គ.ជ.ប៖ហែក្បួនឃោសនាបោះឆ្នោតជ្រើសតាំងតំណាងរាស្ត្រមានសិទ្ធិចំនួន៤ដង
គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប បានអនុញ្ញាតឱ្យគ្រប់គណបក្សនយោបាយដែលមានឈ្មោះនៅក្នុងបញ្ជីឈរឈ្មោះបោះឆ្នោតជ្រើសតាំងតំណាងរាស្ត្រនីតិកាលទី៧មានសិទ្ធិឃោសនាឬហែក្បួនព្យុយាត្រាយ៉ាងច្រើនចំនួន៤ដង។ក្នុងសេចក្ដីណែនាំស្ដីពី ការហែក្បួនឃោសនាបោះឆ្នោត និងការធ្វើសកម្មភាពចែកខិតបណ្ណនៅក្នុងផ្សាររបស់គណបក្សនយោបាយបានបញ្ជាក់ថាការហែក្បួនព្យុហយាត្រា ឬក្បួនដំណើរដោយក្រុមថ្មើរជើង ឬដោយយានជំនិះគ្រប់ប្រភេទ ត្រូវធ្វើយ៉ាងច្រើនត្រឹមតែ៤ដង ក្នុងព្រំប្រទល់ រាជធានី ខេត្ត ដែលសាមីគណបក្សនយោបាយមានបញ្ជីបេក្ខជនឈរឈ្មោះបោះឆ្នោត។គ.ជ.ប បន្ថែមថា ចំពោះការហែក្បួនឃោសនាបោះឆ្នោតក្រៅមណ្ឌលបោះឆ្នោត គឺមិនត្រូវបានអនុញ្ញាតឡើយ។ចំពោះគណបក្សនយោបាយដែលហែក្បួនឃោសនាបោះឆ្នោតក្នុងរាជធានី ខេត្ត ដែលខ្លួនមានបញ្ជីបេក្ខជនឈរឈ្មោះបោះឆ្នោត ហើយតម្រាយផ្លូវនៃក្បួនឃោសនានោះត្រូវឆ្លងកាត់រាជធានី ខេត្តដទៃ ដោយសារស្ថានភាពទីតាំងភូមិសាស្ត្រជាក់ស្តែងនៃរាជធានី ខេត្តនោះមានព្រំប្រទល់ជាប់គ្នា ដែលមិនអាចវាងបាន គណបក្សនយោបាយសាមីត្រូវជូនដំណឹងជាលាយលក្ខណ៍អក្សរទៅគណៈកម្មការរាជធានី ខេត្តរៀបចំការបោះឆ្នោត (គធ.ខប) យ៉ាងតិចឱ្យបាន ៣ ថ្ងៃមុនថ្ងៃហែក្បួនឃោសនា ទោះបីជារាជធានី ខេត្តដែលត្រូវឆ្លងកាត់នោះ ខ្លួនមានឬគ្មានបញ្ជីបេក្ខជនឈរឈ្មោះបោះឆ្នោតក៏ដោយ។គ.ជ.ប បញ្ជាក់ថា៖ «ក្នុងដំណើរឆ្លងកាត់នេះ សាមីគណបក្សនយោបាយ ត្រូវបិទឧបករណ៍បំពងសំឡេង និងផ្អាករាល់សកម្មភាពឃោសនាបោះឆ្នោតរបស់ខ្លួន។ គធ.ខប ត្រូវស្នើសុំកិច្ចសហការ និងសម្របសម្រួលជាមួយអាជ្ញាធរមានសមត្ថកិច្ចពាក់ព័ន្ធផ្សេងទៀត ដើម្បីការពារសន្តិសុខ សណ្ដាប់ធ្នាប់ និងរបៀបរៀបរយក្នុងពេលឃោសនាបោះឆ្នោត»។ក្នុងសេចក្ដីណែនាំបន្ថែមថា គណបក្សនយោបាយដែលមានបំណងហែក្បួនឃោសនាបោះឆ្នោត ត្រូវផ្ដល់ដំណឹងជា លាយលក្ខណ៍អក្សរទៅគណៈកម្មការរាជធានី ខេត្តរៀបចំការបោះឆ្នោត យ៉ាងតិចឱ្យបាន ៣ ថ្ងៃ មុនថ្ងៃហែក្បូនឃោសនាបោះឆ្នោត។គ.ជ.ប បន្តថា ចំពោះគណបក្សនយោបាយ ដែលមានបំណងចែកខិត្តបណ្ណនៅក្នុងផ្សារ ត្រូវស្នើសុំទៅអ្នកគ្រប់គ្រងផ្សារ និងជូនដំណឹងជាលាយលក្ខណ៍អក្សរទៅគណៈកម្មការឃុំ សង្កាត់ រៀបចំការបោះឆ្នោត យ៉ាងតិចឱ្យបាន ៣ថ្ងៃ មុនថ្ងៃធ្វើសកម្មភាព។គ.ជ.