កិច្ចសហប្រតិបត្តិការជាមួយប្រទេសចិនមានសារៈសំខាន់ណាស់ដើម្បីការពារសត្វផ្សោតទន្លេមេគង្គជិតផុតពូជនៅកម្ពុជា
មន្ត្រីជាន់ខ្ពស់មួយរូបបាននិយាយកាលពីថ្ងៃព្រហស្បតិ៍ថាកិច្ចសហប្រតិបត្តិការដែលកំពុងបន្តជាមួយប្រទេសចិនមានសារៈសំខាន់ក្នុងការជួយការពារសត្វផ្សោតទន្លេមេគង្គដែលជិតផុតពូជនៅក្នុងប្រទេសកម្ពុជា។
 |
លោកបានបន្តថា កម្ពុជាបាននិងកំពុងធ្វើការយ៉ាងជិតស្និទ្ធជាមួយវិទ្យាស្ថានវារីសាស្ត្រនៃបណ្ឌិត្យសភាវិទ្យាសាស្ត្រចិន និងមជ្ឈមណ្ឌលស្រាវជ្រាវជលផលទឹកសាប (FFRC) នៃបណ្ឌិត្យសភាវិទ្យាសាស្ត្រជលផលចិន ដើម្បីស្រាវជ្រាវ និងការពារសត្វផ្សោតទន្លេមេគង្គក្នុងប្រទេស។
លោកបានប្រាប់សារព័ត៌មានXinhua ក្នុងបទសម្ភាសន៍មួយថា “យើងមានទំនាក់ទំនងល្អជាមួយវិទ្យាស្ថាន Hydrobiology ដែលជាវិទ្យាស្ថានមួយដែលបាននិងកំពុងស្រាវជ្រាវ និងការពារសត្វផ្សោតនៅក្នុងទន្លេយ៉ាងហ្សេ (Yangtze)”ក្នុងប្រទេសចិន។
លោកបានលើកឡើងទៀត “អ្នកជំនាញមកពីវិទ្យាស្ថាននេះតែងតែផ្តល់ការគាំទ្រផ្នែកបច្ចេកទេសដល់ពួកយើង។ ឧទាហរណ៍ កាលពីប៉ុន្មានឆ្នាំមុន ពួកគេបានផ្ដល់បទបង្ហាញអំពីបទពិសោធន៍របស់ពួកគេ និងការស្រាវជ្រាវបែបវិទ្យាសាស្ត្រទំនើបដល់អ្នកជំនាញកម្ពុជារបស់យើង”។
លោកបានកោតសរសើររដ្ឋាភិបាលចិនដែលបានយកចិត្តទុកដាក់ខ្ពស់ក្នុងការការពារប្រភេទសត្វផ្សោតក្នុងទន្លេយ៉ាងហ្សេពីការផុតពូជ ដោយបានស្ដារឡើងវិញនូវចំនួនប្រភេទសត្វនេះពី១០០ ក្បាលដល់ជាង ៣,០០០ ក្បាលនាពេលបច្ចុប្បន្ន។សម្រាប់ FFRC លោកបាននិយាយថា មជ្ឈមណ្ឌលបាននឹងកំពុងជួយដល់រដ្ឋបាលជលផលក្នុងការស្រាវជ្រាវសត្វផ្សោត និងប្រភេទត្រីនៅតាមដងទន្លេមេគង្គក្នុងប្រទេសកម្ពុជា ហើយគម្រោងនេះត្រូវបានអនុវត្តតាំងពីឆ្នាំ២០២០។លើសពីនេះ លោកបាននិយាយទៀតថា រដ្ឋបាលជលផលក៏បានទទួលថវិកាពីមូលនិធិពិសេសនៃកិច្ចសហប្រតិបត្តិការមេគង្គ-ឡានឆាង ដើម្បីអនុវត្តគម្រោងការកសាងសមត្ថភាពសម្រាប់ការអភិរក្សសត្វផ្សោតទឹកសាប