មេដឹកនាំអាស៊ានបង្ហាញក្តីបារម្ភនឹងអំពើហិង្សានៅភូមាថ្កោលទោសការវាយប្រហារលើក្បួនដឹកជំនួយមនុស្សធម៌
សមាគមប្រជាជាតិនៅអាស៊ីអាគ្នេយ៍ហៅកាត់ថាអាស៊ានកំពុងបើកជំនួបកំពូលលើកទី៤២នៅក្នុងប្រទេសឥណ្ឌូណេស៊ី រហូតដល់ថ្ងៃព្រហស្បតិ៍ស្អែក។ នៅថ្ងៃពុធទី១០ ឧសភា២០២៣នេះ ក្រុមមេដឹកនាំអាស៊ាន បានបង្ហាញជំហរព្រួយបារម្ភយ៉ាងខ្លាំងនឹងអំពើហិង្សានិងបានប្រកាសថ្កោលទោសការវាយប្រហារលើក្បួនដឹកជំនួយមនុស្សធម៌ កាលពីពេលថ្មីៗ នៅក្នុងប្រទេសភូមា។ ក្នុងសុន្ទរកថាបើកជំនួបកំពូល លោកប្រធានាធិបតីឥណ្ឌូណេស៊ី ដែលជាប្រធានផ្លាស់វេនសមាគមនាពេលនេះ បានអំពាវនាវឱ្យ អាស៊ានត្រូវតែរួបរួមគ្នាជាធ្លុងមួយដើម្បីជំនះគ្រប់ឧបសគ្គ និងដើម្បីដើរតួនាទីស្នូលក្នុងស្វែងរកសន្តិភាពនិងកំណើនសេដ្ឋកិច្ច។ ក្នុងន័យនេះមេដឹកនាំអាស៊ាន បានជំរុញឱ្យភូមាបិទបញ្ចប់រាល់គ្រប់ទម្រង់នៃអំពើហិង្សា ហើយប្រមូលកម្លាំងប៉ូលិសធ្វើយ៉ាងណាធានាឱ្យមានការផ្តល់ជំនួយមនុស្សធម៌ដល់ជនស៊ីវិលនិងបង្កើតបរិយាកាសចរចាបង្រួបបង្រួមជាតិ។ នេះបើតាមសេចក្តីថ្លែងការណ៍ធ្វើឡើងក្រោយបើកជំនួបកំពូលបានបន្តិច។ទោះបានសាកល្បងដោះស្រាយវិបត្តិភូមាតាមផ្លូវការទូត ដោយគ្មានលទ្ធផល ដោយរបបសឹកភូមា បន្តធ្វើមិនដឹងមិនឮការថ្កោលទោសរបស់អន្តរជាតិនិងបន្តបដិសេធមិននិយាយរកក្រុមប្រឆាំងនឹងរដ្ឋាភិបាលយោធា ក៏ដោយ ក៏អាស៊ាននៅព្យាយាមដាក់សម្ពាធលើភូមាដដែល នៅចំពោះមុខអំពើហិង្សាជាបន្តបន្ទាប់។ ក្រោយការវាយប្រហារផ្លូវអាកាសនៅភាគកណ្តាលនៃប្រទេសបង្កឱ្យបាត់បង់ជីវិតមនុស្សអស់យ៉ាងហោច១៧០នាក់ មានការវាយប្រហារលើក្បួនដឹកជំនួយមនុស្សធម៌អន្តរជាតិទៀត នៅភាគខាងកើតប្រទេស កាលពីថ្ងៃអាទិត្យកន្លងទៅ។នៅក្នុងក្បួនដឹកជំនួយមនុស្សធម៌ មានតំណាងស្ថានទូតឥណ្ឌូណេស៊ី២រូប សិង្ហបុរី២រូប តែជាសំណាងការបាញ់រះនេះមិនបង្កឱ្យមានជនរងគ្រោះ។អាស៊ានសូមថ្កោលទោសការវាយប្រហារនេះ ហើយអ្នកបង្កហេតុត្រូវបំភ្លឺនូវទង្វើរបស់ខ្លួន។ នេះបើតាមសេចក្តីថ្លែងការណ៍អាស៊ានដដែល។ភូមានៅតែមានឈ្មោះជាសមាជិកអាស៊ាន។ប៉ុន្តែគ្មានមុខចូលរួមក្នុងជំនួបប្រជុំជាន់ខ្ពស់ និងជំនួបកំពូលលើកនេះទេ តាំងពីភូមាមិនព្រមអនុវត្តតាមផែនការសន្តិភាព៥ចំណុចស្នើឡើងដោយអាស៊ានមក។ ភាពជាប្រធានអាស៊ានរបស់ឥណ្ឌូណេស៊ី ដែលជាមហាអំណាចសេដ្ឋកិច្ចក្នុងតំបន់និងមានបទពិសោធនយោបាយខ្ពស់ កំពុងបំផុសក្តីសង្ឃឹមជុំវិញវិបត្តិភូមា។ បើតាមរដ្ឋមន្ត្រីការបរទេសឥណ្ឌូណេស៊ី ហ្សាកាតាលួចនិយាយជាមួយគ្រប់ភាគីភូមា តាមផ្លូវទូតដោយសម្ងាត់។ ប៉ុន្តែបើតាមការអះអាងរបស់មន្ត្រីជាន់ខ្ពស់ម្នាក់ អាស៊ានទំនងត្រូវប្រឈមនឹងជម្រើដ៏លំបាកមួយ ហើយអាចនឹងបរាជ័យទៀត ព្រោះមានគំនិតផ្តួមផ្តើមជាឯកតោភាគីរបស់ចិននិងរបស់ប្រទេសផ្សេងទៀត ដែលលុបលើគម្រោងអាស៊ាន។ ដូច្នេះ លទ្ធផលនៃជំនួបកំពូលលើកនេះ ទំនងជាស្តួចស្តើងណាស់ ទាក់ទងនឹងវិបត្តិភូមានេះ៕RFI
នៅក្នុងសម័យប្រជុំពេញអង្គនៃកិច្ចប្រជុំកំពូល។(រូបថត៖សហការី)
/unnamed.png
Post a Comment