នាយករដ្ឋមន្រ្តីហ៊ុន សែនចង់ឃើញប្រទេសម្ចាស់កម្ចីនានាប្រើវិធីសាស្ត្រដូចជប៉ុនដើម្បីដោះបំណុលដែលកម្ពុជាជំពាក់
សម្តេចនាយករដ្ឋមន្រ្តីហ៊ុនសែនចង់ឃើញប្រទេសម្ចាស់កម្ចីនានាប្រើវិធីសាស្ត្រដូចជប៉ុនដើម្បីដោះបំណុលដែលកម្ពុជាជំពាក់។បើតាមសម្តេចហ៊ុន សែនជប៉ុនបានបង្វិលលុយដែលកម្ពុជាជំពាក់ក្នុងរបបដឹកនាំមុនៗមកឲ្យកម្ពុជាធ្វើការអភិវឌ្ឍន៍ប្រទេសវិញ។
ការលើកឡើងបែបនេះ គឺស្របពេលកម្ពុជានៅជំពាក់បំណុលប្រទេសមហាអំណាចដូចជាអាមេរិកនិងរុស្ស៊ីជាដើម ដែលបានខ្ចីកាលពីសម័យមុន។នៅក្នុងពិធីបើកការដ្ឋានសាងសង់ចំណតផែកុងតឺន័រថ្មីនៅកំពង់ផែស្វយ័តក្រុងព្រះសីហនុ នាថ្ងៃទី១ ខែឧសភាសម្តេចហ៊ុន សែនបានថ្លែងកោតសសើរជប៉ុនថាជាប្រទេសមួយជួយស្វែងរកសន្តិភាពជូនកម្ពុជានិងថែមទាំងផ្ដល់ជំនួយដល់កម្ពុជាដើម្បីធ្វើការអភិវឌ្ឍន៍ប្រទេស។ សម្តេចហ៊ុនសែនក៏បានរំលឹកផងដែរថាជប៉ុនផ្ដល់ជំនួយឲ្យកម្ពុជាច្រើនជាងគេតែជប៉ុនមិនផ្ដល់កម្ចីឲ្យកម្ពុជាឡើយដោយសាររបបមុនៗនៅជំពាក់លុយជប៉ុន ជាពិសេសគឺរបបសាធារណរដ្ឋខ្មែរ។លុះមកដល់ត្រឹមឆ្នាំ១៩៩៩ ទើបជប៉ុនផ្ដល់កម្ចីឲ្យកម្ពុជា។ទាក់ទិនទៅនឹងបំណុល និងកម្ចីនេះ សម្តេចនាយករដ្ឋមន្រ្តីហ៊ុនសែនក៏បានអរគុណជប៉ុនដែលមានវិធីដោះបំណុលរបស់រដ្ឋាភិបាលចាស់ៗដើម្បីផ្តល់លទ្ធភាពឲ្យកម្ពុជាទទួលបានកម្ចីថ្មីសម្រាប់អភិវឌ្ឍន៍ប្រទេស។ ជាមួយគ្នាសម្តេច ហ៊ុន សែន ក៏ចង់ឃើញប្រទេសម្ចាស់កម្ចីនានា ប្រើវិធីសាស្ត្រដូចជប៉ុនដែរ ដើម្បីដោះបំណុលដែលកម្ពុជាជំពាក់។វិធីសាស្ត្រដើម្បីដោះបំណុលដែលកម្ពុជាជំពាក់ គឺជប៉ុនបានផ្តល់ជាទំនិញសម្រាប់លក់នៅកម្ពុជា ។ប៉ុន្តែទំនិញដែលលក់បាននោះ ជប៉ុនមិនយកលុយត្រឡប់ទៅប្រទេសវិញទេគឺទុកលុយនេះអភិវឌ្ឍន៍នៅកម្ពុជា។គួររំលឹកថា បំណុលដែលកម្ពុជាជំពាក់ក្នុងរបបសម័យដឹកនាំមុនៗ ជាពិសេសបំណុលដែលកម្ពុជាជំពាក់សហរដ្ឋអាមេរិកនិងរុស្ស៊ីសម្តេចហ៊ុន សែនធ្លាប់បានស្នើម្ដងហើយម្ដងទៀតឲ្យសហរដ្ឋអាមេរិកនិងរុស្ស៊ីលុបចោលបំណុលឬបង្វែរបំណុលទាំងនោះ មកជាជំនួយអភិវឌ្ឍន៍ដល់កម្ពុជាវិញ។កាលពីទសវត្សរ៍៨០ កម្ពុជាបានជំពាក់បំណុលរុស្ស៊ី ១,៥០០លានដុល្លារអាមេរិកដែលខ្ចីយកមកទិញអាវុធនិងទ្រទ្រង់សេដ្ឋកិច្ច។ប៉ុន្តែកាលពីឆ្នាំ២០០៩ បំណុលនេះត្រូវបានរុស្ស៊ីសម្រេចលុបចោល៧០ភាគរយដោយនៅសល់បំណុលតែ៤៥០លានដុល្លារតែប៉ុណ្ណោះ។ កាលពីឆ្នាំ២០១៨ រុស្ស៊ីក៏បានយល់ព្រមបង្វែរបំណុលដែលសេសសល់នេះទៅជួយសម្រាប់ការវិនិយោគនៅនៅក្នុងប្រទេសកម្ពុជាវិញតាមការស្នើសុំរបស់សម្តេចនាយករដ្ឋមន្រ្តីហ៊ុន សែន។ចំណែកបំណុលបំណុលដែលកម្ពុជាជំពាក់សហរដ្ឋអាមេរិកនៅក្នុងសម័យសាធារណរដ្ឋខ្មែរវិញគិតទាំងដើមទាំងចុងគឺជិត៥០០លានដុល្លារនោះ មិនទាន់មានសញ្ញាប្រែប្រួលយ៉ាងណាឡើយ៕RFI
/unnamed.png
Post a Comment