ប និយាយថា រាល់ការធ្វើសកម្មភាពក្នុងផ្សារ គឺកំណត់ចំនួនមនុស្សយ៉ាងច្រើន១០នាក់ប៉ុណ្ណោះ ប៉ុន្តែត្រូវគោរព និងរក្សាឱ្យបាននូវសន្តិសុខ សុវត្ថិភាព សណ្តាប់ធ្នាប់ និងមិនត្រូវយកតាមខ្លួននូវឧបករណ៍បំពងសំឡេងឡើយ។ចំពោះការផ្សព្វផ្សាយតាមឧបករណ៍បំពងសំឡេងពាក់ព័ន្ធនឹងគោលនយោបាយ ឬកម្មវិធីនយោបាយ ឬក៏សារនយោបាយរបស់គណបក្សខ្លួន គឺអាចធ្វើបាននៅក្រៅបរិវេណផ្សារតែប៉ុណ្ណោះ។ ក្នុងនោះ គណៈកម្មការឃុំសង្កាត់រៀបចំការបោះឆ្នោត ត្រូវសម្របសម្រួលជាមួយអាជ្ញាធរដែនដី អ្នកគ្រប់គ្រងផ្សារ ដើម្បីបង្កលក្ខណៈងាយស្រួលដល់ការធ្វើសកម្មភាពឃោសនារបស់បក្សនយោបាយទាំងនោះ។កាលពីថ្ងៃចន្ទ ប្រធានគណៈកម្មាធិការជាតិរៀបចំការបោះឆ្នោត លោក ប្រាជ្ញ ចន្ទ បានឱ្យដឹងថា ចំពោះការឃោសនាបោះឆ្នោតរបស់គណបក្សនយោបាយ គឺគណៈកម្មការរាជធានី ខេត្តរៀបចំការបោះឆ្នោត ត្រូវសហការជាមួយអាជ្ញាធរមានសមត្ថកិច្ច ដើម្បីកំណត់ពីទីសាធារណៈប្រើប្រាស់ ដោយត្រូវយកចិត្តទុកដាក់លើកត្តាភូមិសាស្ត្រ ប្រជាសាស្ត្រ សេដ្ឋកិច្ច សន្តិសុខ និងសណ្តាប់ធ្នាប់សាធារណៈសម្រាប់ប្រជាពលរដ្ឋទូទៅ។លោកបន្ថែមថា គណបក្សនយោបាយទាំងអស់ ត្រូវប្រមូលយកមកវិញនូវបណ្ណប្រកាស ឬបណ្ណបិទផ្សាយ បដា និងឯកសារឃោសនាបោះឆ្នោតរបស់ខ្លួនពីគ្រប់កន្លែងសាធារណៈវិញក្នុងរយៈពេល ១៥ ថ្ងៃ បន្ទាប់ពីថ្ងៃបោះឆ្នោត។លោកបន្តថា គណបក្សនយោបាយទាំងអស់ ត្រូវយកចិត្តទុកដាក់ដោយគោរព និងរក្សាឱ្យបាននូវសណ្ដាប់ធ្នាប់ល្អតាមដងផ្លូវ ទីប្រជុំជន ទីសាធារណៈ និងត្រូវយកចិត្តទុកដាក់គោរពតាមច្បាប់ស្តីពីចរាចរណ៍ផ្លូវគោក។លោក ប្រាជ្ញ ចន្ទ បញ្ជាក់ថា ការហែក្បួនឃោសនាបោះឆ្នោត សំដៅដល់ការហែក្បួនព្យុហយាត្រា ឬក្បួនដំណើរដោយក្រុមថ្មើរជើង ឬដោយយានជំនិះគ្រប់ប្រភេទ ដែលរៀបចំឡើងដោយគណបក្សនយោបាយ ដែលបានចុះបញ្ជីបេក្ខជនឈរឈ្មោះបោះឆ្នោតក្នុងរាជធានី ខេត្ត។គិតត្រឹមថ្ងៃទី១៣ឧសភា គ.ជ.ប បានទទួលស្គាល់ និងផ្ដល់បណ្ណសម្គាល់ដល់អ្នកសារព័ត៌មានជាតិ និងអន្តរជាតិ ចំនួនជិត២០០នាក់ ដើម្បីចូលរួមយកព័ត៌មានក្នុងដំណើរការបោះឆ្នោត។គិតត្រឹមថ្ងៃចន្ទ គ.ជ.ប បានសម្រេចទទួលស្គាល់ជាផ្លូវការលើការចុះបញ្ជីរបស់គណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត ចំនួន១៨ គណបក្សនយោបាយ ខណៈគណបក្សភ្លើងទៀន ដែលជាគណបក្សប្រឆាំងដ៏ធំនៅកម្ពុជា ត្រូវបានបដិសេធដោយអះអាងថា មិនបានបំពេញគ្រប់លក្ខខណ្ឌរបស់ គ.ជ.ប។ការបោះឆ្នោតជ្រើសតាំងតំណាងរាស្ត្រ នីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣៕Khmer Times
យុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ សង្កាត់ អាណត្តិទី៥នៅថ្ងៃទី៣ ខែមិថុនា ឆ្នាំ២០២២ ។សហការី
Post a Comment