នាយករដ្ឋមន្ត្រីហ៊ុនសែនគំរាមបណ្តេញថ្នាក់ដឹកនាំទូរទស្សន៍ជាតិ
ការយល់ពីទីតាំងឱកាសពេលវេលាងាយនឹងផុយស្រួយពីតំណែងណាស់។សម្តេចនាយករដ្ឋមន្ត្រី ហ៊ុន សែនពីម្សិលមិញបានស្ដីបន្ទោសលោកខៀវ កាញារីទ្ធ រដ្ឋមន្ត្រីក្រសួងព័ត៌មានព្រមទាំងគំរាមបណ្ដេញលោក ឃឹម វុទ្ធី អគ្គនាយកទូរទស្សន៍ជាតិកម្ពុជាដែលមិនខំប្រឹងផ្សព្វផ្សាយអំពីការប្រកួតកីឡាស៊ីហ្គេមបន្ទាប់ពីខកខានផ្សាយការប្រកួតកីឡាបាល់ទាត់កាលពីថ្ងៃអាទិត្យ។
បញ្ហានេះត្រូវបានសម្តេចនាយករដ្ឋមន្ត្រី ហ៊ុន សែន លើកធ្វើឡើងនៅក្នុងពិធីបើកការដ្ឋានសាងសង់ពង្រីកកំពង់ផែក្រុងព្រះសីហនុ ការអបអរខួប៧០ឆ្នាំទំនាក់ទំនងកម្ពុជាជប៉ុននិងទិវាពលកម្មអន្តរជាតិ ដែលប្រារព្ធធ្វើកាលពីម្សិលមិញនៅខេត្តព្រះសីហនុ បន្ទាប់ពីសម្តេចពុំឃើញការផ្សាយអំពីការប្រកួតកីឡាបាល់ទាត់ស៊ីហ្គេមកាលពីថ្ងៃយប់ថ្ងៃអាទិត្យ។សម្តេចនាយករដ្ឋមន្ត្រី ហ៊ុន សែន បាននិយាយថាកាលពីយប់ថ្ងៃអាទិត្យ សម្តេចបានបើកទូរទស្សន៍ជាតិដើម្បីទស្សនាការប្រកួតកីឡាបាល់ទាត់ដែលរៀបចំនៅក្នុងប្រទេសកម្ពុជា។ប៉ុន្តែគ្រប់ប៉ុស្ដិ៍ទាំងអស់មិនមានការផ្សាយនោះទេ។សម្តេចបញ្ជាក់ថា៖«ខ្ញុំបានហៅទូរសព្ទសួរទៅទូរទស្សន៍ជាតិ។ ទូរទស្សន៍ជាតិឆ្លើយថាគាត់ផ្សាយតែការប្រកួតរវាងគូប្រកួតកម្ពុជានិងគូបរទេស»។សម្តេចបន្តថា៖«ខ្ញុំផ្ដាំទៅទូរទស្សន៍ជាតិត្រូវតែផ្សាយឱ្យបាន ប្រសិនបើផ្សាយមិនឱ្យបានមុនម៉ោង៩យប់ទេ អគ្គនាយកត្រូវដកចេញទាំងអស់»។សម្តេចបានស្ដីបន្ទោសរដ្ឋមន្ត្រីក្រសួងព័ត៌មាននិងអ្នកគ្រប់គ្រងស្ថានីយទូរទស្សន៍ជាតិថា៖«ថ្នាក់គ្រប់គ្រងទូរទស្សន៍ជាតិនិងរដ្ឋមន្ត្រីបាត់ទៅណា? ខ្ញុំបានរំលឹកហើយទាក់ទងនឹងការផ្សាយនេះត្រូវតែយកចិត្តទុកដាក់។ប៉ុន្តែពួកគេធ្វើមិនដឹង។ ប្រសិនបើការផ្សាយតាមទូរទស្សន៍ប៉ុណ្ណឹងមិនបានទេនាំគ្នាចុះចេញពីតំណែង។ខ្ញុំដកចេញពីមុនស៊ីហ្គេម»។សម្តេចបានលើកឡើងថាមកទាល់នឹងពេលនេះការប្រកួតកីឡាឈានមកដល់វិញ្ញាសាទី១១ហើយ។ប៉ុន្តែមិនមាននរណាផ្សាយ។នៅសល់តែបីបួនថ្ងៃទៀតព្រឹត្តិការណ៍ប្រកួតកីឡាស៊ីហ្គេមនឹងចាប់ផ្ដើមជាផ្លូវការហើយ។ សម្តេចនាយករដ្ឋមន្ត្រីចង់ឱ្យស៊ីហ្គេមក្លាយជាបុណ្យជាតិដែលអបអរទូទាំងប្រទេស ដោយសម្រួលការលំបាករបស់ប្រជាពលរដ្ឋដែលចង់មើលការប្រកួត