មេដឹកនាំអាស៊ានអំពាវនាវឱ្យមានការឯកភាពគ្នា
មេដឹកនាំនៃសមាគមប្រជាជាតិអាស៊ីអាគ្នេយ៍បានបើកកិច្ចប្រជុំមេដឹកនាំរយៈពេល២ថ្ងៃនៃកិច្ចប្រជុំកំពូលអាស៊ានលើកទី៤២ដោយសង្កត់ធ្ងន់លើតួនាទីក្នុងតំបន់ជាមជ្ឈមណ្ឌលនៃកំណើនសេដ្ឋកិច្ចពិភពលោកដោយមានការឯកភាពគ្នា។
ប្រធានាធិបតីឥណ្ឌូណេស៊ី Joko Widodoដែលជាប្រធានប្តូរវេនអាស៊ាននៅឆ្នាំនេះបានស្វាគមន៍មេដឹកនាំទាំងអស់នៅទីក្រុងឡាប៊ួនបាចូ (Labuan Bajo) ដែលជាភូមិនេសាទនៅលើកោះ Flores ក្នុងខេត្តនូសាតឹងហ្គារ៉ាខាងកើត (East Nusa Tenggara) ប្រទេសឥណ្ឌូនេស៊ី។ជាមួយនឹងផ្ទាំងពីក្រោយដែលមាន សមុទ្រពណ៌ខៀវ លោក Widodo បានថ្លែងសុន្ទរកថាបើករបស់គាត់ដោយលើកឡើងពីភាពមិនប្រាកដប្រជានៃភូមិសាស្ត្រនយោបាយនិងរបៀបដែលសេដ្ឋកិច្ចសកលនៅមិនទាន់បានងើបឡើងវិញពេលលេញពីជំងឺរាតត្បាត។លោក Widodo បានមានប្រសាសន៍ថា “សំណួរសួរថា តើអាស៊ាននៅតែជាទស្សនិកជនទេ? តើអាស៊ាននឹងនៅស្ងៀមទេ? តើអាស៊ានអាចក្លាយជាកត្តាជំរុញសន្តិភាព និងកំណើនដែរឬទេ? ។ ខ្ញុំប្រាកដថាយើងទាំងអស់គ្នាជឿថាអាស៊ានអាចធ្វើបាន ដោយលើកឡើងថា (យើងប្រកាន់ខ្ជាប់)គន្លឹះនេះ៖ គឺការឯកភាពគ្នា។លោក Widodo បានមានប្រសាសន៍ថា ឯកភាពអាស៊ានអាចជាតួអង្គកណ្តាលក្នុងការនាំមកនូវសន្តិភាព និងការអភិវឌ្ឍន៍ ដោយលោកបានបន្ថែមថា អាស៊ានត្រូវតែពង្រឹងសមាហរណកម្មសេដ្ឋកិច្ច ពង្រឹងកិច្ចសហប្រតិបត្តិការប្រកបដោយបរិយាប័ន្នរបស់ខ្លួន រួមទាំងការអនុវត្តភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ និងពង្រឹងនិម្មាបនកម្មសុខាភិបាល អាហារ និងថាមពល ក៏ដូចជារក្សាស្ថិរភាពហិរញ្ញវត្ថុ។លោកបានមានប្រសាសន៍ដោយលើកឡើងពីមូលបទនៃកិច្ចប្រជុំកំពូលឆ្នាំនេះថា៖ «សូមឲ្យយើងខិតខំធ្វើឲ្យ សារៈសំខាន់អាស៊ានក្លាយជាចំណុចស្នូលនៃកំណើនសេដ្ឋកិច្ច»។លោក Mark Richard Thompson នាយកមជ្ឈមណ្ឌលស្រាវជ្រាវអាស៊ីអាគ្នេយ៍នៅសាកលវិទ្យាល័យ City University ទីក្រុងហុងកុង បាននិយាយថា ប្រទេសឥណ្ឌូណេស៊ីត្រូវបាន “ជ្រើសរើសចំពេល” ក្នុងឋានៈប្រធានប្តូរវេននៃប្លុកក្នុងតំបន់ឆ្នាំនេះ ដោយសារប្រជុំកោះនេះជាការពិត “រឿងជោគជ័យផ្នែកសេដ្ឋកិច្ច” ។ លោកបន្តថា នេះជាការឆ្លុះបញ្ចាំងពីកំណើនសេដ្ឋកិច្ចរបស់អាស៊ាន។ លោក Thompson ដែលដកស្រង់ទិន្នន័យពីធនាគារអភិវឌ្ឍន៍អាស៊ីបានសរសើរសមត្ថភាពក្នុងតំបន់ក្នុងការងើបឡើងវិញពីជំងឺរាតត្បាត។ធនាគារអភិវឌ្ឍន៍អាស៊ី (ADB) ដែលបានព្យាករណ៍ថា តំបន់នេះនឹងកើនឡើង៤,៧ភាគរយនៅឆ្នាំនេះ និង ៥ភាគរយនៅឆ្នាំក្រោយបានឱ្យដឹងថា ដំណើរការទេសចរណ៍ដ៏រឹងមាំ និងតម្រូវការក្នុងស្រុកដ៏រឹងមាំកំពុងជំរុញសេដ្ឋកិច្ចអាស៊ីអាគ្នេយ៍។លោក