នាយករដ្ឋមន្ត្រីហ៊ុន សែនពន្យុះឱ្យក្រុមប្រឆាំងប្រមាថក្រុមតារាដែលស្មើនឹងការបង្កើតជម្លោះជាមួយអ្នកគាំទ្រ
សម្តេចនាយករដ្ឋមន្ត្រី ហ៊ុន សែន បានពន្យុះឲ្យក្រុមប្រឆាំងជេរប្រមាថក្រុមតារាខ្មែរកាន់តែខ្លាំងគឺបង្កើតសត្រូវនឹងអ្នកគាំទ្រពួកគេកាន់តែច្រើន។ទង្វើមិនសមរម្យរបស់ក្រុមប្រឆាំងមកលើតារាខ្មែរបែបនេះជាការធ្វើនយោបាយឯកោដោយខ្លួនឯង។ការលើកឡើងរបស់សម្តេចនាយករដ្ឋមន្ត្រី ហ៊ុន សែន ធ្វើឡើងនៅក្នុងពិធីប្រគល់សញ្ញាបត្រដល់និស្សិតពេទ្យសាកលវិទ្យាល័យវិទ្យាសាស្ត្រសុខាភិបាលកាលពីម្សិលមិញ។កាលពីពេលបើកការប្រកួតកីឡាស៊ីហ្គេម តារាចម្រៀងល្បីមួយក្រុមរបស់ផលិតកម្ម GALAXY ឡេងណាវ៉ាត់ត្រាបានចៀងចម្រៀងមួយបទក្រោមចំណងជើងថា «មីឆុងមីកំប៉ុងមីឆា» ហើយទទួលការរិះគន់និងចំអកដាក់ពួកគេពីសំណាក់ក្រុមប្រឆាំងដែលវាយប្រហារតាមបណ្ដាញសង្គមនានា។សម្តេចនាយករដ្ឋមន្ត្រី ហ៊ុន សែន បានពន្យុះក្រុមប្រឆាំងទាំងនោះឱ្យជេរក្រុមតារាចម្រៀងដែលមានលោក ព្រាប សុវត្ថិ លោក ខេមរៈ សិរីមន្ត និងកញ្ញា តន់ ច័ន្ទស៊ីម៉ា ដែលជាតារាចម្រៀងនៅផលិតកម្ម GALAXY ឡេងណាវ៉ាត់ត្រា។សម្តេចនិយាយថា៖«ពួកអ្នកឯងជេរកាន់តែច្រើនខ្ញុំកាន់តែត្រេចអរទៅវិញតើ ព្រោះអ្នកឯងភ្លើពេក»។សម្តេចបានពន្យល់ថាការយកបទនេះមកច្រៀងក្នុងព្រឹត្តិការណ៍បើកការប្រកួតកីឡីស៊ីហ្គេមគឺគ្រាន់ជាការច្រៀងកំដរឆាកមុនពេលកម្មពិធីប្រកាសបើកការប្រកួតកីឡាស៊ីហ្គេមចាប់ផ្ដើមជាផ្លូវការ។
សម្តេចបានហៅក្រុមប្រឆាំងថាក្រុមពូកែទើសនិងក្រុមពូកែសន្សំរឿងសូម្បីតែចម្រៀងក៏ពួកប្រឆាំងនាំគ្នាទិតៀននិងទើស ដោយសម្តេចនាយករដ្ឋមន្ត្រីថ្លែងឌឺដងទៅវិញថាសម្តេចនឹងឡង់សេបទចម្រៀងមួយនេះឱ្យកាន់តែល្បីបន្ថែមទៀត។ទោះបីជាសម្តេចនាយករដ្ឋមន្ត្រីថ្លែងដោយមិនបញ្ចេញឈ្មោះចំ ។ប៉ុន្តែគេអាចដឹងបានថាសម្តេចកំពុងនិយាយសំដៅទៅកាន់លោក គឹម សុខ ដែលកំពុងរស់នៅបរទេសនិងតែងតែនិយាយឥតសំចៃមាត់ក្នុងការវិភាគរិះគន់រដ្ឋាភិបាល។លោកស្រី ចន ច័ន្ទលក្ខិណា ប្រធានសមាគមសិល្បៈករកម្ពុជា បានលើកឡើងថា មិនទាស់ខុសអ្វីទេ ការលើកយកបទចម្រៀង «មីឆុងមីកំប៉ុងមីឆា» រួមគ្នាដោយក្រុមតារាចម្រៀងរបស់ផលិតកម្ម GALAXY ឡេងណាវ៉ាត់ត្រា ព្រោះពេលដែលពួកគេច្រៀងនោះ គឺមិនមែនច្រៀងក្នុងពេលប្រារព្ធបើកការប្រកួតកីឡាស៊ីហ្គេម។ប៉ុន្តែជាការច្រៀងកំដរឆាកមុនពេលប្រកាសបើកជាផ្លូវ។លោកស្រីបន្តថា អ្នកដែលរិះគន់ភាគច្រើន គឺពួកគេមិនបានដឹង ហើយខ្លះទៀតប្រហែលជាមានចេតនាធ្វើឱ្យកើតមានបញ្ហាសម្រាប់កម្ពុជាជាម្ចាស់ផ្ទះរៀបចំព្រឹត្តិការណ៍ប្រកួតកីឡាស៊ីហ្គេម។លោកស្រីបន្ថែមថា ប្រសិនបើការច្រៀងចម្រៀងបទ «មីឆុងមីកំប៉ុងមីឆា» ក្នុងពេលបើកដំណើរការការប្រកួតកីឡាស៊ីហ្គេម គឺប្រហែលជាមានទស្សនៈយល់ឃើញផ្សេងៗគ្នាកាន់តែច្រើនទៅទៀត។ទោះបីជាយ៉ាងណា លោកស្រីអំពាវនាវដល់ពលរដ្ឋខ្មែរទាំងអស់គួរបើកចិត្តឱ្យទូលាយមិនថាក្នុងព្រឹត្តិការណ៍ប្រកួតកីឡាស៊ីហ្គេមឬព្រឹត្តិការណ៍សំខាន់ផ្សេងៗទេ៕Khmer Times
/unnamed.png
Post a Comment