តែបែរជាខកចិត្តវិញដោយសារទូរទស្សន៍ជាតិមិនបានផ្សាយទូលំទូលាយពីព្រឹត្តិការណ៍កីឡានេះ។សម្តេចបន្ថែមថា៖ «កុំមកបង្ខូចព្រឹត្តិការណ៍របស់គេក្នុងពេលដែលខ្លួនឯងមានសម្ភារៈគ្រប់គ្រាន់ ហើយទទួលបន្ទុកការផ្សព្វផ្សាយ»។ជាមួយគ្នានេះសម្តេចនាយករដ្ឋមន្ត្រីបានស្នើដល់ស្ថានីយទូរទស្សន៍ឯកជនធ្វើការផ្សព្វផ្សាយអំពីការប្រកួតកីឡានេះឱ្យបានទូលំទូលាយ ប្រសិនបើទូរទស្សន៍ជាតិកម្ពុជាខ្ជិលធ្វើការលើរឿងនេះ។សម្តេចនិយាយថា៖ «ក្រុមហ៊ុនខ្លះមានស្ថានីយទូរទស្សន៍ចំនួន២និងក្រុមហ៊ុនខ្លះមានស្ថានីយទូរទស្សន៍រហូតដល់ទៅ៣ក៏មាន»។លោក ប៉ាវ ម៉េងស្រ៊ុន អ្នកគ្រប់គ្រងការផលិតកម្មវិធីនៃស្ថានីយន៍ទូរទស្សន៍ជាតិកម្ពុជា មិនអាចឆ្លើយតបលើបញ្ហានេះបានទេពីម្សិលមិញ ដោយលោកនិយាយថា លោកកំពុងជាប់រវល់ប្រជុំ។លោក មាស សោភ័ណ្ឌ អ្នកនាំពាក្យក្រសួងព័ត៌មាន បានលើកឡើងថាបញ្ហាការខកខាននៃការផ្សាយរបស់ទូរទស្សន៍ជាកម្ពុជាបណ្ដាលមកពីការរៀបចំកាលវិភាគនៃការផ្សាយ ។ប៉ុន្តែបន្ទាប់ពីមានការណែនាំពីនាយករដ្ឋមន្ត្រី ក្រសួងព័ត៌មាន អគ្គនាយកដ្ឋានទូរទស្សន៍ជាតិកម្ពុជាកំពុងតែជួបប្រជុំគ្នាដើម្បីរៀបចំផែនការផ្សព្វផ្សាយបន្ថែមទៀតសម្រាប់ការប្រកួនកីឡាស៊ីហ្គេមដែលកម្ពុជាធ្វើជាម្ចាស់ផ្ទះរៀបចំព្រឹត្តិការណ៍នេះ។លោកបញ្ជាក់ថា ទាក់ទងនឹងការផ្សព្វផ្សាយនេះដែរ គឺអគ្គនាយកដ្ឋានទូរទស្សន៍ជាតិកម្ពុជានឹងបន្តការខិតខំក្នុងកិច្ចសហប្រត្តិការជាមួយមជ្ឈមណ្ឌលផ្សព្វផ្សាយអន្តរជាតិ IBC របស់ CAMSOK និងវិស័យឯកជន ដើម្បីរៀបចំការផលិតនិងផ្សព្វផ្សាយឱ្យបានកាន់តែទូលំទូលាយ ហើយទូរទស្សន៍ជាតិកម្ពុជានឹងផ្សព្វផ្សាយឱ្យបានគ្រប់ការប្រកួតទាំងអស់។លោកបាននិយាយថា៖ «ទូរទស្សន៍ជាតិកម្ពុជានឹងបន្តខិតខំផលិតកម្មវិធីនៃប្រភេទវិញ្ញាសារផ្សេងៗទៀត ដើម្បីផ្សព្វផ្សាយឱ្យបានទូលំទូលាយឱ្យបានគ្រប់មធ្យោបាយដែលអគ្គនាយកដ្ឋានទូរទស្សន៍ជាតិកម្ពុជាមាន និងគ្រប់មធ្យោបាយផ្សេងៗទៀតដែលក្រសួងព័ត៌មានមានផងដែរ»។លោកបន្តថា៖ «ការផ្សព្វផ្សាយរបស់ទូរទស្សន៍ជាតិកម្ពុជាមានវិសាលភាពគ្របដណ្ដប់ទូទាំង ដោយសារតែយើងមានស្ថានីយផ្សាយបន្តនៅតាមបណ្ដាខេត្តទាំងអស់ ហើយនៅតាមបណ្ដាប្រទេសមួយចំនួនទាំងនៅក្នុងតំបន់និងនៅលើពិភពលោក»៕Khmer Times
/unnamed.png
Post a Comment