បេសកជនចិនកំពុងមករុស្ស៊ីអ៊ុយក្រែន(Reuters,AFP)
ប្រទេសចិនបានប្រកាសថាខ្លួននឹងបញ្ជូនបេសកជនពិសេសទៅកាន់ប្រទេសរុស្ស៊ីអ៊ុយក្រែននិងបណ្តាប្រទេសនៅអឺរ៉ុបចាប់ពីដើមសប្តាហ៍ក្រោយ ដើម្បីពិភាក្សាអំពីដំណោះស្រាយនយោបាយចំពោះអរិភាព។អ្នកនាំពាក្យក្រសួងការបរទេសចិន លោក Wang Wenbin បាននិយាយនៅថ្ងៃនេះថា "ចាប់ពីថ្ងៃទី១៥ខែឧសភាលោក Li Hui បេសកជនពិសេសរបស់រដ្ឋាភិបាលចិននឹងធ្វើទស្សនកិច្ចនៅអ៊ុយក្រែន ប៉ូឡូញ បារាំង អាល្លឺម៉ង់ និងរុស្ស៊ី ដើម្បីពិភាក្សាអំពីដំណោះស្រាយនយោបាយជាមួយគ្រប់ភាគី។ព័ត៌មានអំពីដំណើរទស្សនកិច្ចរបស់លោក Li Hui ត្រូវបានក្រសួងការបរទេសចិនប្រកាសជាលើកដំបូងនៅថ្ងៃទី ២៦ ខែមេសា។ប៉ុន្តែមិនបានបញ្ជាក់នោះទេបន្ទាប់ពីមានការសន្ទនាតាមទូរស័ព្ទរវាងប្រធានាធិបតី Xi Jinping និងប្រធានាធិបតីអ៊ុយក្រែន Volodymyr Zelensky។លោក Wangបានបន្ថែមថា"នេះគឺជាការបង្ហាញមួយផ្សេងទៀតនៃការប្តេជ្ញាចិត្តរបស់ប្រទេសចិនចំពោះកិច្ចខិតខំប្រឹងប្រែងដើម្បីបញ្ចុះបញ្ចូលនិងជំរុញការសន្ទនា ដែលបង្ហាញថាប្រទេសចិនតែងតែនៅខាងសន្តិភាព"។លោក Li Hui កើតនៅឆ្នាំ១៩៥៣បានបញ្ចប់ការសិក្សាពីសាកលវិទ្យាល័យ Beijing Foreign Studies University ចេះភាសារុស្សី ហើយត្រូវបានតែងតាំងជាអនុរដ្ឋមន្ត្រីការបរទេសរបស់ប្រទេសចិនក្នុងឆ្នាំ ២០០៨។១ឆ្នាំក្រោយមកលោកត្រូវបានបញ្ជូនទៅកាន់ទីក្រុងម៉ូស្គូជាឯកអគ្គរដ្ឋទូតសម្រាប់រយៈពេល២០០៩-២០១៩ដោយក្លាយជា ឯកអគ្គរដ្ឋទូតចិនដែលមានអាណត្តិយូរជាងគេនៅរុស្ស៊ី។ក្នុងអំឡុងពេលលោក Li ជាឯកអគ្គរដ្ឋទូត លោកប្រធានាធិបតី Xi Jinping បានធ្វើដំណើរទស្សនកិច្ចផ្លូវការចំនួន៩លើកទៅប្រទេសរុស្ស៊ី។ ប៉ុន្មានខែមុនអាណត្តិរបស់លោក Li ជាឯកអគ្គរដ្ឋទូតបានបញ្ចប់ ប្រធានាធិបតីរុស្ស៊ីលោកVladimir Putin បានបង្ហាញជូនលោកនូវមេដាយមិត្តភាពសម្រាប់ការរួមចំណែកដ៏ធំធេងរបស់លោកក្នុងការពង្រឹងទំនាក់ទំនងរវាងប្រទេសទាំង២។ប្រទេសចិនកាលពីខែកុម្ភៈបានប្រកាសផែនការសន្តិភាព១២ចំណុចសម្រាប់វិបត្តិអ៊ុយក្រែន ដែលរួមមានការអំពាវនាវឱ្យមានការបន្ធូរបន្ថយនិងបទឈប់បាញ់។ អាមេរិកបានច្រានចោលសំណើនេះដោយសារតែចិនបដិសេធមិនថ្កោលទោសរុស្ស៊ីនិងបានប្រកែកថាបទឈប់បាញ់នឹងផ្តល់ពេលវេលាបន្ថែមដល់យោធារុស្ស៊ីក្នុងការពង្រាយកម្លាំងឡើងវិញ។អ៊ុយក្រែនស្វាគមន៍ការចូលរួមការទូតរបស់ចិន។ប៉ុន្តែលោក Zelensky បាននិយាយថា ដំណោះស្រាយដោយសន្តិវិធីនឹងត្រូវបានពិចារណាតែបន្ទាប់ពីទាហានរុស្ស៊ីចាកចេញពីទឹកដីអ៊ុយក្រែន៕
អ្នកនាំពាក្យក្រសួងការបរទេសចិន លោក Wang Wenbin ។
Post a Comment