រុស្ស៊ី​ចោ​​ទ​​អ៊ុយក្រែន​ថា​ចង់​អូ​ស​ទាញ​​ណាតូ​ឲ្យ​ចូល​ក្នុង​​សង្គ្រាមលោក​​លើកទី៣

 អ្នកការទូតជាន់ខ្ពស់រុស្ស៊ីម្នាក់បានចោទប្រកាន់អ៊ុយក្រែនថាហាក់ដូចជាចង់អូសណាតូចូលទៅក្នុងសង្រ្គាមខណៈដែលការវាយលុករបស់ទីក្រុងគៀវបានធ្លាក់ចុះមិនដូចការរំពឹងទុក។

ឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិកលោក Anatoly Antonov ថ្លែងក្នុងព្រឹត្តិការណ៍កិច្ចការពិភពលោកនៅឯទីក្រុង San Francisco រដ្ឋកាលីហ្វ័រញ៉ា ក្នុងឆ្នាំ២០១៧។ រូបភាព Getty

ថ្លែងទៅកាន់Newsweek ឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិកលោក Anatoly Antonov បានបដិសេធការចោទប្រកាន់របស់អ៊ុយក្រែនថារុស្ស៊ីកំពុងរៀបចំការវាយប្រហារលើរោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុបនៅZaporizhia ។ ឯកអគ្គរដ្ឋទូតរុស្ស៊ីបានចោទប្រកាន់អ៊ុយក្រែនថាចង់ប្រើនេះជាលេសដើម្បីអូសណាតូចូលទៅក្នុងជម្លោះដែលអូសបន្លាយជាងមួយឆ្នាំ។កន្លងមក ភាគីទាំង២បានចោទប្រកាន់ភាគីម្ខាងទៀតថារៀបចំផែនការវាយប្រហារលើរោងចក្រថាមពលនុយក្លេអ៊ែរដែលជាសេណារីយ៉ូដែលប្រសិនបើវាកើតឡើង អាចបង្កមហន្តរាយដល់តំបន់ដ៏ធំមួយនៅអឺរ៉ុប។លោកបាននិយាយថា "ឥស្សរជនដែលកំពុងកាន់អំណាចលោកខាងលិចគួរតែយល់ថាការជាប់គាំងនៅលើសមរភូមិ(ការវាយបក)អាចធ្វើឱ្យអ៊ុយក្រែនចង់បង្កើតលេសសម្រាប់អង្គការណាតូដើម្បីដាក់ពង្រាយនៅអ៊ុយក្រែនដោយហេតុនេះបំផ្លើសជម្លោះក្នុងតំបន់ចូលទៅក្នុងសង្គ្រាមលោកលើកទី៣"លោកAntonov ចោទប្រកាន់។មុននេះ ភាគីអ៊ុយក្រែនបានចោទប្រកាន់ថា រុស្ស៊ីបានដាក់គ្រឿងផ្ទុះនៅលើដំបូលរោងចក្រនុយក្លេអ៊ែរ"ប្រហែលជាដើម្បីក្លែងធ្វើការវាយប្រហារលើរោងចក្រ"។ទោះបីជាយ៉ាងណាក៏ដោយ ទីភ្នាក់ងារថាមពលអាតូមិកអន្តរជាតិ(IAEA)ដែលមានអ្នកត្រួតពិនិត្យនៅកន្លែងនោះបាននិយាយថាគ្មានគ្រឿងផ្ទុះដូចដែលបានពិពណ៌នាដោយអ៊ុយក្រែន ត្រូវបានគេសង្កេតឃើញនៅរោងចក្រនោះទេ។ប្រធានាធិបតីអ៊ុយក្រែន