ទីម័រខាងកើតស្នើឱ្យកម្ពុជាពិនិត្យជួយដល់វិស័យកសិកម្ម
លោកKay Rala Xanana Gosmao អតីតប្រធានាធិបតី និងនាយករដ្ឋមន្ត្រីនៃប្រទេសទីម័រខាងកើតបានស្នើសុំឱ្យសម្ដេចហ៊ុន សែន ពិនិត្យជួយដល់វិស័យកសិកម្មដើម្បីកាត់បន្ថយការនាំចូលស្បៀងពីប្រទេសដទៃ។
លោកអ៊ាង សុផល្លែតជំនួយការផ្ទាល់សម្ដេចតេជោបានឱ្យដឹងដូច្នេះ បន្ទាប់ពីសម្ដេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអនុញ្ញាតឱ្យលោកKay Rala Xanana Gosmao អតីតប្រធានាធិបតី និងនាយករដ្ឋមន្ត្រី នៃប្រទេសទីម័រខាងកើត ចូលជួបសម្ដែងការគួរសម និងពិភាក្សាកាងារ នារសៀលថ្ងៃទី ០៦ ខែឧសភា ឆ្នាំ២០២៣ នៅវិមានសន្តិភាព។ក្នុងជំនួបនោះ លោកGosmao បានគោរពនិងសម្ដែងនូវការភ្ញាក់ផ្អើលចំពោះការរីកចម្រើនយ៉ាងឆាប់ រហ័សរបស់កម្ពុជា ក្នុងរយៈពេល៣ឆ្នាំកន្លងមក ហើយបានសម្ដែងនូវការអបអរសាទរ ជូនចំពោះសម្ដេចហ៊ុនសែននិងប្រជាជនកម្ពុជាទាំងមូល ចំពោះការរៀបចំព្រឹត្តិការណ៍បើកការប្រកួតកីឡាស៊ីហ្គេមលើកទី៣២។ លោកGosmao បានមានប្រសាសន៍ថា នេះជាលើកទី១ហើយ ដែលលោកបានធ្វើជាសាក្សីនៃព្រឹត្តិការណ៍ដ៏អស្ចារ្យជាប្រវត្តិសាស្ត្រនេះ។លោកក៏បានថ្លែងអំណរគុណចូនចំពោះសម្ដេចរាជរដ្ឋាភិបាលកម្ពុជា ដែលបានជួយប្រទេសទីម័រខាងកើតឱ្យបានចូលជាសមាជិកអាស៊ានជួយទីម័រខាងកើតក្នុងការទប់ស្កាត់ការរីករាលដាលជំងឺកូវីដ១៩ និងបានគោរពស្នើសុំសម្ដេចហ៊ុនសែនពិនិត្យជួយដល់វិស័យកសិកម្ម ដើម្បីកាត់បន្ថយការនាំចូលស្បៀងពីប្រទេសដទៃ។ជាការឆ្លើយតប សម្ដេចនាយករដ្ឋមន្ត្រីបានថ្លែងអណរគុណចំពោះលោកGosmao ដែលបាន អញ្ជើញមកចូលរួមក្នុងព្រឹត្តិការណ៍បើកកីឡាស៊ីហ្គេមនៅព្រះរាជាណាចក្រកម្ពុជានិងបញ្ជូនកីឡាករកីឡាការិនីមកចូលរួមប្រកួតដែលធ្វើឱ្យស៊ីហ្គេមនៅព្រះរាជាណាចក្រកម្ពុជាមានភាពកាន់តែ អធិកអធ៌មថែមទៀត។ ពាក់ព័ន្ធនឹងការងារអាស៊ានសម្ដេចនាយករដ្ឋមន្រ្ដីបានជូនជាអនុសាសន៍ ឱ្យពិនិត្យយកចិត្តទុកដាក់លើការងារសសរស្ដម្ភទាំង៣។ដោយឡែកលើវិស័យកសិកម្ម សម្ដេចហ៊ុនសែនបានជម្រាបជូនលោក Gosmao ថា សម្ដេចនឹងបញ្ជូន អ្នកជំនាញកសិកម្មទៅពិនិត្យមើលស្ថានភាពដី និងស្ថានភាពទីតាំងជាក់ស្ដែង ដើម្បីជួយដល់ ផលិតកម្ម កសិកម្មនៅប្រទេសទីម័រខាងកើត៕AKP
Post a Comment