លោកហ៊ុន ម៉ាណែត៖រដ្ឋាភិបាលគាំទ្រវិនិយោគិនវិស័យឯកជនក្នុងការបង្កើតឱកាសការងារបន្ថែមទៀត
អគ្គមេបញ្ជាការរងនៃកងយោធពលខេមរភូមិន្ទមេបញ្ជាការកងទ័ពជើងគោក នាយឧត្តមសេនីយ៍ហ៊ុន ម៉ាណែតមានប្រសាសន៍ថាការបេ្តជ្ញាចិត្តរបស់រដ្ឋាភិបាលគឺគាំទ្រវិនិយោគិនឯកជនក្នុងការបង្កើតឱកាសការងារបន្ថែមទៀត ហើយនឹងការធ្វើឲ្យភាពប្រសើរឡើងនូវលក្ខខណ្ឌការងារល្អនៅកម្ពុជា។
លោកមានប្រសាសន៍យ៉ាងដូច្នេះក្នុងឱកាសចូលរួមពិធីសំណេះសំណាលជាមួយប្រធានរដ្ឋបាលនិងប្រធានផ្នែកនៃរោងចក្រ-សហគ្រាសនៅសាលមហោស្រពកោះពេជ្រនាថ្ងៃទី១៤ខែឧសភា។លោកមានប្រសាសន៍ថា៖« រាជរដ្ឋាភិបាលប្រៀបបានទៅនឹងមាតាបិតា ដែលតែងខិតខំបង្កលក្ខណៈគ្រប់យ៉ាង ដើម្បីឱ្យកូនៗមានគ្រួសារកក់ក្តៅ និងសុខដុមរមនាព្រមជាមួយនឹងឱកាសចម្រុងចម្រើនផ្នែកជីវភាព»។លោកថា រដ្ឋាភិបាលក្រោមការដឹកនាំរបសស់សម្តេចតេជោ គឺតែងតែបានគិតគូរយកចិត្តទុកដាក់ដល់កម្មករ-និយោជិតនិងនិយោជកទាំងអស់ តាមរយៈការធានានូវបរិកាសអំណោយផលនៃសុខសន្តិភាព ស្ថិរភាព និងកំណើនសេដ្ឋកិច្ច ។លោកមានប្រសាសន៍ថា រដ្ឋាភិបាលផ្តល់នូវការគាំទ្រលើកទឹកចិត្តដល់វិស័យឯកជនតាមគ្រប់លទ្ធភាព ដើម្បីធ្វើយ៉ាងណាសម្រេចឱ្យបាននូវវឌ្ឍនភាពកាន់តែប្រសើរជូនសង្គមជាតិ និងការបង្កើតឱកាសការងារល្អៗកាន់តែច្រើនសម្រាប់ប្រជាពលរដ្ឋ។ ដូច្នេះ សូមវិនិយោគិនបន្តជឿទុកចិត្តលើកម្ពុជា និងបន្តពង្រឹងសក្តានុពលដើម្បីទាញយកផលប្រយោជន៍ពីបរិយាកាសប្រកបដោយភាពអនុគ្រោះសម្រាប់ឱកាសអាជីវកម្ម និងការវិនិយោគដ៏សម្បូរបែប។លោកក៏បានកោតសរសើរប្រធានរដ្ឋបាល និងប្រធានផ្នែក នៅតាមបណ្តារោងចក្រ-សហគ្រាសក្នុងរាជធានីភ្នំពេញ ចំពោះការខិតខំបំពេញតួនាទី និងភារកិច្ច នៅក្នុងរចនាសម្ព័ន្ធគ្រប់គ្រងរបស់រោងចក្រ-សហគ្រាស និងចំពោះការរួមចំណែកក្នុងការធានាបាននូវនិរន្តរភាពនៃផលិតកម្ម និងអាជីវកម្មរបស់រោងចក្រ-សហគ្រាស ព្រមទាំងភាពសុខដុមរមនារវាងកម្មករ-និយោជិត និងនិយោជក ក្នុងរយៈកាលកន្លងមក ជាពិសេសការរួមចំណែកក្នុងការថែរក្សាលំនឹងស្ថិរភាព និងភាពធន់នៃសេដ្ឋកិច្ចជាតិ ក្នុងដំណាក់កាលគ្រោះអាសន្ននៃវិបត្តិកូវីដ-១៩ ដែលពិតជាបានបង្ហាញអំពីជំនឿទុកចិត្តលើការដឹកនាំប្រកបដោយយុទ្ធសាស្ត្ររបស់ សម្តេចតេជោ នាយករដ្ឋមន្ត្រី។លោកថា៖ « ប្រធានរដ្ឋបាល និងប្រធានផ្នែក គឺជាជនបង្គោល និងជាស្ពានក្នុងការផ្សារភ្ជាប់ទៅនឹងកម្មករ-និយោជិត ដើម្បីជំរុញការអនុវត្ត និងផ្សព្វផ្សាយអំពីគោលនយោបាយ និងសមិទ្ធផលក្នុងវិស័យការងារ ដែលរាជរដ្ឋាភិបាលបាន និងកំពុងយកចិត្តទុកដាក់ដោះស្រាយជូនកម្មករ-និយោជិត សំដៅធានាបាននូវការលើកកម្ពស់ផ្នែកជីវភាព សុខុមាលភាព និងនិរន្តរភាពអាជីពការងាររបស់កម្មករ-និយោជិតយើង»៕Khmer Times
Post a Comment