លោក Volodymyr Zelensky បាននិយាយថា លោកមាន "ឯកសារ" ដែលបញ្ជាក់ថារុស្ស៊ីបានដាក់មីននិង "ត្រៀមខ្លួនជាស្រេចជាបច្ចេកទេស"ដើម្បីបើកការវាយប្រហារ។ មេដឹកនាំអ៊ុយក្រែនបាននិយាយថាIAEAមិនមានបុគ្គលិកគ្រប់គ្រាន់ក្នុងការរកឃើញឧបករណ៍គួរឱ្យសង្ស័យដែលគាត់ចោទប្រកាន់ថាអាចត្រូវបានបំផ្ទុះពីចម្ងាយ។អ្នកនាំពាក្យក្រសួងការបរទេសបានប្រាប់ Newsweek ថាមន្ត្រីអាមេរិកបានដឹងអំពីការចោទប្រកាន់របស់ Zelensky ។មន្ត្រីអាមេរិកបានព្រមានថា"រុស្ស៊ីបានលេងល្បែងដ៏គ្រោះថ្នាក់មួយជាមួយនឹងការគ្រប់គ្រងរោងចក្រថាមពលនុយក្លេអ៊ែររបស់អ៊ុយក្រែនដែលជារោងចក្រថាមពលនុយក្លេអ៊ែរដ៏ធំបំផុតនៅអឺរ៉ុប។វិទ្យុសកម្មដឹងគ្មានព្រំដែន ហើយឧប្បត្តិហេតុអាចមានឥទ្ធិពលលើសពីតំបន់ជុំវិញZaporizhia" ។សេចក្តីថ្លែងការណ៍បានសរសេរថា"យើងបន្តអំពាវនាវឱ្យរុស្ស៊ីដកបុគ្គលិកយោធានិងជនស៊ីវិលចេញពីរោងចក្រប្រគល់ការគ្រប់គ្រងពេញលេញនៃរោងចក្រទៅឱ្យអាជ្ញាធរអ៊ុយក្រែននិងបដិសេធមិនចាត់វិធានការណាមួយដែលអាចនាំឱ្យមានឧប្បត្តិហេតុនុយក្លេអ៊ែរនៅរោងចក្រ" ។លោកឯកអគ្គរដ្ឋទូត Antonovបាននិយាយថាការចោទប្រកាន់ថារុស្ស៊ីកំពុងរៀបចំការវាយប្រហារលើរោងចក្រថាមពលនុយក្លេអ៊ែរដែលខ្លួនគ្រប់គ្រងគឺគ្មានមូលដ្ឋាន។ លោកបាននិយាយថាទាំងបុគ្គលិករុស្ស៊ីនិងIAEAកំពុងការពាររ៉េអាក់ទ័រនុយក្លេអ៊ែររបស់រោងចក្រនេះ។លោកបាននិយាយថា"ជនជាតិរុស្ស៊ីធ្វើការនៅរោងចក្រនេះ។អ្នកជំនាញIAEAដែលមិនអាចជួយដឹងបានថាអ្នកណាជាអ្នកបាញ់ផ្លោងរោងចក្រនោះក៏មានវត្តមានដែរ។ រ៉េអាក់ទ័រកំពុងត្រូវបានការពារ" ។លោកAntonovបានព្រមានថារោងចក្រនេះមានហេដ្ឋារចនាសម្ព័ន្ធដែលងាយរងគ្រោះជាច្រើនដូចជាប្រព័ន្ធត្រជាក់ការផ្ទុកឥន្ធនៈនិងកាកសំណល់នុយក្លេអ៊ែរ។ លោក​ថា ប្រសិនបើ​រោងចក្រ​រង​គ្រោះ​ដោយ​អគ្គិភ័យស្ថានការណ៍​នឹង​មាន​គ្រោះថ្នាក់​ខ្លាំង ព្រោះ​វា​អាច​បង្ក​ហានិភ័យ​នៃ​ការ​បំពុល​ដោយ​វិទ្យុសកម្ម​សម្រាប់​តំបន់​ធំ៕ប្រភពNewsweek