នាយករដ្ឋមន្ត្រី៖កម្ពុជានឹងបន្តប្រកាន់យកនូវគុណតម្លៃនិងទស្សនៈវិជ្ជារបស់ព្រះពុទ្ធសាសនា
សម្តេចហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជាបានលើកឡើងថា កម្ពុជានឹងបន្តប្រកាន់យកនូវគុណតម្លៃគុណធម៌និងទស្សនៈវិជ្ជារបស់ព្រះពុទ្ធសាសនាហើយប្រជាជនកម្ពុជានឹងបន្តទទួលបាននូវសេរីភាពខាងសាសនាដោយមានចែងក្នុងរដ្ឋធម្មនុញ្ញ។
ការលើកឡើងរបស់សម្តេចនេះ ក្នុងឱកាសអញ្ជើញទទួលគោរមងារកិត្តិយស«ពុទ្ធមាមកាភិបាល»និងសញ្ញាបត្របណ្ឌិតកិត្តិយសផ្នែក«មនុស្សសាស្ត្រ និងសាមគ្គីភាព» នាព្រឹកថ្ងៃទី២ ខែឧសភា ឆ្នាំ២០២៣ នៅរមណីដ្ឋានវប្បធម៌ និងប្រវត្តិសាស្ត្រវត្តភ្នំ។សម្តេចហ៊ុន សែន បានថ្លែងថា៖ «ក្នុងនាមរាជរដ្ឋាភិបាលកម្ពុជាសូមបញ្ជាក់សារជាថ្មីថាកម្ពុជានឹងបន្តយកប្រកាន់យកនូវគុណតម្លៃ គុណធម៌ និងទស្សនវិជ្ជារបស់ព្រះពុទ្ធសាសនាហើយប្រជាជនកម្ពុជាទាំងអស់នឹងបន្តទទួលបាននូវសេរីភាពខាងសាសនាដោយមានចែងក្នុងរដ្ឋធម្មនុញ្ញរបស់យើង»។សម្តេចនាយករដ្ឋមន្រ្ដីក៏បានអំពាវនាវឱ្យអង្គការពុទ្ធសាសនិកពិភពលោក ក្រុមប្រឹក្សាវប្បធម៌អាស៊ីនិងសហគមន៍ព្រះពុទ្ធសាសនាកម្ពុជា និងអន្តរជាតិមកពីគ្រប់និកាយធ្វើការរួមគ្នាជាមួយអង្គការយូណេស្កូ និងទីភ្នាក់ងារអង្គការសហប្រជាជាតិដទៃទៀតដើម្បីលើកកម្ពស់សុខដុមបនីយកម្មអន្តរសាសនាជាតិ និងអន្តរជាតិដើម្បីទទួលបាននូវគោលដៅរួមរបស់យើងគឺសន្តិភាពនិងស្ថិរភាព ។ជាមួយគ្នានេះ សម្ដេចក៏បានចាត់ទុកថា ពុទ្ធឱវាទរបស់ព្រះសម្មាសម្ពុទ្ធគឺជាទស្សនៈវិជ្ជាមូលដ្ឋាននៃភាពប្រាកដនិងជាក់ស្ដែងនិយមដែលផ្ដល់តម្លៃដល់ការប្រកាន់យកនូវភាពអហិង្សាការអត់ឱន ការយកចិត្តទុកដាក់ ការគោរព សេចក្តីស្រឡាញ់ មេត្តានិងករុណា ។សម្តេចតេជោនាយករដ្ឋមន្រ្ដីបានគូសបញ្ជាក់ថា៖ «ការផ្ដល់គោរមងារ និងសញ្ញាបត្រកិត្តិយសនៅថ្ងៃនេះគឺជាកិត្តិយសដ៏ឧត្តុង្គឧត្តមសម្រាប់ ខ្ញុំព្រះករុណាខ្ញុំ និងប្រជាជនកម្ពុជាទាំងអស់ដែលបានបង្ហាញពីទំនាក់ទំនងដែលមិនអាចកាត់ថ្លៃបានរវាងព្រះពុទ្ធសាសនា សន្តិភាព ការអភិវឌ្ឍ និងសន្តិសហវិជ្ជមានប្រកបដោយសុខដុមរមនារបស់មនុស្សជាតិ»។សម្តេចហ៊ុនសែនក៏បញ្ជាក់បន្ថែមថាការផ្ដល់ជូននេះគឺពិតជានិមិត្តរូបនៃពុទ្ធឱវាទនៃព្រះសម្មាសម្ពុទ្ធដែលបានជ្រាបចូលទៅក្នុងជីវិតរស់នៅរបស់មនុស្សលោកទាំងទិដ្ឋភាពសង្គម វប្បធម៌ នយោបាយ និងសេដ្ឋកិច្ច ។ ក្នុងនាមជាពុទ្ធសាសនិកមួយរូបសម្តេចតេជោនាយករដ្ឋមន្រ្ដីបានឈ្វេងយល់ឃើញថាពុទ្ធឱវាទរបស់ព្រះសម្មាសម្ពុទ្ធគឺជាទស្សនៈវិជ្ជាមូលដ្ឋាននៃភាពប្រាកដនិងជាក់ស្ដែងនិយមដែលផ្ដល់តម្លៃដល់ការប្រកាន់យកនូវភាពអហិង្សាការអត់ឱន ការយកចិត្តទុកដាក់ការគោរព សេចក្តីស្រឡាញ់ មេត្តា និងករុណា ។សម្តេចហ៊ុន សែន បានអះអាងដែរថា គុណតម្លៃទាំងអស់នេះគឺជាប្រភពនៃការបំផុសគំនិតដ៏សំខាន់បំផុតរបស់សម្តេច និងជាពន្លឺនៃការដឹកនាំជីវិតផ្ទាល់ខ្លួន និងការបំពេញវិជ្ជាជីវៈរបស់សម្តេចជាប្រចាំ៕AKP
/unnamed.png
Post a Comment