និងជីវចម្រុះផងដែរ។លោកបានបន្ថែមថា “នេះគឺជាសមិទ្ធិផលដែលបង្ហាញថាកម្ពុជា និងចិនមានកិច្ចសហប្រតិបត្តិការល្អ ហើយតែងតែផ្តល់ការគាំទ្រគ្នាទៅវិញទៅមកក្នុងការការពារធនធានធម្មជាតិ ជាពិសេសសត្វផ្សោតទន្លេមេគង្គ”។លោកបានបន្តថា “ខ្ញុំសង្ឃឹមថា យើងនឹងបន្តទទួលបានជំនួយបច្ចេកទេស និងហិរញ្ញវត្ថុ (ពីប្រទេសចិន) ដើម្បីយើងអាចបន្តការពារសត្វផ្សោតទន្លេមេគង្គ និងជីវចម្រុះផ្សេងៗទៀត”។សត្វផ្សោតទន្លេមេគង្គត្រូវបានចាត់ថ្នាក់ជាប្រភេទសត្វទទួលរងការគំរាមកំហែងជិតផុតពូជនៅក្នុងបញ្ជីក្រហមរបស់អង្គការសហភាពអន្តរជាតិសម្រាប់អភិរក្សធម្មជាតិ ដែលហៅកាត់ថា IUCN ក្នុងឆ្នាំ២០០៤។លោកបានលើកឡើងទៀតថា ជម្រកសត្វផ្សោតនៅលើដងទន្លេមេគង្គមានប្រវែង ១៩០ គីឡូម៉ែត្រ ចាប់ពីកោះត្រល់ទល់មុខទីរួមខេត្តក្រចេះ ដល់ព្រំដែនកម្ពុជា-ឡាវ។
លោកបានបន្ថែមថា សត្វផ្សោតប្រមាណ ៨៩ ក្បាលរស់នៅក្នុងផ្នែកប្រទេសកម្ពុជានៃទន្លេមេគង្គក្នុងឆ្នាំ ២០២០ កើនឡើងចំនួន ៩ ក្បាលពី ៨០ ក្បាលក្នុងឆ្នាំ ២០១៥ ។ “សត្វផ្សោតទន្លេមេគង្គត្រូវបានរដ្ឋាភិបាលកម្ពុជាចាត់ទុកថាជាសម្បត្តិជាតិ ហើយវាបានដើរតួនាទីយ៉ាងសំខាន់ក្នុងការទាក់ទាញភ្ញៀវទេសចរ”។លោកបាននិយាយទៀតថា ការគំរាមកំហែងយ៉ាងខ្លាំងដល់សត្វផ្សោត ជាពិសេសកូនផ្សោត គឺការនេសាទខុសច្បាប់ ដោយប្រើឧបករណ៍ខុសច្បាប់ដូចជាសំណាញ់ និងមង ដើម្បីចាប់ត្រីផ្សេងទៀតក្នុងតំបន់អភិរក្សផ្សោត។លោកបានបន្តថា “សំណាញ់មងជាឧបករណ៍នេសាទមួយប្រភេទដែលអាចសម្លាប់សត្វផ្សោតបានយ៉ាងងាយ”។ ទោះបីជាជម្រករបស់ពួកគេត្រូវបានការពារដោយច្បាប់ក៏ដោយ ក៏អ្នកនេសាទមួយចំនួននៅតែដាក់ពង្រាយសំណាញ់ដោយខុសច្បាប់នៅក្នុងតំបន់អភិរក្សសត្វផ្សោត។លោកបានបន្ថែមថា ដើម្បីទប់ស្កាត់ការនេសាទខុសច្បាប់ ឆ្មាំទន្លេចំនួន ៧២ នាក់ ត្រូវបានដាក់ពង្រាយទៅកាន់ស្ថានីយ៍ចំនួន ១៦ ដើម្បីល្បាតជម្រកសត្វផ្សោតជាប្រចាំ៕Xinhua/KhmerTimes
/unnamed.png
Post a Comment