ជំនួប​​​ជា​មួយ​ប្រេសិត​ចិន​​អ៊ុយក្រែន​​បា​ន​ប្រកា​ស​​ថា​ខ្លួន​​នឹ​ង​មិ​ន​ធ្វើ​​សម្បទាន​ឲ្យ​រុស្ស៊ី​លើ​​ទឹ​​ក​ដី

 រដ្ឋមន្ត្រីការបរទេសអ៊ុយក្រែនលោកKulebaបានប្រាប់បេសកជនពិសេសរបស់ចិនលោកLi Huiថាក្រុងគៀវនឹងមិនប្រគល់ទឹកដីឱ្យទីក្រុងម៉ូស្គូ ជាលក្ខខណ្ឌសម្រាប់ការបញ្ឈប់ជម្លោះនោះទេ។ក្រសួងការបរទេសអ៊ុយក្រែនបាននិយាយនៅក្នុងសេចក្តីថ្លែងការណ៍មួយថា"រដ្ឋមន្ត្រីការបរទេស DmytroKulebaបានជូនដំណឹងទៅបេសកជនពិសេសរបស់ចិនអំពីគោលការណ៍នៃការស្តារឡើងវិញដោយយុត្តិធម៌និងនិរន្តរភាពនៃសន្តិភាពដោយផ្អែកលើការគោរពចំពោះអធិបតេយ្យភាពនិងបូរណភាពទឹកដីរបស់អ៊ុយក្រែន" ។ជំនួបនៅទីក្រុងគៀវរវាងរដ្ឋមន្ត្រីការបរទេសKulebaនិងបេសកជនពិសេសរបស់រដ្ឋាភិបាលចិនទទួលបន្ទុកកិច្ចការអឺរ៉ាស៊ីនិងអាស៊ីលោក Li Hui។រដ្ឋមន្ត្រីការបរទេស Kuleba បានសង្កត់ធ្ងន់ទៅកាន់បេសកជនចិនថា ក្រុងគៀវនឹងមិនទទួលយកសំណើសន្តិភាពណាមួយទាក់ទងនឹងសម្បទានទឹកដីដល់ទីក្រុងម៉ូស្គូឡើយ។លោកLi Huiបាន​ទៅ​បំពេញ​ទស្សនកិច្ច​នៅ​អ៊ុយក្រែន​នៅ​ថ្ងៃ​ទី ១៦-១៧ ខែ​ឧសភា។ នេះ​ជា​ដំណើរ​ទស្សនកិច្ច​លើក​ដំបូង​របស់​បេសកជន​ជាន់​ខ្ពស់​ចិន​ទៅ​អ៊ុយក្រែនចាប់​តាំង​ពី​មាន​ការ​ផ្ទុះ​អរិភាព​ក្នុង​ប្រទេស​ក្នុង​ខែ​កុម្ភៈ ឆ្នាំ​២០២២។ លោកLiក៏ត្រូវបានគេរំពឹងថានឹងធ្វើទស្សនកិច្ចទៅកាន់ប្រទេសរុស្ស៊ី ប៉ូឡូញ បារាំង និងអាល្លឺម៉ង់ ដើម្បីពិភាក្សាអំពីដំណោះស្រាយចំពោះជម្លោះ។ប្រធានាធិបតី Xi Jinpingនៅក្នុងការសន្ទនាតាមទូរស័ព្ទជាមួយប្រធានាធិបតី Volodymyr Zelensky កាលពីខែមុនបានប្រកាសថា ប្រទេសចិននឹងបញ្ជូនអ្នកការទូតជាន់ខ្ពស់ទៅកាន់អ៊ុយក្រែនដើម្បីស្វែងរកដំណោះស្រាយដោយសន្តិវិធី។លោកLi Huiបានបម្រើការជាឯកអគ្គរដ្ឋទូតប្រចាំប្រទេសរុស្សីពីឆ្នាំ២០០៩ ដល់ឆ្នាំ២០១៩ដោយបានក្លាយជាឯកអគ្គរដ្ឋទូតចិនដែលកាន់តំណែងយូរជាងគេនៅក្នុងប្រទេសនេះ។ក្នុង​អំឡុង​ពេល​លោក Li ជា​ឯកអគ្គរដ្ឋទូត លោក​ប្រធានាធិបតី Xi Jinping បាន​ធ្វើ​ដំណើរ​ទស្សនកិច្ច​ផ្លូវការ​ចំនួន៩លើក​ទៅ​ប្រទេស​រុស្ស៊ី។ ប៉ុន្មានខែមុនអាណត្តិរបស់លោកLiបានបញ្ចប់ ប្រធានាធិបតីរុស្ស៊ីលោកVladimir Putin បានបង្ហាញជូនលោកនូវមេដាយមិត្តភាពមួយសម្រាប់ការរួមចំណែកក្នុងការពង្រឹងទំនាក់ទំនងរវាងប្រទេសទាំង២។ប្រទេសចិនកាលពីខែកុម្ភៈបានប្រកាសផែនការសន្តិភាពចំនួន១២ចណុចសម្រាប់វិបត្តិអ៊ុយក្រែន។ ទីក្រុងប៉េកាំងទទូចថាខ្លួននឹងធ្វើការឆ្ពោះទៅរកបទឈប់បាញ់នៅអ៊ុយក្រែនឱ្យបានឆាប់តាមដែលអាចធ្វើទៅបានដោយទទូចថាការចរចាគឺជា "ដំណោះស្រាយតែមួយគត់"ចំពោះជម្លោះ៕ប្រភពReuters

តំណាង​អ៊ុយក្រែន(ឆ្វេង)និង​គណៈប្រតិភូ​ចិន​ក្នុង​ពេល​ជួប​ប្រជុំ​គ្នា​នៅ​ក្រុង គៀវកាល​ពី​ថ្ងៃ​ទី​១៦ខែ​ឧសភា។ រូបថត៖ AFP