នាយករដ្ឋមន្ត្រីហ៊ុន សែននឹងអញ្ជើញទៅចូលរួមកិច្ចប្រជុំលើកទី៣ស្ដីពីគំនិតផ្តួចផ្តើមខ្សែក្រវ៉ាត់មួយផ្លូវមួយនៅប្រទេសចិននាខែតុលា
សម្ដេចហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាក់ឱ្យដឹងថាសម្ដេចនឹងដឹកនាំគណៈប្រតិភូអញ្ជើញទៅចូលរួមកិច្ចប្រជុំលើកទី៣ ស្ដីពីគំនិតផ្តួចផ្តើមខ្សែក្រវ៉ាត់មួយផ្លូវមួយនៅប្រទេសចិននាខែតុលា ឆ្នាំ២០២៣ខាងមុខ។
ការគូសបញ្ជាក់របស់សម្ដេចនាយករដ្ឋមន្រ្ដីនេះ ក្នុងពិធីសំណេះសំណាលជាមួយ កម្មករ និយោជិត ទស្សនាពិព័រណ៍សមិទ្ធផលនិងពិធីសម្ពោធដាក់ឱ្យដំណើរការរោងចក្រផលិតសំបកកង់ដើម្បីអបអរសាទរខួបលើកទី១០នៃគំនិតផ្តួចផ្តើមខ្សែក្រវ៉ាត់មួយ ផ្លូវមួយ នៅតំបន់សេដ្ឋកិច្ចពិសេស ក្រុងព្រះសីហនុ ខេត្ដព្រះសីហនុ នាព្រឹកថ្ងៃចន្ទ ៣កើត ខែជេស្ឋ ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី២២ ខែឧសភាឆ្នាំ២០២៣។សម្ដេចហ៊ុន សែន បានលើកឡើងថា ប្រទេសកម្ពុជានឹងរៀបចំការបោះឆ្នោតថ្នាក់ជាតិនៅខែកក្កដា ឆ្នាំ២០២៣ ខាងមុខ ហើយការបង្កើតរាជរដ្ឋាភិបាលថ្មីអាចនៅចុងខែសីហា ឬដើមខែកញ្ញាឆ្នាំ២០២៣។ដូច្នេះការទៅចូលរួមកិច្ចប្រជុំនៅប្រទេសចិននេះ គឺក្នុងនាមរាជរដ្ឋាភិបាលថ្មីតែនៅតែស្ថិតក្រោមការដឹកនាំរបស់គណបក្សប្រជាជនកម្ពុជាដដែល។សម្ដេចបានថ្លែងថាបើពិនិត្យមើលនយោបាយរបស់ចិននៅពេលនេះមិនមានការប្រកាសធ្វើជាសត្រូវជាមួយប្រទេសណាទេ ទោះបីអ្នកដទៃបានរកវិធីរារាំងចិនឬប្រឆាំងចិន។ក៏ប៉ុន្តែចិនមិនដែលដាក់ចេញនូវគោលនយោបាយរារាំងឬក៏ធ្វើជាសត្រូវជាមួយប្រទេសណាទេ។ សម្តេចនាយករដ្ឋមន្រ្ដីគូសបញ្ជាក់ថាចិនមិនដែលមកបង្គាប់កម្ពុជាឱ្យធ្វើនេះធ្វើនោះឬមិនឱ្យទៅសេពគប់ប្រទេសនេះ ប្រទេសនោះទេ។ សម្តេចហ៊ុនសែនបានថ្លែងបញ្ជាក់បន្ថែមថាកម្ពុជាអនុវត្តន៍គោលនយោបាយការបរទេសឯករាជ្យតែគោរពទៅតាមច្បាប់៕AKP
Post a Comment