រដ្ឋមន្ត្រីក្រសួងមហាផ្ទៃព្រមានដកស្នងការនគរបាលដែលជ្រើសមន្ត្រីនៅថ្នាក់មូលដ្ឋានពុករលួយ
រដ្ឋមន្ត្រីក្រសួងមហាផ្ទៃ សម្តេច ស ខេងបានព្រមានជាសាធារណៈដល់ស្នងការនគរបាលរាជធានី-ខេត្ត ដែលបានបញ្ជូនមន្ត្រីពីថ្នាក់ខេត្តទៅបម្រើការនៅតាមនគរបាលរដ្ឋបាលប៉ុស្ដិ៍ ឃុំ សង្កាត់ ដែលមានភាពមិនប្រក្រតីនិងកំពុងប្រព្រឹត្តអំពើពុករលួយនៅតាមមូលដ្ឋាន។ការព្រមានដល់ស្នងការនគរបាលខាងលើនេះ ធ្វើឡើងបន្ទាប់ពីសម្តេច ស ខេង ទទួលបានពាក្យបណ្ដឹងនិងព័ត៌មានថាមានករណីបញ្ជូនមន្ត្រីពីថ្នាក់ខេត្តឱ្យទៅបម្រើការនៅរដ្ឋបាលប៉ុស្ដិ៍ ឃុំ សង្កាត់ដែលធ្វើឱ្យប្រជាពលរដ្ឋរស់នៅក្នុង ឃុំ សង្កាត់ ទាំងនោះគ្មានឱកាសបម្រើការងារនៅមូលដ្ឋានរបស់ខ្លួន។ក្នុងពិធីបិទវគ្គសុក្រឹតការថ្នាក់ដឹកនាំនគរបាល កម្រិត១ និងកម្រិត២ ជំនាន់ទី៣នៅបណ្ឌិត្យសភានគរបាលកម្ពុជា កាលពីថ្ងៃពុធ សម្តេចស ខេង បានឱ្យដឹងថាកន្លងមកមានការជ្រើសរើសមន្ត្រីនគរបាលប៉ុស្ដិ៍ដោយឆ្លងកាត់ការប្រឡងទើបបញ្ជូនឱ្យទៅបម្រើការនៅតាមប៉ុស្ដិ៍ ឃុំ សង្កាត់ ។ប៉ុន្ដែការជ្រើសបែបនេះមិនទទួលបានជោគជ័យឡើយ។សម្តេចបន្ថែមថា បេក្ខជនដែលប្រឡងជាប់ជាមន្ត្រីរដ្ឋបាលប៉ុស្ដិ៍ទាំងនោះ គឺភាគច្រើនមិនមែនរស់នៅក្នុងមូលដ្ឋានរបស់ខ្លួនទេ ហើយជួនកាលរស់នៅឆ្លងស្រុកឬមានស្រុកកំណើតឆ្លងខេត្តផ្សេង ដែលធ្វើឱ្យពួកគេពិបាកក្នុងការប្រតិបត្តិការការងារនៅក្នុងឃុំ សង្កាត់ ដែលមិនមែនជាស្រុកកំណើតរបស់ខ្លួន។សម្តេចបន្តថា នៅពេលប្រឡងជាប់ហើយ ពួកគេតែងស្នើសុំផ្ទេរចេញពីរដ្ឋបាល់ប៉ុស្ដិ៍ទាំងនោះ ដើម្បីទៅបម្រើការងារនៅភូមិ ឃុំ សង្កាត់ ដែលជាស្រុកកំណើតរបស់ខ្លួន ដើម្បីបាននៅក្បែរបងប្អូន ប្ដី ប្រពន្ធ កូនចៅ និងឪពុកម្ដាយរបស់ពួកគេ ដែលធ្វើឱ្យការគ្រប់គ្រងមន្ត្រី និងការអនុវត្តការងារគ្មានប្រសិទ្ធភាព។សម្តេចនិយាយថា បច្ចុប្បន្ន សម្តេចមិនអនុញ្ញាតឱ្យមានការប្រឡងបែបហ្នឹងទៀតទេ។ប៉ុន្តែក្រសួងមហាផ្ទៃ បានប្រគល់ការងារនេះ ទៅឱ្យប៉ុស្ដិ៍ប៉ូលីស និងមេឃុំ ជាអ្នកជ្រើសរើស នៅក្នុងមូលដ្ឋានឃុំ សង្កាត់ របស់ខ្លួនទៅ ដើម្បីមានប្រសិទ្ធភាពការងារ។រដ្ឋមន្ត្រីបញ្ជាក់ថា៖ «ខ្ញុំទទួលពាក្យបណ្ដឹងនៅខេត្តមួយ [,,,] រាយការណ៍ថាគាត់ស្ថិតនៅក្នុងឃុំនេះ ឬស្រុកនេះ តែហេតុអីបានឱ្យគាត់ទៅធ្វើការនៅឃុំផ្សេង ស្រុកផ្សេងទៅវិញ ករណីនេះ ខ្ញុំទាញសន្និដ្ឋានបណ្ដោះអាសន្នថាគឺមានភាពមិនប្រក្រតី»។សម្តេចស ខេង បន្ថែមថា ក្រៅពីពាក្យបណ្ដឹងខាងលើនេះ សម្តេចក៏ទទួលបានព័ត៌មានមួយទៀតដែរថា គឺមានការបញ្ជូនមន្ត្រីពីថ្នាក់ខេត្តទៅបម្រើការនៅមូលដ្ឋានតែម្ដង ដោយមានការពិភាក្សា ត្រូវដាក់ក្នុងឃុំនេះ ប៉ុន្មាននាក់ សង្កាត់នោះប៉ុន្មាននាក់ ហើយត្រូវបញ្ជូននរណាទៅខ្លះ? ដែលមិនមែនជាមនុស្សរស់នៅក្នុងឃុំ សង្កាត់ ហ្នឹងផ្ទាល់។សម្តេចបញ្ជាក់ថា៖ «[,,,] បើខ្ញុំរកឃើញពិតប្រាកដមែន ស្នងការនគរបាលជាអ្នកទទួលខុសត្រូវមុនគេ ។ប៉ុន្តែបើដឹងខ្លួនជាការល្អ សុំដកខ្លួន សុំលាលែងឱ្យហើយទៅ កុំឱ្យដេញទាន់ ហើយអស់ស័ក្តិថែមទៀត ព្រោះយើងចង់បានកូនចៅប្រជាពលរដ្ឋ បើកូនចៅប្រជាពលរដ្ឋ នៅកន្លែងណា ត្រូវដាក់នៅកន្លែងហ្នឹង គឺដាក់នៅក្នុងឃុំ សង្កាត់ ហ្នឹងតែម្ដង មិនមែនយកអ្នករស់នៅឃុំ សង្កាត់ ឬស្រុកផ្សេងមកដាក់ជំនួសនោះទេ»។សម្តេចផ្ដាំទៅស្នងការនគរបាល រាជធានី-ខេត្តថា កុំឱ្យមានករណីខាងលើកើតឡើង ព្រោះរាល់ឯកសារជ្រើសរើសបេក្ខជនទាំងនោះ គឺត្រូវឆ្លងកាត់បុគ្គលិកក្រសួង ហើយបុគ្គលទាំងនោះ នឹងផ្ញើទៅរដ្ឋមន្ត្រី ដើម្បីរដ្ឋមន្ត្រីក្រសួងមហាផ្ទៃ ជាអ្នកចុះហត្ថលេខាបញ្ចូលក្នុងក្របខណ្ឌ។សម្តេចថ្លែងថា បញ្ជីឈ្មោះជ្រើសរើសមន្ត្រីទាំងនោះ បើគ្មានវត្តមានរដ្ឋមន្ត្រីចុះហត្ថលេខា ក៏មិនអាចបើកប្រាក់ខែបានដែរ។សម្តេចបន្ថែមថា ចំពោះការផ្ទេរមន្ត្រីចេញពី ឃុំ សង្កាត់ មួយទៅឃុំ សង្កាត់ មួយទៀតនោះ ក៏ត្រូវការឆ្លងកាត់ពីរដ្ឋមន្ត្រីដែរ។ប៉ុន្តែបើភាគីពាក់ព័ន្ធនៅតែមិនអនុវត្តតាម គឺមានតែដកមេហ្នឹងចេញតែម្ដង។សម្តេចបន្តថា បើអ្នកពាក់ព័ន្ធស្ថិតនៅខេត្តណាមានខ្លួន ត្រូវកែតម្រូវឡើងវិញ ព្រោះនៅទីនេះ សម្តេចមិនបង្ហាញឈ្មោះជាសាធារណៈទេ។ ប៉ុន្តែសម្តេចមានឯកសារនៅក្នុងដៃ ដើម្បីដកបុគ្គលពុករលួយនោះចេញពីតំណែង។នាយកប្រតិបត្តិនៃវិទ្យាស្ថានតស៊ូមតិ និងគោលនយោបាយ លោក ឡាំ សុជាតិ បានឱ្យដឹងថាការផ្ដល់សិទ្ធិដល់ថ្នាក់ក្រោមជាតិ ទាំងវិស័យធនធាន សិទ្ធិអំណាច ការគ្រប់គ្រងមនុស្ស គ្រប់គ្រងលុយកាក់ និងការអភិវឌ្ឍនៅមូលដ្ឋាន ជារឿងល្អ។ប៉ុន្តែ បច្ចុប្បន្ននៅស្រុកខ្មែរ គឺបារម្ភបំផុតការជ្រើសមន្ត្រីនគរបាលនៅឃុំ សង្កាត់ គឺជ្រើសអ្នកគ្មានសមត្ថភាព ជ្រើសដោយបក្ខពួកនិយមនិងបងប្អូននិយម។លោកបញ្ជាក់ថា៖ «នៅស្រុកយើងមិនថាជ្រើសមន្ត្រីកម្រិតណានោះទេ ទោះថ្នាក់ជាតិ ថ្នាក់ក្រសួង ឬថ្នាក់ក្រោមជាតិ ឬថ្នាក់ ឃុំ សង្កាត់ មិនទាន់បែងចែកឱ្យដាច់រវាងបក្ខពួកនិយម ពុករលួយ សាច់ញាតិ ឬលម្អៀងក្នុងការជ្រើសរើសមន្ត្រីនៅឡើយ»។លោកបន្ថែមថា ការជ្រើសមន្ត្រីបម្រើការនៅតាមរដ្ឋបាលប៉ុស្ដិ៍ ឃុំ សង្កាត់ ដែលស្ថិតក្នុងភូមិសាស្ត្ររបស់ប្រជាពលរដ្ឋរស់នៅផ្ទាល់ ក្រសួងគួរតែមាននីតិវិធីដើម្បីឱ្យការជ្រើសរើសមានភាពត្រឹមត្រូវ និងយុត្តិធម៌ ហើយគួរប្រកាសឱ្យប្រជាពលរដ្ឋបានដឹង ដើម្បីឱ្យពួកគេមានឱកាសចូលរួមដាក់ពាក្យប្រកួតប្រជែងដោយស្មើភាព។លោក ឡាំ សុជាតិ បន្តថា ការផ្សព្វផ្សាយឱ្យប្រជាពលរដ្ឋបានដឹង និងយុវជនរស់នៅក្នុងភូមិ ឃុំ សង្កាត់នីមួយៗមានឱកាសដាក់ពាក្យដោយតម្លាភាព និងយុត្តិធម៌ គឺជារឿងល្អ ប៉ុន្តែមិនមែនជាការជ្រើសដោយបក្ខពួកនោះទេ។កាលពីឆ្នាំ២០២២ ក្រសួងមហាផ្ទៃ បានប្រកាសប្ដូរពីការប្រឡងជ្រើសរើសក្របខណ្ឌមន្ត្រីនគរបាល សម្រាប់បម្រើការនៅរដ្ឋបាលប៉ុស្ដិ៍ ឃុំ សង្កាត់ ទៅជាសម្ភាសផ្ទាល់មាត់ដោយមេឃុំ ឬចៅសង្កាត់ និងមេប៉ុស្ដិ៍ ដែលស្ថិតនៅក្នុងភូមិសាស្ត្ររបស់បេក្ខជន និងអាជ្ញាធរដែនដីនៅតាមមូលដ្ឋាន។ក្រសួងបញ្ជាក់ថា ការប្ដូរពីប្រឡងទៅជាសម្ភាសដោយផ្ទាល់មាត់ គឺមានគុណភាព និងប្រសិទ្ធិភាពជាងប្រឡង ដើម្បីឈានទៅប្រតិបត្តិការងារនៅតាមរដ្ឋបាលប៉ុស្តិ៍នគរបាល ឃុំ សង្កាត់ ដែលបេក្ខជនរស់នៅដោយផ្ទាល់៕Khmer Times
Post a Comment