Thompson ក៏បានសរសើរដល់ការគាំទ្ររបស់ប្រទេសឥណ្ឌូនេស៊ីចំពោះការស្នើសុំរបស់ទីម័រឡេស្តេដើម្បីក្លាយជាសមាជិកទី១១ នៃអាស៊ាន ដោយកត់សម្គាល់ថាប្លុកក្នុងតំបន់មានប្រវត្តិនៃការនាំយកសមាជិកនៅទូទាំងការបែងចែកមនោគមវិជ្ជា។អាស៊ានបានយល់ព្រមជាគោលការណ៍ក្នុងការទទួលស្គាល់ទីម័រឡេស្តេជាសមាជិកទី១១ របស់ខ្លួននៅក្នុងកិច្ចប្រជុំកំពូលដែលកម្ពុជាធ្វើជាប្រធានកាលពីខែវិច្ឆិកា។ លទ្ធផលរំពឹងទុកមួយក្នុងចំណោមលទ្ធផលនៃកិច្ចប្រជុំកំពូលនៅឆ្នាំនេះគឺផែនទីបង្ហាញផ្លូវសម្រាប់សមាជិកភាពពេញលេញរបស់ទីម័រឡេស្តេ។នាយករដ្ឋមន្ត្រីទីម័រឡេស្តេ លោក Taur Matan Ruak ដែលបានចូលរួមកិច្ចប្រជុំមេដឹកនាំក្នុងនាមជាអ្នកសង្កេតការណ៍បានថ្លែងអំណរគុណដល់លោក Widodo ដែលបានអញ្ជើញរូបលោកឱ្យចូលរួមក្នុងកិច្ចប្រជុំកំពូលអាស៊ាន។
ជំពូកថ្មី
លោក Ruak បានមានប្រសាសន៍ថា “នេះជាលើកដំបូងរបស់ខ្ញុំដែលចូលរួមក្នុងកិច្ចប្រជុំកំពូលអាស៊ាន ហើយនេះផ្តល់នូវជំពូកថ្មីសម្រាប់ប្រវត្តិសាស្ត្រនៃប្រទេសរបស់យើង” ។ លោកក៏បានថ្លែងអំណរគុណចំពោះមេដឹកនាំអាស៊ានទាំងអស់ចំពោះការគាំទ្រ និងការប្តេជ្ញាចិត្តរបស់ពួកគេ។លោក Ruak បានមានប្រសាសន៍ថា ប្រទេសទីម័រឡេស្តេកំពុងអភិវឌ្ឍហេដ្ឋារចនាសម្ព័ន្ធរបស់ខ្លួន ដើម្បីអាចបំពេញកាតព្វកិច្ចរបស់ខ្លួនក្នុងនាមជាសមាជិកអាស៊ាន។ ទាំងនេះរួមមានការពង្រីកអាកាសយានដ្ឋានអន្តរជាតិនៅរដ្ឋធានី Dili ការបង្កើតខ្សែកាបអុបទិកសម្រាប់ការទំនាក់ទំនងប្រកបដោយសុវត្ថិភាព និងការវិនិយោគលើសណ្ឋាគារ និងមជ្ឈមណ្ឌលសន្និសីទ។លោក Widodo ក៏បានថ្លែងសុន្ទរកថានៅចំពោះមុខក្រុមប្រឹក្សាប្រឹក្សាធុរកិច្ចអាស៊ាន (ASEAN-BAC)។ លោក Widodo បានមានប្រសាសន៍ថាលោកសូមថ្លែងអំណរគុណចំពោះកិច្ចសហប្រតិបត្តិការរវាងរដ្ឋាភិបាល និងវិស័យឯកជនក្នុងអំឡុងពេលជំងឺរាតត្បាត។លោកបានមានប្រសាសន៍ថា “បញ្ហាប្រឈមនាពេលអនាគតនឹងនៅតែធ្ងន់ធ្ងរ ហានិភ័យភូមិសាស្ត្រនយោបាយនឹងនៅតែធំ ហើយស្ថាប័នហិរញ្ញវត្ថុរបស់សហរដ្ឋអាមេរិក និងអឺរ៉ុបកំពុងធ្លាក់ចុះ”។លោក Widodo បានជំរុញឱ្យមានកិច្ចសហប្រតិបត្តិការរវាងវិស័យសាធារណៈ និងឯកជនឱ្យកាន់តែខ្លាំងក្លា ដើម្បីរក្សាអាស៊ានជាចំណុចស្នូលនៃកំណើន។មេដឹកនាំផ្សេងទៀតនៅក្នុងកិច្ចប្រជុំបានបន្ទរសម្លេងអំពីមជ្ឈភាពរបស់អាស៊ាន និងការខ្នះខ្នែងក្នុងការរក្សាការស្តារសេដ្ឋកិច្ចនិងការអភិវឌ្ឍន៍រួមគ្នា។ ភាគីទាំងអស់ក៏បានបង្ហាញពីការយកចិត្តទុកដាក់ចំពោះស្ថិរភាពនៅក្នុងប្រទេសមីយ៉ាន់ម៉ា ដែលមេដឹកនាំមីយ៉ាន់ម៉ាមិនមានវត្តមាននៅក្នុងកិច្ចប្រជុំនោះទេ៕KhmerTimes
Post a Comment