សូមប្រុងប្រយ័ត្នខ្ពស់ចំពោះបាតុភូតធម្មជាតិដែលអាចកើតមានក្នុងសប្តាហ៍នេះ
ក្រសួងធនធានទឹកនិងឧតុនិយមបានអំពាវនាវដល់សាធារណជនឱ្យបង្កើនការប្រុងប្រយ័ត្នចំពោះបាតុភូតធម្មជាតិដែលអាចកើតមានក្នុងសប្តាហ៍នេះ។ក្រសួងបានព្រមានពីភ្លៀងធ្លាក់ពីតិចទៅមធ្យម រួមនឹងផ្គរ រន្ទះ និងខ្យល់កន្ត្រាក់នៅទូទាំងប្រទេសចាប់ពីថ្ងៃទី១០ដល់១៦ឧសភា។ប្រភពដដែលបានគូសបញ្ជាក់ថា សម្រាប់សីតុណ្ហភាពក្នុងអំឡុងពេលនោះនឹងប្រែប្រួលចន្លោះពី ២៥ ទៅ ៣៦ អង្សាសេសម្រាប់តំបន់ទំនាបកណ្តាល និងពី ២៤ ទៅ ៣៦ សម្រាប់តំបន់ខ្ពង់រាប។
ក្រសួងបានបន្ថែមថា នៅតំបន់មាត់សមុទ្រ សីតុណ្ហភាពនឹងមានពី២៤ទៅ៣៥អង្សារសេ។នៅក្នុងការព្យាករណ៍អាកាសធាតុរយៈពេលវែងទីពីរដែលចេញផ្សាយដោយក្រសួងធនធានទឹក និងឧតុនិយម នៅចុងខែមេសា រដូវវស្សាឆ្នាំនេះត្រូវបានគេរំពឹងថានឹងចាប់ផ្តើមនៅសប្តាហ៍ទី២នៃខែឧសភា ដោយនាំមកនូវភ្លៀងធ្លាក់ពីតិចទៅមធ្យម រួមជាមួយនឹងផ្គរ រន្ទះ និងខ្យល់កន្ត្រាក់។ក្រសួងបានគូសបញ្ជាក់ថា រដូវវស្សាឆ្នាំ២០២៣ នឹងបញ្ចប់នៅសប្តាហ៍ដំបូងនៃខែវិច្ឆិកា។ប្រទេសកម្ពុជាទើបតែបានប្រារព្ធព្រះរាជពិធីបុណ្យច្រត់ព្រះនង្គ័លប្រចាំឆ្នាំដែលបង្ហាញពីការចាប់ផ្តើមរដូវដាំដុះក្នុងប្រទេសនៅស្រុកកំពង់ស្វាយខេត្តកំពង់ធំក្រោមព្រះរាជាធិបតីភាពដ៏ខ្ពង់ខ្ពស់របស់ព្រះករុណាព្រះបាទសម្តេចព្រះបរមនាថនរោត្តមសីហមុនីព្រះមហាក្សត្រនៃព្រះរាជាណាចក្រកម្ពុជា៕AKP/Khmer Times
Post a Comment