល​ពី​ចុងខែមិថុនា ឆ្នាំ​២០២៣ ​។ជុំវិញចំណាត់ការបិទខ្ទប់ការចូលទៅគេហទំព័រ និងប្រព័ន្ធទំនាក់ទំនងសង្គមរបស់សារព័ត៌មានប្រឆាំងខាងលើ​​​នេះ​ និយ័តករទូរគមនាគមន៍កម្ពុជាបានលើកហេតុផលថា ដោយសារតែ​​វិទ្យុអាស៊ីសេរី និង The Cambodia Daily Khmer និងមូលដ្ឋានទិន្នន័យសារធារណៈ «កំណត់ត្រា» បាន​​ផ្សព្វផ្សាយព័ត៌មាន​ធ្វើឱ្យមានការភាន់ច្រលំ ប៉ះពាល់ដល់កិត្តិយសនិងកិត្យានុភាព​របស់​​រដ្ឋាភិបាល​និងមិនបាន​បំពេញលក្ខខណ្ឌក្នុងការធ្វើអាជីវកម្មនៅក្រសួងព័ត៌មាន។ ​និយ័តករទូរគមនាគមន៍កម្ពុជាបញ្ជាក់ថាក្រុមហ៊ុនផ្តល់សេវាអ៊ីនធឺណែតទាំងអស់​ត្រូវចាត់វិធានការនេះជាបន្ទាន់ឱ្យបានពេញលេញ និងត្រូវរាយការណ៍ជាផ្លូវការមកវិញនៅក្នុងរយៈពេល​៧ថ្ងៃក្រោយ។នៅថ្ងៃទី​១៨ ខែកក្កដា ឆ្នាំ​២០២៣ ​​វិទ្យុអាស៊ីសេរី និង The Cambodia Daily Khmer បានប្រកាសឱ្យ​​អ្នកតាមដានរបស់ខ្លួននៅកម្ពុជា ​​ចូលទៅប្រើប្រាស់កម្មវិធី App ជំនួសឱ្យ​បណ្តាញ​ប្រព័ន្ធសង្គមនិងគេហទំព័រ​ដែលត្រូវបានរដ្ឋាភិបាលបិទខ្ទប់នោះ ឬក៏ប្រើបណ្ដាញឯកជននិម្មិត ឬ VPN ពីក្រៅស្រុកមកវិញ។កំណត់​ត្រា​វិញបានចេញសេចក្តីថ្លែងការណ៍មួយកាលពីថ្ងៃទី​១៧ ខែ​កក្កដា ឆ្នាំ២០២៣ ដោយបញ្ជាក់ថាស្ថាប័ន​កំពុងពិនិត្យមើលបញ្ហា និងកំពុងស្វែង​រក​មធ្យោបាយដោះស្រាយ​​​ក្នុងពេលឆាប់ៗ៕RFI

រូបភាពសហការី