កម្ពុជាជាប់ឆ្នោតជាសមាជិកស្ថាប័នចំណុះចំនួន២របស់អង្គការសហប្រជាជាតិ
យោងតាមសេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិបានឱ្យដឹងថាប្រទេសកម្ពុជាត្រូវបានជាប់ឆ្នោតជាសមាជិកស្ថាប័នចំណុះចំនួន២របស់អង្គការសហប្រជាជាតិ គឺ ISAR និង UNAIDS ។
សេចក្តីប្រកាសព័ត៌មានបានគូសបញ្ជាក់ថាក្នុងអំឡុងសម័យប្រជុំរបស់ខ្លួនក្នុងខែមេសាឆ្នាំ២០២៣ ក្រុមប្រឹក្សាសេដ្ឋកិច្ច និងសង្គមរបស់អង្គការសហប្រជាជាតិ (ECOSOC) បានរៀបចំការបោះឆ្នោតមួយដើម្បីបំពេញកន្លែងទំនេរជាច្រើននៃស្ថាប័នចំណុះចំនួន១៤នៃ ECOSOC ។ ព្រះរាជាណាចក្រកម្ពុជាត្រូវបានជាប់ឆ្នោតឲ្យកាន់តំណែងសំខាន់ៗចំនួន២ដូចខាងក្រោម៖១. សមាជិកពេញសិទ្ធនៃក្រុមការងារអន្តររដ្ឋាភិបាលនៃអ្នកជំនាញលើស្តង់ដារគណនេយ្យ និងរាយការណ៍អន្តរជាតិ (ISAR) សម្រាប់អាណត្តិ ២០២៤-២០២៦ ដែលចាប់ផ្តើមនៅថ្ងៃទី១ ខែមករា ឆ្នាំ២០២៤ និង២. សមាជិកភាពនៃក្រុមប្រឹក្សាសម្របសម្រួលកម្មវិធី (PCB) នៃកម្មវិធីរួមរបស់អង្គការសហប្រជាជាតិប្រយុទ្ធប្រឆាំងជំងឺអេដស៍ (Joint United Nations Program on HIV / AIDS-UNAIDS) សម្រាប់តំបន់អាស៊ីប៉ាស៊ីហ្វិក សម្រាប់អាណត្តិ២០២៣-២០២៥ ដែលចាប់ផ្តើមពីថ្ងៃទី៥ ខែមេសា ឆ្នាំ២០២៣ ដល់ថ្ងៃទី៣១ ខែធ្នូ ឆ្នាំ២០២៥។ប្រភពបានគូសបញ្ជាក់ថា ការជាប់ឆ្នោតជាសមាជិកISAR និង UNAIDS PCB បង្ហាញពីទំនុកចិត្តរបស់សហគមន៍អន្តរជាតិចំពោះប្រទេសកម្ពុជា និងការទទួលស្គាល់របស់សហគមន៍អន្តរជាតិចំពោះការកសាងប្រទេសជាតិឡើងវិញ និងការគ្រប់គ្រងប្រកបដោយជោគជ័យនៃការរីករាលដាលមេរោគអេដស៍ និងជំងឺអេដស៍ ក៏ដូចជាការរួមចំណែករបស់ខ្លួនចំពោះអង្គការសហប្រជាជាតិ និងការខិតខំប្រឹងប្រែងរួមគ្នាសម្រាប់ពិភពលោកកាន់តែប្រសើរ។នេះជាសមិទ្ធផលដ៏គួរឲ្យកត់សម្គាល់មួយក្នុងចំណោមសិទ្ធផលជាច្រើនដែលព្រះរាជាណាចក្រកម្ពុជាសម្រេចបានក្នុងការលើកកម្ពស់កិត្យានុភាពជាតិ និងការចូលរួមយ៉ាងសកម្មក្នុងកិច្ចការអន្តរជាតិ។សេចក្តីប្រកាសព័ត៌មានបានបន្តថា៖ «រាជរដ្ឋាភិបាលកម្ពុជា សូមថ្លែងអំណរគុណយ៉ាងជ្រាលជ្រៅចំពោះការគាំទ្រ និងការជឿទុកចិត្តរបស់រដ្ឋាភិបាលទាំងអស់ ដែលបោះឆ្នោតគាំទ្រព្រះរាជាណាចក្រកម្ពុជា ដើម្បីបំពេញតួនាទីសំខាន់ៗទាំងនេះ៕AKP/KhmerTimes
/unnamed.png
Post a Comment