មេទ័​ពថៃ​សន្យាមិ​ន​ធ្វើរដ្ឋប្រ​ហារ

មេទ័ពរបស់ប្រទេសថៃបាននិយាយថាកងទ័ពនឹងមិនធ្វើរដ្ឋប្រហារឡើយ ខណៈដែលប្រទេសនេះត្រៀមរៀបចំការបោះឆ្នោត។មេទ័ពថៃ Narongpan Jitkaewthaeបានប្រាប់អ្នកយកព័ត៌មាននៅទីក្រុងបាងកកថ្ងៃនេះថា "មិនគួរមានរដ្ឋប្រហារទៀតទេ។ខ្ញុំគិតថាពាក្យ"រដ្ឋប្រហារ"គួរតែត្រូវបានដកចេញពីវចនានុក្រម។ការ​លើក​ឡើង​នេះ​កើត​ឡើង​២ថ្ងៃ​មុន​ពេល​ប្រទេស​ថៃ​រៀបចំ​ការ​បោះ​ឆ្នោត​ទូទៅ​ដើម្បី​ជ្រើស​រើស​រដ្ឋាភិបាល​ថ្មីដែល​គណបក្ស​ United Thailand National Party (UTN)ដែល​គាំទ្រ​ដោយ​យោធា​កំពុង​ប្រឈម​នឹង​ហានិភ័យ​នៃ​ការ​បរាជ័យ។នាយករដ្ឋមន្ត្រីPrayuth Chan-ochaអាយុ៦៩ឆ្នាំជាមេដឹកនាំគណបក្សUTNបានកាន់អំណាចចាប់តាំងពីរដ្ឋប្រហារយោធាឆ្នាំ២០១៤ មក។ទោះបីជាយ៉ាងណាក៏ដោយ តុលាការធម្មនុញ្ញរបស់ប្រទេសថៃបានរាប់អាណត្តិរបស់លោកថានឹងចាប់ផ្តើមនៅថ្ងៃទី៦ខែមេសាឆ្នាំ២០១៧ហើយលោកអាចបន្តកាន់អំណាចរហូតដល់ឆ្នាំ ២០២៥។ ប្រសិន​បើ​បាន​ជាប់​ឆ្នោត​ឡើង​វិញនោះ​នឹង​ត្រូវ​កំណត់​រយៈពេល​៨​ឆ្នាំ​ដែល​មាន​ចែង​ក្នុង​រដ្ឋធម្មនុញ្ញ។ការស្ទង់មតិដែលធ្វើឡើងមុនការបោះឆ្នោតបង្ហាញថា គណបក្សប្រឆាំងមានអត្ថប្រយោជន៍ធំ។ Pita Limjaroenrat អាយុ៤២ ឆ្នាំនៃគណបក្សMoveForwardថ្មីៗនេះបានលេចចេញជាបេក្ខជននាយករដ្ឋមន្ត្រីនាំមុខគេ។គណបក្សភឿថៃដែលមានទំនាក់ទំនងជាមួយអតីតនាយករដ្ឋមន្ត្រីThaksinShinawatraត្រូវបានគេរំពឹងថានឹងទទួលបានអាសនៈច្រើនជាងគេនៅក្នុងសភាជាន់ទាប។ Paetongtarn Shinawatra អាយុ ៣៦ឆ្នាំ កូនស្រីរបស់Thaksinគឺជាបេក្ខជនម្នាក់ក្នុងចំណោមបេក្ខភាព៣នាក់ដែលតំណាងឱ្យគណបក្សភឿថៃ។លោកស្រីបានប្រកាសថា គណបក្សភឿថៃនឹងមិនបង្កើតក្រុមចម្រុះដែលកំពុងកាន់អំណាចជាមួយក្រុមគាំទ្រដោយយោធានោះទេ។ទោះជាយ៉ាងណាក៏ដោយការឈ្នះអាសនៈភាគច្រើននៅក្នុងសភាជាន់ទាបមិនមែនមានន័យថាគណបក្សភឿថៃនិងចលនាឆ្ពោះទៅមុខអាចឡើងកាន់អំណាចនោះទេព្រោះតំណែងនាយករដ្ឋមន្ត្រីនឹងត្រូវជ្រើសរើសដោយសមាជិកសភាចំនួន៥០០នាក់និងសមាជិកព្រឹទ្ធសភាចំនួន២៥០រូប។ សមាជិកសភាជាន់ខ្ពស់ត្រូវបានតែងតាំងដោយរដ្ឋាភិបាល Prayuth។គណបក្សភឿថៃកំពុងអំពាវនាវឱ្យអ្នកគាំទ្របោះឆ្នោតដើម្បីនាំមកនូវជ័យជំនះដ៏លើសលប់និងរារាំងយោធាមិនឱ្យបន្តកាន់អំណាចជាអ្វីដែលបានកើតឡើងនៅពេលលោកPrayuthឡើងកាន់តំណែងជានាយករដ្ឋមន្ត្រីដោយមានការគាំទ្រពីសភាជាន់ខ្ពស់ក្នុងឆ្នាំ២០១៩។យោធា​ថៃ​បាន​ប៉ុនប៉ង​ធ្វើ​រដ្ឋប្រហារ​ចំនួន១៣ដោយ​ជោគជ័យនិង​បរាជ័យ៩ដង​ក្នុង​រយៈពេល ១០០ឆ្នាំ​កន្លង​មក​នេះ។ រដ្ឋប្រហារ​ថ្មី​បំផុត​បាន​កើត​ឡើង​ក្នុង​ឆ្នាំ២០១៤ ដើម្បី​ទម្លាក់​លោកស្រីYingluck Shinawatra ដែល​ជា​ប្អូន​ស្រី​របស់​អតីត​នាយក​រដ្ឋមន្ត្រី​Thaksin ក្រោយ​កាន់​អំណាច៣​ឆ្នាំ។ លោកThaksinក៏ត្រូវបានយោធាបណ្តេញចេញពីអំណាចក្នុងរដ្ឋប្រហារឆ្នាំ២០០៦ហើយកំពុងរស់នៅនិរទេសខ្លួន៕ប្រភពAFP

ឧត្តមសេនីយ៍Narongpan Jitkaewthaeនៅទីបញ្ជាការកងទ័ពថៃ ក្នុងទីក្រុងបាងកក ក្នុងខែកញ្ញា ឆ្នាំ ២០២០។ រូបថត៖Reuters