អ៊ុយក្រែនថាឃ្លាំងស្តុកប្រេងនៅគ្រីមៀឆេះជាផ្នែកមួយនៃការវាយលុក
យោធាអ៊ុយក្រែនអះអាងថាមិនទទួលខុសត្រូវចំពោះការវាយប្រហារលើឃ្លាំងស្តុកប្រេងរបស់រុស្ស៊ីនៅគ្រីមៀទេ។ប៉ុន្តែទទូចថាវាជាផ្នែកនៃការរៀបចំសម្រាប់ប្រតិបត្តិការប្រឆាំង។NataliaHumeniukអ្នកនាំពាក្យនៃបញ្ជាការប្រតិបត្តិការភាគខាងត្បូងនៃកងទ័ពអ៊ុយក្រែនបាននិយាយនៅថ្ងៃនេះថាភ្លើងឆេះនៅឃ្លាំងស្តុកប្រេងដ៏ធំមួយនៅក្នុងទីក្រុងកំពង់ផែ Sevastopol ក្នុងឧបទ្វីប គ្រីមៀកំពុងធ្វើឱ្យយោធារុស្ស៊ីមានអសន្តិសុខ។ ទោះជាយ៉ាងណាមន្ត្រីអ៊ុយក្រែនមិនបានទទួលស្គាល់ដោយផ្ទាល់ថាក្រុងគៀវនៅពីក្រោយឧប្បត្តិហេតុនេះទេ។បណ្តាញភស្តុភាររបស់សត្រូវកំពុងត្រូវបានបំផ្លាញ។ នេះគឺជាផ្នែកមួយនៃការត្រៀមរៀបចំសម្រាប់ប្រតិបត្តិការប្រឆាំងការវាយលុកទ្រង់ទ្រាយធំដែលមនុស្សគ្រប់គ្នាកំពុងរង់ចាំ។ សត្រូវមានអារម្មណ៍ថាបណ្តាញភស្តុភាររបស់ពួកគេស្ថិតនៅក្រោមការគំរាមកំហែង។ ហើយត្រូវចាប់ផ្តើមផ្លាស់ប្តូរកងកម្លាំង" ។ លោកស្រី Humeniuk បាននិយាយ។មន្ត្រីរុស្ស៊ីមិនបានធ្វើអត្ថាធិប្បាយលើរបាយការណ៍នេះទេ។
លោក Mikhail Razvozhaev អភិបាលក្រុង Sevastopol បានចោទប្រកាន់អ៊ុយក្រែនថាបានប្រើប្រាស់យន្តហោះគ្មានមនុស្សបើក (UAVs)ដើម្បីវាយប្រហារឃ្លាំងស្តុកប្រេងកាលពីព្រឹកព្រលឹមថ្ងៃទី២៩ខែមេសាបណ្តាលឲ្យមានអគ្គីភ័យឆាបឆេះលើផ្ទៃដីប្រហែល១,០០០ម៉ែត្រការ៉េ។ ឧបទ្ទវហេតុនេះមិនបណ្តាលឲ្យមានអ្នករងរបួសនោះទេ។ប៉ុន្តែបានបំផ្លាញធុងសាំងយ៉ាងហោចណាស់មួយហើយប្រើពេលយូរទើបរថយន្តពន្លត់អគ្គីភ័យអាចគ្រប់គ្រងបាន ។ទីក្រុង Sevastopol ជាទីក្រុងមួយនៅលើឧបទ្វីប គ្រីមៀដែលរុស្ស៊ីបានបញ្ចូលពីអ៊ុយក្រែនក្នុងឆ្នាំ២០១៤បានស្ថិតនៅក្រោមការវាយប្រហារឥតឈប់ឈរចាប់តាំងពីការផ្ទុះឡើងនៃជម្លោះរវាងប្រទេសទាំង២កាលពីដើមឆ្នាំមុន។ មន្ត្រីរុស្ស៊ីបាននិយាយកាលពីសប្តាហ៍មុនថា កងនាវាសមុទ្រខ្មៅបានស្ទាក់ចាប់នាវាអត្តឃាតគ្មានមនុស្សបើក២គ្រឿងដែលបានវាយប្រហារកំពង់ផែSevastopol។រុស្ស៊ីបានចោទប្រកាន់យោធាអ៊ុយក្រែនម្តងហើយម្តងទៀតថាបានប្រើប្រាស់យន្តហោះគ្មានមនុស្សបើក និងនាវាអត្តឃាត ដើម្បីវាយប្រហារហេដ្ឋារចនាសម្ព័ន្ធនៅលើឧបទ្វីបគ្រីមៀ ។ប៉ុន្តែក្រុងគៀវតែងតែបដិសេធមិនជាប់ពាក់ព័ន្ធក្នុងឧប្បត្តិហេតុទាំងនេះ។
វិមានក្រឹមឡាំងបានទាមទារឱ្យអ៊ុយក្រែនទទួលស្គាល់អធិបតេយ្យភាពរបស់រុស្ស៊ីលើតំបន់គ្រីមៀនិងតំបន់ផ្សេងទៀតដែលទីក្រុងម៉ូស្គូបញ្ចូលជាលក្ខខណ្ឌនៃសន្តិភាព។ក្រុងគៀវបាននិយាយថាខ្លួននឹងមិនចរចាសន្តិភាពទេ លុះត្រាតែរុស្ស៊ីចាកចេញពីទឹកដីទាំងអស់ដែលខ្លួនគ្រប់គ្រងក្នុងអ៊ុយក្រែន រួមទាំងតំបន់គ្រីមៀ៕ប្រភពReuters
ផ្សែងហុយឡើងក្នុងពេលមានអគ្គីភ័យនៅឃ្លាំងប្រេងក្នុងក្រុងSevastopol កាលពីថ្ងៃទី២៩ ខែមេសា។ រូបថត៖Reuters
Post a Comment