អង្គរវត្តរកចំណូលបាន១៤លានដុល្លារក្នុងរយៈពេល៤ខែ
សហគ្រាសអង្គរដែលគ្រប់គ្រងដោយរដ្ឋបាននិយាយកាលពីថ្ងៃសុក្រថា រមណីដ្ឋានបុរាណអង្គរដ៏ល្បីល្បាញរបស់កម្ពុជាទទួលបានភ្ញៀវទេសចរបរទេសចំនួន ២៩៨,៩៩៨ នាក់ក្នុងរយៈពេល៤ខែដំបូងនៃឆ្នាំនេះដែលរកចំណូលបាន ១៤លានដុល្លារពីការលក់សំបុត្រ។
រូបសហការីសហគ្រាសបានកត់សម្គាល់ថា សម្រាប់តែក្នុងខែមេសា រមណីដ្ឋាននេះបានទាក់ទាញភ្ញៀវបរទេសចំនួន ៦២,៥៥៧នាក់ ដែលរកប្រាក់ចំណូលបាន ២,៨៩លានដុល្លារពីការលក់សំបុត្រ។ស្ថិតនៅភាគពាយព្យនៃខេត្តសៀមរាប រមណីដ្ឋានបុរាណអង្គរទំហំ ៤០១ គីឡូម៉ែត្រការ៉េ ដែលត្រូវបានចុះក្នុងបញ្ជីបេតិកភណ្ឌពិភពលោករបស់អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO) ក្នុងឆ្នាំ ១៩៩២គឺជាតំបន់ទេសចរណ៍ពេញនិយមបំផុតនៅអាស៊ីអាគ្នេយ៍។កាលពីពេលថ្មីៗនេះប្រាសាទអង្គរវត្តត្រូវបានបោះឆ្នោតជ្រើសរើសជាកន្លែងមើលថ្ងៃរះល្អបំផុតរបស់ពិភពលោកដោយបានយកឈ្នះគូប្រជែងជាមួយនឹងចំនួនសន្លឹកឆ្នោតទ្វេរដង។ប្រាសាទអង្គរវត្តបានជាប់ចំណាត់ថ្នាក់លេខមួយលើការស្ទង់មតិដែលធ្វើឡើងដោយ morninglife.co.uk ដែលប្រមូលទិន្នន័យពីការពិនិត្យ Tripadvisor ដើម្បីស្វែងរកកន្លែងដែលមានចំនួនថ្ងៃរះ/ថ្ងៃលិចច្រើនជាងគេនៅជុំវិញពិភពលោក។ក្នុងឆ្នាំ ២០១៩ អំឡុងមុនពេលជំងឺរាតត្បាត រមណីដ្ឋានអង្គរទទួលបានភ្ញៀវអន្តរជាតិដល់ទៅ ២,២ លាននាក់ ដែលរកចំណូលបាន ៩៩ លានដុល្លារពីការលក់សំបុត្រ នេះបើយោងតាមសហគ្រាសអង្គរ។តម្លៃចូលទស្សនារមណីដ្ឋានមួយថ្ងៃគឺមានតម្លៃ ៣៧ ដុល្លារ ការចូលទស្សនាបីថ្ងៃមានតម្លៃ ៦២ ដុល្លារ និងការទស្សនារយៈពេលមួយសប្តាហ៍ ៧២ ដុល្លារ។របាយការណ៍របស់ក្រសួងទេសចរណ៍បានឱ្យដឹងថា កាលពីឆ្នាំមុន ប្រទេសកម្ពុជាបានស្វាគមន៍ភ្ញៀវទេសចរបរទេសចំនួន ២,២១ លាននាក់ ដែលរកចំណូលបាន ១,៤១ ប៊ីលានដុល្លារ៕AKP/KhmerTimes
Post a Comment