នាយករដ្ឋមន្រ្តី៖ជីវិតពោរពេញទៅដោយកំណែទម្រង់យកក្បាលទៅប្តូរ
សម្តេចហ៊ុន សែននាយករដ្ឋមន្រ្តីនៃកម្ពុជាបានគូសបញ្ជាក់ថា ក្នុងជីវិតរបស់សម្តេចនេះគឺជាជីវិតពោរពេញទៅដោយកំណែទម្រង់ ហើយសុទ្ធតែយកក្បាលទៅប្តូរជាមួយនឹងការរស់ឡើងវិញរបស់ប្រទេស ប្ដូរនឹងសន្តិភាពសម្រាប់ប្រទេសប្ដូរនឹងកំណែទម្រង់ទាំងឡាយ ។
ជាពិសេសវិស័យសេដ្ឋកិច្ចដែលក្នុងនោះក៏មានចំណែកការកែទម្រង់ដីធ្លីផងដែរ។ការគូសបញ្ជាក់របស់សម្តេចនាយករដ្ឋមន្រ្ដីបែបនេះក្នុងពិធីប្រគល់សញ្ញាបត្រជូននិស្សិតបញ្ចប់ការសិក្សាផ្នែកកសិកម្មជាង៣ពាន់នាក់ នៃសាកលវិទ្យាល័យភូមិន្ទកសិកម្ម នាព្រឹកថ្ងៃទី១៥ ខែឧសភា ឆ្នាំ២០២៣ នៅមជ្ឈមណ្ឌលសន្និបាតនិងពិព័រណ៍កោះពេជ្រ។សម្តេចហ៊ុន សែន បានមានប្រសាសន៍ថា៖«ខ្លួនខ្ញុំនិយាយតាមមួយបែបទៅគឺយកក្បាលទៅប្ដូរទាំងអស់យកក្បាលទៅប្ដូរដើម្បីជីវិតមនុស្ស ដើម្បីការរស់រានមានជីវិតរបស់ប្រជាពលរដ្ឋនៅថ្ងៃ៧មករា១៩៧៩ ។ យកក្បាលទៅប្ដូរជាមួយសន្តិភាពដោយចូលទៅក្នុងតំបន់ខ្មែរក្រហមធ្វើយ៉ាងម៉េចបញ្ចប់សង្គ្រាមនាំមកនូវការឯកភាពជាតិឯកភាពទឹកដី»។សម្តេចហ៊ុនសែនថ្លែងថាកំណែទម្រង់ដីធ្លីមិនមែនជារឿងតូចតាចនោះទេហើយបើមិនផ្ដើមចេញពីកំណែទម្រង់ដីកសិកម្មក៏មិនអាចរីកចម្រើនដែរ ខណៈការអភិវឌ្ឍប្រទេសកម្ពុជានេះក៏មិនអាចទៅរួចដែរ ។ ប៉ុន្តែក្នុងបញ្ហាកំណែទម្រង់ដីធ្លីឬកំណែទម្រង់សេដ្ឋកិច្ចនិយាយជារួមគឺមិនមែនជាបញ្ហាតូចតាចទេគឺក៏មានចរិកយកក្បាលទៅដូរដែរ។សម្តេចនាយករដ្ឋមន្រ្ដីបានលើកឡើងថាជីវិតនយោបាយរបស់សម្ដេចអាត្រូវបញ្ចប់ព្រោះសម្ដេចធ្លាប់បាននិយាយហើយថាកម្លាំងសង្កត់៣មកលើកខ្លួនសម្ដេចក្នុពេលដែលសម្ដេចដឹកនាំកំណែទម្រង់នយោបាយ និងសេដ្ឋកិច្ច។សម្ដេចបន្ដថាកម្លាំងសង្កត់ទី១គឺផ្ទៃក្នុងខ្លួនឯងមិនយល់អ្វីហៅថាការចរចាអ្វីហៅថាដំណោះស្រាយនយោបាយដើម្បីសន្តិភាពបង្រួបបង្រួមជាតិបញ្ចប់សង្គ្រាម"ផ្ទៃក្នុងមិនយល់"។ទន្ទឹមនេះកងទ័ពវៀតណាមចូលមកក្នុងប្រទេសកម្ពុជាជួយយើងអមដោយជំនាញការវៀតណាមក្នុងពេលដែលវៀតណាមអត់ទាន់ធ្វើកំណែទម្រង់នៅឡើយទេ។សម្ដេចបានថ្លែងបញ្ជាក់ថាវៀតណាមនៅធ្វើសហករណ៍ក្នុងពេលដែលកម្ពុជាបានប្ដូរផ្ដាច់រុញសេដ្ឋកិច្ចនេះឱ្យទៅជាសេដ្ឋកិច្ចឯកជន។ប៉ុន្តែវៀតណាមបានគោរពនូវការចាត់វិធានការរបស់កម្ពុជា។ចំណែកម្លាំងសង្កត់ទី៣ពេលនោះគឺកម្ពុជាទទួលជំនួយពីសូវៀត និងអឺរ៉ុបខាងកើតដែលហៅថាគណៈកម្មការកូមេគង្គ ហើយពេលនោះក៏មិនទាន់មានកំណែទម្រង់នៅសហភាពសូវៀត ប៉េរ៉េសស្ត្រូកាឬក្លាស្នូសនោះដែរ។«អីចឹងទេបើសិនជាពេលនោះខាងម៉ុស្គូគេថាបើទុកហ៊ុនសែនគេនឹងឈប់ផ្ដល់ជំនួយខ្ញុំនឹងទទួលរងគ្រោះដូចគ្នាដែរ។ អីចឹងក្នុងជីវិតរបស់ខ្ញុំនេះគឺជាជីវិតពោរពេញទៅដោយកំណែទម្រង់ហើយសុទ្ធតែយកក្បាលទៅប្តូរជាមួយនឹងការងាររស់ឡើងវិញរបស់ប្រទេសប្ដូរនឹងសន្តិភាពសម្រាប់ប្រទេស ប្ដូរនឹងកំណែទម្រង់ទាំងឡាយ ។ជាពិសេសវិស័យសេដ្ឋកិច្ចក្នុងហ្នឹងមានចំណែកកែទម្រង់ដីធ្លី» ។សម្តេចនាយករដ្ឋមន្រ្ដីបានបញ្ជាក់បន្ថែមថា៖ «នេះជារឿងជាក់ស្ដែង ហើយខ្ញុំមិនមានទម្លាប់ទៅដណ្ដើមស្នាដៃអ្នកណាទេ។ប៉ុន្តែសូមអ្នកដទៃកុំដណ្ដើមយករបស់ខ្ញុំទៅបានហើយ។ខ្ញុំមិនដណ្ដើមរបស់អ្នកដទៃទេ តែសូមអ្នកដទៃកុំដណ្ដើមរបស់ខ្ញុំតែប៉ុណ្ណឹងទេ។និយាយការពិតទៅបានហើយខ្ញុំមិននិយាយឱ្យលើសពីហ្នឹងទេ»៕AKP
Post a Comment