នាយករដ្ឋមន្ត្រី៖ត្រកូល«ហ៊ុន»ស្ម័គ្រស្លាប់ការពារព្រះមហាក្សត្រ
សម្តេចនាយករដ្ឋមន្ត្រី ហ៊ុន សែនបានអះអាងពីម្សិលមិញថាត្រកូលរបស់សម្តេចជាត្រកូលការពារព្រះមហាក្សត្រនិងរាជបល្ល័ង្កហើយប្រសិនបើនរណាចង់ប្រមាថឬធ្វើបាបព្រះមហាក្សត្រត្រូវឆ្លងកាត់ត្រកូល «ហ៊ុន» របស់សម្តេចជាមុនសិន។
សម្តេចនាយករដ្ឋមន្ត្រី ហ៊ុន សែន បានថ្លែងយ៉ាងដូច្នេះនៅក្នុងពិធីប្រគល់សញ្ញាបត្រជូននិស្សិតសកលវិទ្យាល័យកសិកម្មចំនួន៣ នៅមជ្ឈមណ្ឌលកោះពេជ្រពីម្សិលមិញ បន្ទាប់ពីព្រះរាជពិធីចម្រើនព្រះជន្មព្រះមហាក្សត្រ នរោត្តម សីហមុនី ក្នុងគម្រប់៧០ព្រះវស្សានិងយាងចូល៧១ព្រះវស្សា។សម្តេចនាយករដ្ឋមន្ត្រីបានលើកឡើងថា ប្រសិនបើនរណាចង់ប្រមាថឬធ្វើបាបអង្គព្រះមហាក្សត្រគឺត្រូវឆ្លងកាត់ត្រកូលហ៊ុនជាមុនសិនពីព្រោះត្រកូលហ៊ុន ជាត្រកូលអ្នកការពារព្រះមហាក្សត្រ និងជាកម្លាំងដ៏ធំជាងគេក្នុងការការពាររបបរាជានិយម។សម្តេចនិយាយថា៖ «ត្រកូលហ៊ុនមិនមែនមានតែហ៊ុន សែន ម្នាក់ទេ គឺនៅមានមនុស្សច្រើនណាស់ ហើយមនុស្សទូទាំងប្រទេសដែលគាំទ្រត្រកូលហ៊ុនសម្រាប់ការបន្តធ្វើជានាយករដ្ឋមន្ត្រីឬក៏អនាគតនាយករដ្ឋមន្ត្រីនៅកម្ពុជា»។សម្តេចបញ្ជាក់ថា៖«ត្រកូលនេះមិនមែនជាត្រកូលក្បត់ស្ដេចទេ។ត្រកូលនេះជាត្រកូលការពារព្រះមហាក្សត្រជាត្រកូលការពារព្រះរាជបល្ល័ង្ក និងជាត្រកូលការពាររាជនិយម ហើយខ្ញុំបានរួមចំណែកចំពោះការនាំមកវិញនូវរបបរាជនិយម»។សម្តេចបន្តថា៖ «ឥឡូវ [ត្រកូលហ៊ុន]ជាកម្លាំងតែមួយគត់ដែលធំជាងគេក្នុងការការពាររបបរាជនិយមការពាររាជបល្ល័ង្ក ការពារព្រះមហាក្សត្រ»។សម្តេចបានបញ្ជាក់បន្ថែមថា ត្រកូលរបស់សម្តេច ជាត្រកូលស្ម័គ្រស្លាប់ការពារព្រះមហាក្សត្រ ដែលខុសពីត្រកូលមួយនោះជាត្រកូលក្បត់រហូតដល់៣ជំនាន់។ ត្រកូលមួយនោះបានជេរប្រមាថព្រះមហាក្សត្រ ហើយថែមទាំងអំពាវនាវឱ្យព្រះមហាក្សត្រចុះចេញពីតំណែង។ទោះបីជាសម្តេចថ្លែងមិនបញ្ចេញឈ្មោះ។ប៉ុន្តែការលើកឡើងនេះទំនងជាសំដៅដល់លោក សម រង្ស៊ី អតីតមេដឹកនាំគណបក្សប្រឆាំងដែលកំពុងរស់នៅក្រៅប្រទេស។លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា បានលើកឡើងថា ការការពារព្រះមហាក្សត្រ គឺការពាររដ្ឋធម្មនុញ្ញ ការពាររបបរាជានិយមអាស្រ័យរដ្ឋធម្មនុញ្ញនិងការពារសន្តិភាពឱ្យនយបានគង់វង្សយូរអង្វែង ។លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតនិងការស្រាវជ្រាវ បានលើកឡើងថាការលើកឡើងរបស់សម្តេចនាយករដ្ឋមន្ត្រី ហ៊ុន សែន អំពីការការពារព្រះមហាក្សត្រនិងរាជបល្ល័ង្កជាបន្តបន្ទាប់គឺស្របនឹងការសន្យារបស់លោកជាមួយនឹងអតីតព្រះមហាក្សត្រ នរោត្តម សីហនុមុនពេលដែលព្រះអង្គយាងសោយទីវង្គត។លោកនិយាយថាថ្នាក់ដឹកនាំស្ថាប័នជាតិទាំងអស់ដែលស្ថិតក្រោមព្រះមហាក្សត្រគឺសុទ្ធតែអ្នកស្មោះស្ម័គ្រនិងមានតួនាទីការពារព្រះមហាក្សត្រនិងព្រះរាជបល្ល័ង្ក ដែលស្របនឹងរដ្ឋធម្មនុញ្ញរបស់ព្រះរាជាណាចក្រកម្ពុជា។លោកកត់សម្គាល់ឃើញថា៖ «បច្ចុប្បន្នមានជាច្រើនគោរពនិងអនុវត្តតាមរដ្ឋធម្មនុញ្ញ។ប៉ុន្តែក៏មានអ្នកនយោបាយផ្សេងទៀតបានវាយប្រហារមកលើអង្គព្រះមហាក្សត្រ»។លោកបានរំលឹកពីប្រវត្តិសាស្ត្រថា៖«រាប់ចាប់តាំងពីអតីកាលរហូតមក អង្គព្រះមហាក្សត្រជាអ្នកគ្រប់គ្រង់និងដឹកនាំប្រទេសជាតិ ទោះបីជាធ្លាប់មានរដ្ឋប្រហារទម្លាក់ព្រះមហាក្សត្រចន្លោះឆ្នាំ១៩៧០-ឆ្នាំ១៩៧៥ក៏ដោយ។ក៏ប៉ុន្តែរបបរាជានិយមបានកប់ជ្រៅទៅក្នុងផ្នត់គំនិតរបស់ប្រជាពលរដ្ឋគ្រប់រូបមកដល់បច្ចុប្បន្ននេះ»។នៅក្នុងរដ្ឋធម្មនុញ្ញរបស់ព្រះរាជាណាចក្រកម្ពុជាបានចែងថា ព្រះមហាក្សត្រកម្ពុជាទ្រង់គ្រងរាជសម្បត្តិ ។ប៉ុន្តែទ្រង់មិនកាន់អំណាចឡើយ។ព្រះអង្គជាប្រមុខរដ្ឋអស់មួយជីវិត ហើយអង្គព្រះមហាក្សត្រមិនអាចមាននរណារំលោភបំពានបានឡើយ។រដ្ឋធម្មនុញ្ញបន្តថា ព្រះមហាក្សត្រទ្រង់មានតួនាទីធានាឯករាជ្យជាតិ អធិបតេយ្យ បូរណភាពទឹកដី ការគោរពសិទ្ធិ និងសេរីភាពរបស់ ប្រជាពលរដ្ឋ និងការគោរពសន្ធិសញ្ញាអន្តរជាតិ។ព្រះមហាក្សត្រជាអាជ្ញាកណ្តាល ដើម្បីធានាការប្រព្រឹត្តទៅនៃអំណាចសាធារណៈឱ្យមានភាពទៀងទាត់។រដ្ឋធម្មនុញ្ញបន្ថែមថា ព្រះមហាក្សត្រមានតួនាទីតែងតាំងនាយករដ្ឋមន្ត្រីនិងគណៈរដ្ឋមន្ត្រីតាមបែបបទដែលមានចែងក្នុមាត្រា១០០។ ព្រះមហាក្សត្រមានតួនាទីឡាយព្រះហស្ថលេខាលើព្រះរាជក្រឹត្យតែងតាំង ផ្លាស់ប្តូរឬបញ្ចប់ភារកិច្ចមន្ត្រីជាន់ខ្ពស់ ស៊ីវិល និងយោធា ឯកអគ្គរាជទូត និងប្រេសិតវិសាមញ្ញនិងពេញ្ញសមត្ថភាពតាមសេចក្តីស្នើរបស់គណៈរដ្ឋមន្រ្តី។រដ្ឋធម្មនុញ្ញចែងទៀតថា ព្រះមហាក្សត្រមានតួនាទីឡាយព្រះហស្ថលេខាលើព្រះរាជក្រឹត្យតែងតាំង ផ្លាស់ប្តូរ ឬដកហូតចៅក្រមផ្នែក យុត្តាធិការ តាមសេចក្តីស្នើរបស់ឧត្តមក្រុមប្រឹក្សានៃអង្គចៅក្រម។ ព្រះមហាក្សត្រមានតួនាទីប្រកាសដាក់ប្រទេសជាតិស្ថិតក្នុងភាពអាសន្ននិងប្រកាសសង្រ្គាម។រដ្ឋធម្មនុញ្ញចែងទៀតថា ព្រះមហាក្សត្រជាមេបញ្ជាការកំពូលនៃកងយោធពលខេមរភូមិន្ទ។ ព្រះមហាក្សត្រមានតួនាទីឡាយព្រះហស្ថលេខាលើព្រះរាជក្រមប្រកាសឱ្យប្រើរដ្ឋធម្មនុញ្ញ ច្បាប់ដែលរដ្ឋសភាបានអនុម័ត និងព្រឹទ្ធសភាបានពិនិត្យចប់សព្វគ្រប់ហើយ៕Khmer Times
/unnamed.png
Post a Comment