ភ្លើងទៀនបន្តកិច្ចប្រជុំសម្រេចចិត្តចូលរួមការបោះឆ្នោតឬបោះបង់
គណបក្សភ្លើងទៀននឹងបន្តកិច្ចប្រជុំគណៈកម្មាធិការនាយកនៅថ្ងៃសុក្រនេះ ដើម្បីសម្រេចចិត្តចូលរួមការបោះឆ្នោតជ្រើសតាំងតំណាងរាស្ត្រអាណត្តិទី៧ ឬបោះបង់ឱកាស។
ការបន្តកិច្ចប្រជុំនេះធ្វើឡើងបន្ទាប់ពីគណបក្សប្រឆាំងមួយនេះបានសម្រេចបន្តនីតិវិធីដាក់ពាក្យសុំចុះបញ្ជីគណបក្សឈរឈ្មោះបោះឆ្នោតនៅគ.ជ.បខណៈដែលស្ថានភាពនយោបាយរបស់បក្សភ្លើងទៀនកំពុងប្រឈមនឹងបញ្ហាច្បាប់មួយចំនួន។ ថ្លែងប្រាប់វិទ្យុបារាំងអន្តរជាតិ នៅថ្ងៃសុក្រនេះ លោក គីមសួរ ភីរិទ្ធ អ្នកនាំពាក្យគណបក្សភ្លើងទៀន បានឲ្យដឹងថាគណៈកម្មាធិការនាយកគណបក្សភ្លើងទៀន នឹងបន្តការប្រជុំនៅថ្ងៃទី១២ឧសភានេះដើម្បីពិនិត្យស្ថានការណ៍នយោបាយពេលបច្ចុប្បន្ន។ស្ថានការណ៍នយោបាយ ដែលបក្សប្រឆាំងមួយនេះ យល់ថា មិនអំណោយផលដ្បិតគណបក្សបានប្រឈមនឹងបញ្ហាផ្លូវច្បាប់មួយចំនួន និងសកម្មជនរបស់ខ្លួនបានបោះបង់នឹងចូលរួមជាមួយគណបក្សកាន់អំណាចជាបន្តបន្ទាប់។បើតាមលោកគីមសួរភីរិទ្ធកិច្ចប្រជុំគណៈកម្មាធិការនាយកនៅថ្ងៃនេះគឺជាការសម្រចចិត្តរបស់គណបក្សភ្លើងទៀនក្នុងការរក្សាជំហរចូលរួមប្រកួតប្រជែងការបោះឆ្នោតនាខែកក្កដាខាងមុខឬក៏ត្រូវបោះបង់លទ្ធភាពចូលរួមការប្រកួតប្រជែង។មកទល់ពេលនេះ ជំហររបស់គណបក្សភ្លើងទៀន នៅមិនទាន់អាចសម្រេចចិត្តបានទេខណៈដែលការចុះឈ្មោះរបស់គណបក្សនៅគណៈកម្មាធិការជាតិរៀបចំការបោះឆ្នោតគឺបក្សភ្លើងទៀននៅខ្វះឯកសារចំនួន២ទៀត។ក្រៅតែពីបញ្ហាច្បាប់ដើមគណបក្សភ្លើងទៀនក៏នៅប្រឈមនឹងបញ្ជីឈ្មោះបេក្ខជនរបស់ខ្លួនផងដែរ។ ក្នុងនោះលោក រ៉ុង ឈុន ត្រូវបានលើកឡើងថា នៅស្ថិតក្រោមទោសទណ្ឌរបស់តុលាការនៅឡើយ ខណៈដែលអនុប្រធានរូបនេះ គឺជាបេក្ខជនទី១របស់គណបក្សភ្លើងទៀន នៅខេត្តកណ្តាល។ក្នុងលិខិតទៅកាន់គណបក្សភ្លើងទៀន លោក ទេព នីថា អគ្គលេខាធិការគ.ជ.ប បានគូសបញ្ជាក់៣ចំណុចដែលគណបក្សជំទាស់នេះមិនទាន់បំពេញបានទៅតាមលក្ខណ្ឌដែលបានកំណត់។ទី១ គណបក្សនេះនៅខ្វះសេចក្តីចម្លងលិខិតការចុះបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់ពីនីត្រានុកូលកម្មដែលមានការបញ្ជាក់ពីរដ្ឋបាលរាជធានី ខេត្ត ស្រុក ខណ្ឌ។ ទី២ បេក្ខជនឈរឈ្មោះលេខរៀងទី១នៅមណ្ឌលខេត្តកណ្តាលដែលមានឈ្មោះ លោក រ៉ុង ឈុន ធ្លាប់ត្រូវបានតុលាការកាត់ទោស និងមិនទាន់បានស្តានីតិសប្បទាឡើងវិញនូវឡើយ។ និងទី៣នៅខ្វះបង្កាន់ដៃបង់ប្រាក់តម្កល់១៥លានរៀលដែលចេញដោយអគ្គនាយកដ្ឋានរតនាគារជាតិ។បញ្ហាបេក្ខភាព លោក រ៉ុង ឈុន ត្រូវបានអ្នកនយោបាយរូបនេះ សម្តែងនូវការភ្ញាក់ផ្អើល ដោយលោកចោទជាចម្ងល់ថា ប្រសិនបើលោកមិនទាន់បានស្តារនីតិសម្បទា ឡើងវិញ ហេតុអ្វីលោកអាចទៅបោះឆ្នោតបាននៅឆ្នាំ២០២២ និងហេតុអ្វីក្រសួងមហាផ្ទៃទទួលស្គាល់លោកជាអនុប្រធានគណបក្សភ្លើងទៀន។តែយ៉ាងណាមិញ គណបក្សភ្លើងទៀនបានសម្រេចដកបេក្ខភាពលោក រ៉ុង ឈុន ចេញតាមការបង្គាប់របស់គ.ជ.ប ខណៈដែលលោក រ៉ុង ឈុន ផ្ទាល់យល់ថា ការខំតវ៉ាទាមទារ មិនមានប្រសិទ្ធភាព៕RFI
រូបភាពគណបក្សភ្លើងទៀន
Post a Comment