នាយករដ្ឋមន្ដ្រីកម្ពុជាចាត់ទុកព្រឹត្តិការណ៍កីឡាស៊ីហ្គេមគឺជាសមិទ្ធផលជាតិទាំងមូល
សម្ដេចហ៊ុន សែននាយករដ្ឋមន្ដ្រីនៃព្រះរាជាណាចក្រកម្ពុជាបានថ្លែងបញ្ជាក់ថាព្រឹត្តិការណ៍កីឡាស៊ីហ្គេមនៅកម្ពុជានាពេលនេះ មិនមែនជាកម្មសិទ្ធិរបស់សម្ដេចឬរាជរដ្ឋាភិបាលនិងគណបក្សប្រជាជនកម្ពុជាឡើយ គឺជាសមិទ្ធផលរបស់ប្រជាជាតិខ្មែរទាំងមូលខណៈអ្នកខ្លះស្រក់ទឹកភ្នែក ចំពោះព្រឹត្តិការណ៍នេះផងដែរ។ការគូសបញ្ជាក់របស់សម្ដេចនេះ ក្នុងពិធីប្រគល់សញ្ញាបត្រជូននិស្សិតបញ្ចប់ការសិក្សាផ្នែកកសិកម្មជាង៣ ០០០នាក់នៃសាកលវិទ្យាល័យភូមិន្ទកសិកម្ម នាព្រឹកថ្ងៃទី១៥ ខែឧសភា ឆ្នាំ២០២៣ នៅមជ្ឈមណ្ឌលសន្និបាត និងពិព័រណ៍កោះពេជ្រ។
សម្ដេចហ៊ុន សែន បានគូសបញ្ជាក់ថាមនុស្សប្រហែលជា ៨០ភាគរយ បានក្តុកក្តួលនៅពេលឃើញព្រឹត្តិការណ៍បើកកីឡាស៊ីហ្គេម នាពេលកន្លងទៅ។សម្ដេចបានថ្លែងបញ្ជាក់ថា៖«អ្នកខ្លះស្រក់ទឹកភ្នែក ។ប៉ុន្ដែមិនមែនស្រក់ទឹកដោយសារគេធ្វើបាបទេស្រក់ទឹកភ្នែកដោយសារមោទនភាពជាតិ។ នេះមិនមែនរបស់ហ៊ុន សែន ហើយក៏មិនមែនរបស់រាជរដ្ឋាភិបាលឬគណបក្សប្រជាជន តែគឺជារបស់មនុស្សទាំងអស់»។សម្ដេចនាយករដ្ឋមន្រ្ដីបានបន្ដថា ព្រឹត្តិការណ៍កីឡាស៊ីហ្គេមបានធ្វើឱ្យសម្តេចរំជួលចិត្តដោយមិននឹកស្មានថាកម្ពុជាមានថ្ងៃនេះផងដែរ។ទន្ទឹមនេះសម្រាប់ការរៀបចំព្រឹត្តិការណ៍កីឡាស៊ីហ្គេម នៅនាពេលនេះត្រូវចំណាយថវិកាជាង ១១៨លានដុល្លារ។ សម្ដេចបានបន្ដទៀតថាការរៀបចំព្រឹត្តិការណ៍កីឡាស៊ីហ្គេមនេះគឺជាកាតព្វកិច្ចរបស់រដ្ឋ ជាសមាជិកអាស៊ាន។ សម្ដេចបានបញ្ជាក់បន្ថែមថា «អ្នកខ្លះគេស្រែកពីក្រៅថាមិនយកលុយនេះ មិនទៅយកលើស្អីផ្សេងទេ ម៉េចក៏ធ្វើស៊ីហ្គេម។ពេលដែលយើងមិនធ្វើគេថាយើងហ្នឹងគឺអន់ ដល់តែយើងធ្វើគេថាយើងគឺយកលុយចាយខ្ជះខ្ជាយ រាប់ទាំងមិនយកលុយពីបរទេស។ប៉ុន្តែខ្ញុំក៏គួរតែបញ្ជាក់ថាស៊ីហ្គេម គឺជាកាតព្វកិច្ចរបស់រដ្ឋសមាជិកអាស៊ាន»។សម្ដេចនាយករដ្ឋមន្រ្ដីបានអះអាងថា ជាលើកដំបូងនៅក្នុងប្រវត្តិកីឡារបស់យើងដែលមុននេះយើងមិនដែលមានមេដាយមាសកីឡាហែលទឹកនិងកីឡារត់ប្រណាំងទេ។សម្ដេចបានចាត់ទុកថានេះវាជាមោទនភាពមួយនៅក្នុងដំណើរការនៃការឈានឡើងផ្នែក វិស័យកីឡារបស់កម្ពុជាដែលខ្លួនមិនត្រឹមតែធ្វើជាម្ចាស់ផ្ទះប្រកបដោយភាពជិតជោគជ័យប៉ុណ្ណោះទេ តែភាពជោគជ័យរបស់យើងគឺនៅពេលមិត្តភក្តិកម្ពុជាបានត្រឡប់ទៅប្រទេសវិញដោយគ្មានរឿងអ្វីទាំងអស់នោះគឺជាជោគជ័យ១០០ភាគរយ ។សម្តេចបានសង្កត់ធ្ងន់ថា៖«ប៉ុន្តែអ្វីដែលខ្ញុំមានមោទនភាពបញ្ហាមេដាយជារឿងមួយហើយ។ប៉ុន្តែរឿងធំជាងគេគឺរឿងកីឡាករកីឡាការិនី ប្រតិភូកីឡាមកពីគ្រប់ទិសទីទាំងអស់មកសប្បាយរីករាយនៅទីក្រុងភ្នំពេញ។ ប្រជាជនកម្ពុជាទូទៅគឺចេះមើលកីឡាខ្លះមកពីខេត្តចេញពីមើលកន្លែងនេះទៅមើលកន្លែងនោះព្រោះកន្លែងប្រកួតយើងច្រើន»៕AKP
Post a Comment